*D Anfortas unt die sîne noch vor jâmer dolten pîne. ir triwe liez in in der nôt. dicke er warb umbe si den tôt; der wære ouch schiere an im geschehen, wan daz si in dicke liezen sehen den Grâl unts Grâles kraft. er sprach zuo sîner rîterschaft: "ich weiz wol, pflæget ir triwe, sô erbarmet iuch mîn riwe. wie lange sol diz an mir wern? welt ir iu selben rehtes gern, sô müezet ir gelten mich vor gote. ich stuont ie gern ziwerm gebote, sît ich von êrste wâpen truoc. ich hân engolten des genuoc, ob mir ie unprîs geschach unt ob daz iwer keiner sach. Sît ir vor untriwen bewart, sô lœset mich durch des helmes art unt durch des schildes orden. ir sît dicke innen worden, ob ez iu niht versmâhte, daz ich diu beidiu brâhte unverzagt ûf rîterlîchiu werc. ich hân tal und berc mit maneger tjost überzilt unt mit dem swerte alsô gespilt, daz es die vîende an mir verdrôz, swie wênec ich des gein iu genôz.

*m Anfortas und die sîne vor jâmer dolten pîne. ir triuwe liez in in der nôt. dicke er warp umb si den tôt; der wær ouch schier an im beschehen, wan daz si in dicke liezen sehen den Grâl und des Grâles kraft. er sprach zuo sîner ritterschaft: "ich weiz wol, pflægt ir triuwe, sô erbarmet iuch mîn riuwe. wie lange sol diz an mir wern? welt ir iu selber rehtes gern, sô müezet ir gelten mich vor got. ich stuont ê gern zuo iuwerm gebot, sît ich von êrste wâpen truoc. ich hân engolten des genuoc, ob mir ie unprîs geschach und ob daz iuwer keiner sach. sît ir vor untriuwe bewart, sô lœset mich durch des helmes art und durch des schiltes orden. ir sît dicke innen worden, ob ez iu niht versmâhte, daz ich diu beidiu brâhte unverzagt ûf ritterlîchiu werc. ich hân tal und berc mit maniger just überzilt und mit dem swert alsô gespilt, daz es die vîende an mir verdrôz, wênic ich des gegen iu genôz.

*G Anfortas unde die sîne von jâmer dolten pîne. ir triwe liez in in der nôt. vil dicke er warp datze in den tôt; der wære ouch schiere an im geschehen, wan daz sin dicke liezen sehen den Grâl unde des Grâles kraft. er sprach ze sîner rîterschaft: "ich weiz wol, pflæget ir triwe, sô erbarmet iuch mîn riwe. wie lange sol ditze ane mir wern? welt ir iu selben rehtes gern, sô müezt ir gelten mich vor got. ich stuont ie gerne ze iurem gebot, sît ich von êrste wâpen truoc. ich hân engolten des genuoc, op mir ie unbrîs geschach unde op daz iwer deheiner sach. sît ir von untriwen bewart, sô lœset mich durch des himels art unde durch des himels orden. ir sît wol innen worden, ob ez iu niht versmâhte, daz ich diu bêde brâhte unverzaget ûf rîterlîchiu werc. ich hân tal unde berc mit maniger tjost überzilt unde mit dem swerte alsô gespilt, daz es die vînde an mir verdrôz, swie kleine ich des gein iu genôz.

*T Anfortas und die sîne von jâmer dolten pîne. ir triuwe liez in in der nôt. vil dicke er warp durch in den tôt; der wære ouch an im schiere geschehen, wan daz si in dicke liezen sehen den Grâl und des Grâles kraft. er sprach zuo sîner rîterschaft: "ich weiz wol, pflæget ir triuwe, sô erbarmet iuch mîn riuwe. wie lange sol diz an mir wern? wolt ir iu selber rehtes gern, sô müezet ir mich gelten vor gote. ich stuont ie gerne zuo iuwerme gebote, sît ich von êrst wâpen truoc. ich hân engolten des genuoc, ob mir ie unprîs geschach und ob daz iuwer dekeiner sach. sît ir vor untriuwe bewart, sô lœset mich von des helmes art und durch des schiltes orden. ir sît dicke innen worden, ob ez iu niht versmâhte, daz ich diu beide brâhte unverzaget ûf rîterlîchiu werc. ich hân tal und berc mit maneger jost überzilt und mit dem swerte alsô gespilt, daz es die vînde an mich verdrôz, wie kleine ich des gein iu genôz.