*D Feirefiz si vuorte mit der hant, dô si des wirtes muomen vant, Repansen de Schoye, stên. dâ muose küssens vil ergên. Dar zuo ir munt was ê sô rôt; der leit von küssen nû die nôt, daz ez mich müet unt ist mir leit, daz ich niht hân solhe arbeit vür si. wand si kom müediu zin. juncvrouwen vuorten ir vrouwen hin. Die rîter in dem palas beliben, der wol gekerzet was, die harte liehte brunnen. dô wart mit zuht begunnen gereitschaft gein dem Grâle. den truog man zallem mâle der diet niht durch schouwen vür, niht wan ze hôchgezîte kür. Durch daz si trôstes wânden, dô si sich vreuden ânden des âbents umbe daz bluotige sper, dô wart der Grâl durch helfe ger vür getragen an der selben zît. Parcifal si liez in sorgen sît. mit vreude er wirt nû vür getragen; ir sorge ist under gar geslagen. Dô diu künegîn ir reisegewant ab gezôch unt sich gebant, si kom, als ez ir wol gezam; Feirefiz an einer tür si nam.

*m Ferefiz vuorte si mit der hant, daz si des wirtes muomen vant, Repanse de schoyen, stên. dâ muoste küssens vil ergên. dar zuo ir munt was ê sô rôt; der leit von küssen nû die nôt, daz ez mich müejet und ist mir leit, daz ich niht hab solich arbeit vür si. wan si kam müediu zuo in. die juncvrowen vuorten ir vrowen hin. die ritter in dem palas beliben, der wol gekerzet was, die harte liehte brunnen. dô wart mit zuht begunnen bereitschaft gegen dem Grâl. den truoc man zuo allem mâl der diet niht durch schouwen vür, niht wan zer hôchzîte kür. durch daz si trôstes wânden, dô si sich vröuden ânden des âbendes umb daz bluotige sper, dô wart der Grâl durch helfe ger vür getragen an der selben zît. Parcifal si liez in sorgen sît. mit vröude er nû wirt vür getragen; ir sorge ist gar hin dan geslagen. Dô diu künigîn ir reisegewant ab gezôch und sich gebant, si kam, als irz wol gezam; Ferefiz an einer tür si nam.

*G Feirafiz si vuort mit der hant, dâ si des wirtes muomen vant, Urrepanse de schoyen, stên. vil küssens muose dâ ergên. dar zuo ir munt was sô rôt; der leit von küssen nû die nôt, daz ez mich müet unde ist mir leit, daz ich niht hân die arbeit vür si. wan si kom müediu zin. juncvrouwen vuorten ir vrouwen hin. die rîter ûf dem palas beliben, der wol gekerzet was, die harte lieht brunnen. dâ wart mit zühten begunnen bereitschaft geinm Grâl. den truoc man zallem mâle der diet niht durch schouwen vür, niwan durch hôchzîte kür. durch daz si trôstes wânden, dô si sich vröuden ânden des âbendes umbe daz bluotic sper, dâ wart der Grâl durch helfe ger vür getragen an der selben zît. Parzival si lie in ruowen sît. mit vröude er wart nû vür getragen; ir riwe ist under gar geslagen. dô diu küniginne ir reisegewant abe gezôch unde ir gebant, si kom, als ez ir wol gezam; Feirafiz in einer tür si nam.

*T Ferefis vuorte si mit der hant, dâ si des wirtes muomen vant, Repansen de joien, stên. vil küssens muose dâ ergên. dar zuo ir munt was sô rôt; der leit von küssen nû die nôt, daz ez mich müet und ist mir leit, daz ich niht hân die arbeit vür si. wan si kam müediu zuo in. juncvrouwen vuorten ir vrouwen hin. die rîter ûf dem palas bliben, der wol gekerzet was, die harte liehte brunnen. dô wart mit zuht begunnen gereitschaft gein dem Grâle. den truoc man zuo allem mâle der diet niht durch schouwen vür, niht wan durch hôchgezîte kür. durch daz si trôstes wânden, daz si sich vreuden ânden des âbendes umb daz bluotic sper, dô wart der Grâl durch helfe ger vür getragen an der selben zît. Parcifal si liez in sorgen sît. mit vreuden er wart nû vür getragen; riuwe ist under gar geslagen. dô diu küneginne ir reisegewant abe gezôch und ir gebant, si kam, als ez ir wol gezam; Ferefis an einer tür si nam.