*D dem ist hie wol gelungen." nâch den orsen si dô sprungen. ir wât wart von den ougen naz, dô si kômen, dâ ir hêrre saz. si enpfiengen in, er enpfienc ouch sie. vreude unt jâmer, daz was hie. Dô kuster die getriwen. er sprach: "iuch ensol niht riwen zunmâzer wîs der bruoder mîn. ich mag iuch wol ergetzen sîn. kêrt ûf den schilt nâch sîner art, gehabt iuch an der vreuden vart! ich sol mînes vater wâpen tragen. sîn lant mîn anker hât beslagen. der anker ist ein recken zil, den trage und nem nû, swer der wil. Ich muoz nû lebelîche gebâren. ich bin rîche. wan solt ich volkes hêrre sîn? den tæte wê der jâmer mîn. vrou Herzeloyde, helfet mir, daz wir bitten, ich unt ir, künege unt vürsten, die hie sîn, daz si durch den dienest mîn belîben, unz ir mich gewert, des minnen werc zer minnen gert." Die bete warb ir beider munt. die werden lobtenz sâ zestunt. ieslîcher vuor an sîn gemach. diu künegîn zir vriunde sprach:

*m dem hie ist wol gelungen." nâch den rossen si dô sprungen. ir wât wart von ir ougen naz, dô si kômen, dâ ir hêrre saz. si enpfiengen in, er enpfienc sie. vröude und jâmer, daz was hie. dô kust er die getriuwen. er sprach: "iuch sol niht riuwen zunmâzer wîs der bruoder mîn. ich mac iuch wol ergetzen sîn. kêret ûf den schilt nâch sîner art, gehabet iuch an der vröuden vart! ich sol mînes vater wâpen tragen. sîn lant mîn anker hât beslagen. der anker ist ein recken zil, den trage und neme nû, wer der wil. ich muoz nû lobelîche gebârn. ich bin rîche. wanne solt ich volkes hêrre sîn? den tæte wê der jâmer mîn. vrouwe Herczeloide, helfet mir, daz wir gebieten, ich und ir, †küniginne† und vürsten, die hie sîn, daz si durch den dienst mîn belîben, unz ir mich gewert, des minnen wert †er† minnen gert." die bete †wart† ir beider munt. die werden lobetenz zestunt. iegelîcher vuor an sîn gemach. diu künigîn zuo †iren vriunden† sprach:

*G dem sî dâ wol gelungen." ze orsen si dô sprungen. ir wât wart von den ougen naz, dô si kômen, dâ ir hêrre saz. si enpfiengen in, er enpfienc ouch si. vröude und jâmer was dâ bî. dô kuster die getriwen. er sprach: "iuch sol niht riwen ze unmâzer wîse der bruoder mîn. ich mac iuch wol ergetzen sîn. Kêrt ûf den schilt nâch sîner art und habet iuch an der vröuden vart! ich wil mînes vater wâpen tragen. sîn lant mîn anker hât beslagen. der anker ist ein recken zil, den trage und neme, swer der wil. ich muoz nû lebelîche gebâren. ich bin rîche. wan sol ich volkes hêrre sîn? dem tæte wê der kumber mîn. vrouwe Herzeloide helfet mir, daz wir biten, ich und ir, künige und vürsten, die hie sîn, daz si durch den dienst mîn belîben, unz ir mich gewert, des minnen werc ze minnen gert." die bete warb ir beider munt. die werden lobten ez zestunt. iegelîcher vuor an sîn gemach. diu künigîn zir vriunde sprach:

*T dem sî dâ wol gelungen." zuo orsen si dô sprungen. ir wât wart von den ougen naz, dô si kâmen, dâ ir hêrre was. si entviengen in, er entvienc ouch sie. vreude und jâmer, daz was hie. dô kuster die getriuwen. er sprach: "ouch iuch sol niht riuwen zuo unmâzer wîs der bruoder mîn. ich mac iuch wol ergetzen sîn. kêret ûf den schilt nâch sîner art und habt iuch an der vreuden vart! ich wil mînes vater wâpen tragen. sîn lant mîn anker hât beslagen. der anker ist ein recken zil, den nem und trage nû, wer der wil. ich muoz nû lebelîche gebâren. ich bin rîche. wan solt ich volkes hêrre sîn? dem tæte wê der jâmer mîn. Vrou Herzeloyde, nû helfet mir, daz wir biten, ich und ir, künege und vürsten, die hie sîn, daz si durch den dienst mîn blîben, unz ir mich gewert, des minne wert zer minne gert." die bete warp ir beider munt. die werden lobetenz sô zuostunt. ieclîcher vuor an sîn gemach. diu küniginne zuome gaste sprach: