*D wan si sint mir alle sippe von dem Adames rippe. Doch wæne êt, Gahmuretes tât den hœhsten prîs dâ erworben hât." die anderen tæten rîterschaft mit sô bewander zornes kraft, daz siz wielken vaste unz an die naht. die inren heten die ûzern brâht mit strîte unz an ir poulûn, niwan der künec von Ascalun unt Morholt von Yrlant, durch die snüere in wære gerant. Dâ was gewunnen unt verlorn. genuoge heten schaden erkorn, die anderen prîs unt êre. nû ist zît, daz man si kêre von ein ander. niemen hie gesiht, sine werte der pfander liehtes niht. wer solde ouch vinsterlingen spiln? es mac die müeden doch beviln. Der vinster man vil gar vergaz, dô mîn hêr Gahmuret dort saz, als ez wære tac. des was ez niht. dâ wâren aber ungevüegiu lieht, von kleinen kerzen manec schoup geleit ûf ölboume loup. manec kulter rîche gestrecket vlîzeclîche, dâr vür manec teppech breit. diu küneginne an die snüere reit

*m wanne si sint mir alle sippe von dem Adames rippe. doch wæne ich, Gahmuretes tât den hœhesten prîs erworben hât." die anderen tâten ritterschaft mit sô bewanter zornes kraft, daz si ez wielken vaste in die naht. die inren heten die ûzern brâht mit strîte unz an ir pavelûn, niwan der künic von Ascalun und Morolt von Irlant, durch die snüere in wær gerant. †das† gewunnen und verlorn. genuoge heten schaden erkorn, die anderen prîs und êre. nû ist zît, daz man si kêre von ein ander. niemen hie gesiht, der pfender wert si liehtes niht. wer solte ouch vinsterlîche spiln? es mac die müeden gar beviln. Der vinster man vil gar vergaz, dô †mic† hêrre Gahmuret dort az, als ez wære tac. des enwas ez niht. dâ †wanne† aber ungevüegiu lieht, von kleinen kerzen manic schoup geleit ûf ölboumes loup. manic kulter rîche gestrecket vlîzeclîche, dâr vür manic teppech breit. diu künegîn an die snüere reit

*G si sint mir alle sippe von dem Adames rippe. doch wæne ich, Gahmuretes tât den hœhesten brîs behalten hât." Die anderen tâten rîterschaft mit sô getâner zornes kraft, daz siz wielken vaste unze in die naht. die inneren heten die ûzeren brâht mit zorne under diu pavelûn, wan der künic von Arragun unde Morolt von Yrlant, durch die snüere in wære gerant. dâ wart gewunnen unde verloren. genuoge heten schaden erkoren, die anderen brîs und êre. nû ist zît, daz man si kêre von ein ander. niemen dâ gesiht, sine wert der pfander liehtes niht. wer solt ouch vinsterlingen spilen? es moht die müeden doch bevilen. der vinster man vil gar vergaz, dâ mîn hêr Gahmuret dâ saz, als ez wære tac. des enwas ez niht. dâ wâren aber ungevüegiu lieht, von kleinen kerzen manic schoup geleit ûf ölboumîn loup, unde manic gulter rîche gestrecket vlîziclîche, dâ vür manec tepec breit. diu künigîn an die snüere reit

*T si sint mir alle sippe von Adames rippe. doch wænich, daz Gahmuretes tât den hœhesten prîs erworben hât." die anderen tâten rîterschaft mit sô gewanter zornes kraft, daz si ez vaste wielken unz in die naht. die innern heten die ûzern brâht mit strîte unz an ein pavelûn, wan der künec von Ascalun und Morolt von Irlant, durch die snüere in wære gerant. Dâ wart gewunnen und verlorn. genuoge heten schaden erkorn, die anderen prîs und êre. nû ist zît, daz man si kêre von ein ander. nieman dâ gesiht, sine wert der pfender liehtes niht. wer solte ouch vinsterlingen spiln? daz mohte den müeden wol beviln. der vinster man vil gar vergaz, dô mîn hêrre Gahmuret dort az, als ez wære tac. des enwas ez niht. dâ wâren aber ungevüegiu lieht, von kleinen kerzen manec schoup geleit ûf ölboumes loup, und manege kulter rîche gestrecket wunneclîche, dâ vür teppic breit. diu künegîn an die snüere reit