*D Daz was ê niht sô kreftec dâ. wir heizenz hie Indya; dort heizet ez Tribalibot. Feirefiz bî Cundrien enbôt sînem bruoder ûf Munsalvæsche wider, wie ez im was ergangen sider, daz Secundille verscheiden was. des vreute sich dô Anfortas, daz sîn swester âne strît was vrouwe über menegiu lant sô wît. Diu rehten mære iu komen sint umb diu vünf Frimutels kint, daz diu mit güeten würben unt wie ir zwei erstürben. daz eine was Schoysiane, vor gote diu valsches âne; diu ander Herzeloyde hiez, diu valscheit ûz ir herzen stiez. Sîn swert unt rîterlîchez leben hete Trevrizent ergeben an die süezen gotes minne unt nâch endelôsem gewinne. Der werde, clâre Anfortas manlîch bî kiuschem herzen was. ordenlîche er manege tjoste reit, durch den Grâl, niht durch diu wîp er streit. Loherangrin wuohs manlîch starc; diu zagheit sich an im barc. dô er sich rîterschaft versan, ins Grâles dienste er prîs gewan.

*m daz was ê niht sô kreftic dâ. wir heizen ez hie India; dort heizet ez Tribalibot. Ferefiz bî Condrien enbôt sînem bruoder ûf Muntsalvasche wider, wie ez im was ergangen sider, daz Secundille verscheiden was. des vrouwet sich dô Anfortas, daz sîn swester âne strît was vrowe über manic lant sô wît. diu rehten mære iu komen sint umb diu vünf Frimutels kint, daz diu mit güeten würben und wie ir zwei erstürben. daz ein was Schoisiane, vor gote diu valsches âne; diu ander Herczeloide hiez, diu valscheit ûz ir herze stiez. sîn swert und ritterlîchez leben het Trevrizende ergeben an die süezen gotes minne und nâch endelôsem gewinne. der werde, clâre Anfortas manlîch bî kiuschem herzen was. ordenlîch er manic juste reit, durch den Grâl, niht durch diu wîp er streit. Lohelangrin wuohs menlîch und starc; diu zagheit sich an im barc. dô er sich ritterschaft versan, des Grâles dienst er prîs gewan.

*G dazne was ê niht sô kreftic dâ. wir heizenz hie India; dort heizt ez Tribalibot. Feirafiz bî Gundrien enbôt sînem bruoder ze Muntsalvatsche wider, wiez im was ergangen sider, daz Secundille verscheiden was. des wart al trûric Anfortas, swie sîn swester âne strît wære vrouwe über manigiu lant sô wît. diu rehten mære iu komen sint umbe diu vünf Frimutels kint, waz diu mit guote erwürben unde wie ir zwei erstürben. daz eine was Schoysiane, diu süeze, valsches âne; diu ander Herzeloide hiez, diu valscheit ûz ir herzen stiez. sîn swert unde rîterlîchez leben hete Trevrizzent gegeben an die wâge in gotes minne nâch endelôsem gewinne. der clâre, süeze Anfortas manlîch bî kiuschem herzen was. ordenlîche er manige tjoste reit, durch den Grâl, niht durch diu wîp er streit. Loherangrin wuohs vast manlîch starc; diu zageheit sich an im barc. dô er sich rîterschaft versan, ins Grâles dienste er brîs gewan.

*T daz enwas ê niht sô kreftic dâ. wir heizen ez hie India; dort heizet ez Tribalibot. Ferefis bî Kundrien enbôt sîme bruoder zuo Munsalvasche wider, wie ez im was ergangen sider, daz Secundille verscheiden was. des wart al trûric Anfortas, wie sîne swester âne strît wære vrouwe über manec lant sô wît. diu rehten mære iu komen sint umb diu vünf Frimutells kint, daz diu mit guote würben und ir zwei erstürben. daz eine was Schosiane, diu süeze, valsches âne; diu ander Herzeloyde hiez, diu valscheit ûz ir herzen stiez. sîn swert und rîterlîchez leben hete Trefrizent gegeben an die gotes minne nâch endelôsem gewinne. der clâre, süeze Anfortas manlîch bî kiuschem herzen was. ordenlîch er manege jost reit, durch den Grâl er vil gestreit. Lohrangrin wuohs manlîch starc; diu zageheit sich an im barc. dô er sich rîterschaft versan, in des Grâles dienst er prîs gewan.