*D Ob von Troys meister Christjan disem mære hât unreht getân, daz mac wol zürnen Kyot, der uns diu rehten mære enbôt. endehaft giht der Provenzal, wie Herzeloyden kint den Grâl erwarp, als im daz geordent was, dô in verworhte Anfortas. Von Provenz in tiuschiu lant diu rehten mære uns sint gesant unt dirre âventiure endes zil. niht mêr dâ von nû sprechen wil ich, Wolfram von Esschenbach, wan als dort der meister sprach. Sîniu kint, sîn hôch geslehte, hân ich iu benennet rehte, Parzivals, den ich hân brâht, dar sîn doch sælde het erdâht. Swes leben sich sô verendet, daz got niht wirt gepfendet der sêle durchs lîbes schulde, unt der doch der werlde hulde behalten kan mit werdecheit, daz ist ein nütziu arbeit. Guotiu wîp, hânt die sin, deste werder ich in bin, ob mir decheiniu guotes gan, sît ich diz mære volsprochen hân. ist daz durch ein wîp geschehen, diu muoz mir süezer worte jehen.

*m Ob von Trois meister Cristian disem mære unrehte het getân, des mac wol zürnen Kiot, der uns die rehten mær enbôt. endehaft giht der Provenzal, wie Herczeloiden kint den Grâl erwarp, als im geordent was, dô in verworhte Anfortas. von Profantz in tiutschiu lant diu rehten mære uns sint gesant und diser âventiur endes zil. niht mê dâ von nû sprechen wil ich, Wolfram von Eschenbach, wan als dort der meister sprach. sîniu kint, sîn hôch geslehte, hab ich iu benennet rehte, Parcifals, den ich hân brâht, dar sîn doch sælde het erdâht. wes leben sich sô verendet, daz got niht wirt gepfendet der sêle durch des lîbes schulde, und der doch der werlte hulde behalten kan mit werdicheit, daz ist ein nütziu arbeit. guotiu wîp, hânt die sin, deste werder ich in bin, ob mir dekeiniu guotes gan, sît ich diz mære volsprochen hân. ist daz durch ein wîp geschehen, diu muoz mir süezer worte jehen.

*G Obe von Troys meister Christan disem mære hât unreht getân, daz mac wol zürnen Kiot, der uns diu mære rehte enbôt. endehaft giht der Provenzal, wie Herzeloide kint den Grâl geêrbet, alse im geordent was, dô in verworhte Anfortas. von Provenze in tiutschiu lant diu rehten mære uns sint gesant unde dirre âventiure endezil. dâ von ich niht mêre sprechen wil, ich, Wolfram von Eschenbach, wan als dort der meister sprach. sîniu kint, sîn hôch geslehte, hân ich iu genennet rehte, Parzivals, den ich hân brâht, dar sîn doch sælde het erdâht. swes leben sich sô verendet, daz got niht wirt gepfendet diu sêle durch des lîbes schulde, unde er der werlde hulde gedienen kan mit werdecheit, daz ist ein nütziu arbeit. guotiu wîp unde hânt die sin, deste werder ich in bin, op mir deheiniu guotes gan, sît ich ditze mære volsprochen hân. unde ist daz durch ein wîp geschehen, diu muoz mir süezer mære jehen.

*T ob von Troys meister Cristian disen mæren hât unreht getân, daz mac wol zürnen Kyot, der uns die mære rehte enbôt. endehaft giht der Provenzal, wie Herzeloyden kint den Grâl erbete, als im geordent was, dô in verworhte Anfortas. von Provenze in tiuschiu lant die rehten mære uns sint gesant und dirre âventiure endes zil. dâ von ich nû niht mêr sprechen wil, ich, Wolfram von Eschebach, wan als dort der meister sprach. sîniu kint, sîn hôch geslehte, hân ich iu genennet rehte, Parcifals, den ich hân brâht, dar sîn doch sælde het erdâht. wes leben sich sô verendet, daz got niht wirt gepfendet der sêle durch lîbes schulde, und doch der werlde hulde gedienen kan mit werdecheit, daz ist ein nütziu arbeit. guotiu wîp, hânt die sin, deste werder ich in bin, ob mir dekeinez guotes gan, sît ich dise mære von in gesprochen hân. und ist daz durch ein wîp geschehen, diu muoz mir süezer mære jehen.