*D als der benediz wart getân, dô kom vrou Herzeloyde sân. an Gahmuretes lîp si sprach. si gerte, als ir diu volge jach. dô sprach er: "vrouwe, ich hân ein wîp. diu ist mir lieber danne der lîp. ob ich der âne wære, dennoch wess ich ein mære, dâ mit ich iu enbræste gar, næme iemen mînes rehtes war." Si sprach: "ir sult die mœrinne lân durch mîne minne. des toufes segen hât bezzer kraft. nû ânet iuch der heidenschaft unt minnet mich nâch unserer ê, wan mir ist nâch iwerer minne wê. oder sol mir gein iu schade sîn der Franzoyser künegîn, der boten sprâchen süeziu wort? si spilten ir mære unz an den ort." "jâ, diu ist mîn wâriu vrouwe. ich brâhte in Anschouwe ir rât und mîner zühte site. mir wont noch hiute ir helfe mite dâ von, daz mich mîn vrouwe zôch, die wîbes missewende ie vlôch. wir wâren kinder beidiu dô unt doch ze sehen ein ander vrô. Diu küneginne Ampflise wont an wîplîchem prîse.

*m und als der benediz †daz† wart getân, dô kam vrouwe Herczeloide sân. an Gahmuretes lîp si sprach. si gerte, als ir diu volge jach. dô sprach er: "vrowe, ich hân ein wîp. diu ist mir lieber danne der lîp. ob ich der âne wære, dannoch wuste ich ein mære, dâ mite ich iu enbræste gar, næme ieman mînes rehtes war." Si sprach: "ir sullet die mœrinne lân durch mîne minne. des toufes segen hât bezzer kraft. nû ânet iuch der heidenschaft und minnet mich nâch mîner ê, wanne mir ist nâch iuwer minne wê. oder sol mir gegen iu schade sîn der Franzoiser künigîn, der boten sprâchen süeziu wort? si spilten ir mære unz an den ort." "jâ, diu ist mîniu wâre vrouwe. ich brâhte in Anschouwe ir rât und mîner zühte site. mir wonet noch hiute ir helfe mite dâ von, daz mich mîn vrouwe zôch, die wîbes missewende ie vlôch. wir wâren beidiu kinder dô und doch ze sehene ein ander vrô. diu künigîn Ampflise wont an wîplîchem prîse.

*G dô der benediz wart getân, vrô Herzeloide kom dâ sân. an Gahmuretes lîp si sprach unde gerte, als ir diu volge jach. dô sprach er: "vrouwe, ich hân ein wîp, diu mir ist lieber dane der lîp. obe ich der âne wære, danoch wesse ich ein mære, dâ mit ich iu enbræste gar, næme iemen mînes rehtes war." "ir sult die mœrinne lân durch mîne minne. des toufes segen hât grœzer kraft. nû ânet iuch der heidenschaft unde minnet mich nâch unser ê. mir ist nâch iwerer minne wê. oder sol mir gein iu schade sîn der Franzoiser künigîn? der boten sprâchen süeziu wort unde spilden ir mære unze an den ort." er sprach: "diu ist mîn vrouwe. ich brâht in Anschouwe ir rât an mîner zühte site. mir wonet noch hiute ir helfe mite dâ von, daz mich mîn vrouwe zôch, die wîbes missewende vlôch. wir wâren kinder beidiu dô unt doch ze sehene ein ander vrô. diu künigîn Anphlise wonet in wîbes prîse.

*T dô der benediz wart getân, vrô Herzeloyde kam dô sân. an Gahmuretes lîp si sprach und gertes, als ir diu volge jach. dô sprach er: "vrouwe, ich hân ein wîp. diu ist mir lieber dan der lîp. ob ich der âne wære, dannoch weiz ich eine mære, dâ mit ich iu enbræste gar, næme ieman mînes rehtes war." "ir solt die mœrinne lân durch mîne minne. des toufes segen hât bezzer kraft. nû ânet iuch der heidenschaft und minnet mich nâch unserre ê, wan mir ist nâch iu wê. oder sol mir gein iu schade sîn der Franzoyser künegîn? die boten sprâchen süeziu wort und spilten ir mære unz in daz ort." "seht, diust mîn wâriu vrouwe. ich brâhte in Anschouwe ir rât und mîner zühte site. mir wont noch hiute ir helfe mite dâ von, daz mich mîn vrouwe zôch, die wîbes missewende ie vlôch. wir wâren beidiu kinder dô und doch zuo sehene ein ander vrô. diu künegîn Anflise gewonte an wîplîchem prîse.