*D Si vunden volkes ungezalt, manegen wünneclîchen rîter alt, edeliu kint, vil scharjante. die trûrigen mahinante dirre künfte vrô wol mohten sîn. Feirefiz Anschevin unt Parzival, si bêde, vor dem palase an der grêde si wurden wol enpfangen. in den palas wart gegangen. Dâ lac nâch ir gewonheit hundert sinwelle teppech breit, ûf ieslîchem ein pflûmît unt ein kulter lanc von samît. Vuoren die zwêne mit witzen, si mohten etswâ dâ sitzen, unz manz harnasch von in enpfienc. ein kamerære dar nâher gienc; der brâht in kleider rîche, den beiden al gelîche. Si sâzen, swaz dâ rîter was. man truoc von golde - ez was niht glas - vür si manegen tiwern schâl. Feirefiz unt Parzival trunken und giengen dan zAnfortase, dem trûrigem man. Ir habt ê vernomen, daz der lente unt daz er selten saz unt wie sîn bette gehêrt was. dise zwêne enpfienc dô Anfortas

*m si vunden volkes ungezalt, manigen wünneclîchen ritter alt, edeliu kint, vil sarjante. die trûrigen mahinante diser geste vrô mohten sîn. Ferefiz Anschevin und Parcifal, si bêde, vor dem palas vor der grêde wurden wol enpfangen. in den palas wart gegangen. dâ lac nâch ir gewonheit hundert sinewel teppich breit, ûf ieglîchem ein plûmît und ein kulter lanc von samît. vuoren die zwêne mit witzen, si mohten etwâ sitzen, unz man daz harnasch von in enpfienc. ein kamerer dâ nâher gienc; der brâht in kleider rîch, den beiden algelîch. si sâzen, waz dâ ritter was. man truoc von golde - ez was niht glas - vür si manigen tiuren schâl. Ferefiz und Parcifal trunken und giengen dan zuo Anfortasse, dem trûrigen man. ir habt wol ê vernomen, daz der lente und selten saz und wie sîn bette gehêret was. dise zwên enpfienc dô Anfortas

*G dâ vunden si volkes ungezalt, manigen junclîchen rîter alt, edeliu kint, vil sarjande, die truogen mahinande. Dirre künfte wol vrô mohte sîn Feirafiz Anschevin unde Parzival, si bêde. vor dem palas an der grêde si wurden wol enpfangen. ûf den palas wart gegangen. dâ lac nâch ir gewonheit sinwel hundert tepech breit, ûf ieslîchem ein pflûmît unde ein kulter lanc von samît. vuoren die zwêne mit witzen, si mohten wol gesitzen, unze manz harnasch von in enpfienc. ein kamerære dar nâher gienc; der brâhte in kleider rîche, den zwein algelîche. si sâzen, swaz dâ rîter was. man truoc von golde - ez enwas niht glas - vür si manige tiure schâl. Feirafiz unde Parzival trunken unde giengen dan ze Anfortas, dem trûrigen man. ir habt wol gehôrt daz, daz er lente unde niht ensaz unde wie sîn bette gehêrt was. die zwêne enpfienc dô Anfortas

*T dâ vunden si volkes ungezalt, manegen wünneclîchen rîter alt, edeliu kint, vil sarjande. die trûrigen mahinande dirre künfte wol vrô mohten sîn. Ferefis Anschevin und Parcifal, si beide, vor dem palas an der heide si wurden wol enpfangen. ûf den palas wart gegangen. dâ lac nâch ir gewonheit sinewel hundert teppich breit. ûf ieclîchem ein plûmît lac und ein kulter von samît. vuoren die zwêne mit witzen, si mohten etswâ sitzen, unz man daz harnasch von in enpfienc. ein kamerære dar nâher gienc; der brâhte in kleider rîche, den zwein allen glîche. Si sâzen ouch, waz dâ rîter was. man truoc von golde - ez enwas niht glas - vür si manege tiure schâl. Ferefis und Parcifal trunken und giengen dan zuo Anfortas, dem trûrigen man. ir habet doch wol gehœret daz, daz er lente und selten saz und wie sîn bette gehêret was. die zwêne enpfienc dô Anfortas