*D Nû diz was êt âne strît, daz hôrte oder spræche ze keiner zît iemen von schœnerem wîbe. si truoc ouch an ir lîbe pfellel, den ein künstec hant worhte, als in Sarant mit grôzem liste erdâht ê in der stat ze Thasme. Feirefiz Anschevin si brâhte, diu gap liehten schîn, mitten durch den palas. driu grôziu viwer gemachet was, lign âlôe des viwers smac. vierzec teppeche unt gesitze mêr dâ lac denne zeiner zît, dô Parzival ouch dâ vür sach tragen den Grâl. Ein gesiz vor ûz gehêrt was, dâ Feirefiz unt Anfortas bî dem wirte solde sitzen. Dô warp mit zühte witzen, swer dâ dienen wolde, sô der Grâl komen solde. ir habt gehôrt ê des genuoc, wie man in vür Anfortasen truoc; dem siht man nû gelîche tuon vür des werden Gahmuretes sun unt ouch vür Tampenteires kint. Juncvrouwen nû niht langer sint; ordenlîche si kômen über al, vünf unt zweinzec an der zal.

*m nû daz was eht âne strît, daz hôrte oder spræche zuo keiner zît ieman von schœnerem wîbe. si truoc ouch an ir lîbe pfelle, den ein künstic hant worht, als in Sarant mit grôzem list erdâht ê in der stat zuo Thasme. Ferefiz Anschevin si brâhte, si gap liehten schîn, mitten durch den palas. driu grôziu viur gemachet was, lingnum âlôe des viures smac. vierzic teppich und gesitz mê dâ lac dan zuo einer zît, dô Parcifal ouch dâ vür sach tragen den Grâl. ein gesiz vor ûz gehêret was, dâ Ferefiz und Anfortas bî dem wirte solte sitzen. dô warp mit zühtigen witzen, wer dâ dienen wolte, sô der Grâl komen solte. ir habt her gehôrt ê des genuoc, wie man in vür Anfortasen truoc; dem siht man nû glîche tuon vür des werden Gahmuretes sun und ouch vür Tampenteries kint. juncvrowen nû niht langer sint; ordenlîch si kômen überal, vünf und zweinzic an der zal.

*G Nû ditze was êt ân strît, daz hôrt ode spræch ze deheiner zît iemen von schœnerem wîbe. si het ouch an ir lîbe einen pfelle, den ein künstec hant worhte, als in Sarant mit grôzen listen erdâht ê in der stat ze Tasme. Feirafiz Anschevin si brâht, diu gap liehten schîn, enmitten durch den palas. driu grôziu viwer gemachet was, lign âlôe des viwers smac. vierzic tepch unde mê dâ lac danne zeinen zîten, dô Parzival ouch dâ vür sach tragen den Grâl. ein gesitze vor ûz gehêrt was, dâ Feirafiz unde Anfortas bî dem wirte solden sitzen. dô warp mit zühte witzen, swer dâ dienen wolde, sô der Grâl komen solde. ir habet gehôrt des genuoc, wie man in vür Anfortasen truoc; dem siht man nû gelîche tuon vür des werden Gahmuretes sun unde ouch vür Tampunteires kint. juncvrouwen nû niht lenger sint; ordenlîch die kômen über al, vünf unde zweinzic an der zal.

*T Nû diz was âne strît, daz hôrte oder spræche zuo der zît ieman von schœnereme wîbe. si hete ouch an ir lîbe einen pfelle, den ein künstigiu hant worhte, als in Sarant mit grôzem liste erdâhte ê in der stat zuo Tasme. Ferefis Anschevin si brâhte, diu gap liehten schîn, enmitten durch den palas. driu grôziu viur gemachet was, lign âlôe des viures smac. vierzic teppich und mê gesitze dâ lac dan zuo einen zîten, dô Parcifal ouch dâ vür tragen sach den Grâl. ein gesitze dâ vor ûz gehêrt was, dâ Ferefis und Anfortas bî dem wirte solten sitzen. dô warp mit zühten witzen, wer dâ dienen wolte, sô der Grâl komen solte. ir hât gehôret des genuoc, wie man in vür Anfortassen truoc; dem siht man nû glîche tuon vür des werden Gahmuretes suon und ouch vür Tampunteres kint. juncvrouwen nû niht langer sint; ordenlîche die kâmen über al, vünfe und zwênzic kâmen an der zal.