*D Ieslîch vrouwe hete prîs, diu dâ saz bî ir amîs. maneger durch gerndes herzen rât gedient was mit hôher tât. Feirefiz unt Parzival mit prüeven heten süeze wal, jene vrouwen unt dise. man gesach ûf acker noch ûf wise liehter vel noch rœter munt sô manegen nie ze keiner stunt, alsô man an dem ringe vant. des wart dem heiden vreude erkant. Wol dem künfteclîchem tage, geêrt sî ir süezen mære sage, als von ir munde wart vernomen! man sach eine juncvrouwen komen, ir kleider wâren tiwer unt wol gesniten, kostebære nâch Franzoyser siten, Ir kappe, ein rîcher samît. noch swerzer denn ein gênît; arabesch golt gap drûffe schîn, wol geworht manec turteltiubelîn nâch dem insigel des Grâles. si wart des selben mâles beschouwet vil durch wunders ger. nû lât si heistieren her. Ir gebende was hôch und blanc; mit manegem dickem umbevanc was ir antlütze verdecket unt niht ze sehen enblecket.

*m ieglîch vrowe het prîs, diu dâ saz bî ir amîs. maniger durch gerndes herzen rât gedienet was mit hôher tât. Ferefiz und Parcifal mit brüeven heten süeze wal, jene vrowen und dise. man gesach ûf acker noch wise liehter vel noch rœter munt sô manigen nie zuo keiner stunt, als man an dem ringe vant. des wart dem heiden vröude erkant. Wol dem künfteclîchen tage, geêret sî ir süezen mære sage, als von ir minne wirt vernomen! man sach ein juncvrowe komen, ir kleider wâren tiur und wol gesniten, kostbær nâch Franzoser siten, ir kappe, ein rîcher samît. noch swarzer dan ein gênît; arabesch golt gap dâr ûf schîn, wol geworht manic turteltiubelîn nâch dem ingesigel des Grâles. si wart des selben mâles geschouwet vil durch wunders ger. nû lât si heistieren her. ir gebende was hôch und lanc; mit manigem dicken umbevanc was ir antlütz verdecket und niht zuo sehen enblecket.

*G Etslîch vrouwe het brîs, diu dâ saz bî ir amîs, manigiu durch gerndes herzen rât. gedient wart mit hôher tât. Feirafiz unde Parzival mit prüeven heten süeze wal, jene vrouwen unde dise. man sach ûf acker unde ûf wise lieht vel noch rôten munt sô manigen nie ze deheiner stunt, als man an dem ringe vant. des wart dem heiden vröude erkant. wol der künfteclîchen sage, geêrt sît ir süezen sumer tage, als von ir munde wart vernomen! man sach eine juncvrouwen komen in kleidern tiure, wol gesniten, kostbære nâch Franzoiser siten, ir kappe, ein rîcher samît. noch swarzer danne timît; arabesch golt gap drûfe schîn, wol geworht manic turteltiubelîn nâch dem insigel des Grâles. si wart des selben mâles vil geschouwet durch wunders ger. nû lât si heistieren her. ir gebende was hôch unde blanc; mit manigem dicken umbevanc was ir antlütze bedeckt unde niht ze sehene enbleckt.

*T etslîchiu vrouwe hete prîs, diu dâ saz bî ir amîs. maneger durch gerndes herzen rât gedienet hât mit werder tât. Ferefis und Parcifal mit prüeven heten süeze wal, jene vrouwe und dise. man sach ûf acker noch ûf wise liehter vel noch rœter munt sô manegen nie zuo keiner stunt, als man an dem ringe vant. des wart dem heiden vreude erkant. wol dem künfteclîchen tage, geêret sî ir süezen mære sage, als von ir munde wart vernomen! man sach eine junge vrouwen komen in kleidern tiure und wol gesniten, kostbære nâch Franzoyser siten, ir kappe, ein rîcher samît. noch swarzer dan ein gênît; arabesch golt gap dâr ûf schîn, wol gewirket manec turteltiubelîn nâch dem ingesigel des Grâles. si wart des selben mâles vil beschouwet durch wunders ger. nû lât si heistieren her. ir gebende was hôch und lanc; mit manegem dicken umbevanc was ir antlitze bedecket und niht zuo sehene enblecket.