*D Ez ist selten worden naht, wan deiz der sunnen ist geslaht, sine bræhte ie den tac dâr nâch. al daz selbe ouch dâ geschach; er schein in süeze, lûter, clâr. dâ streich manec ritter wol sîn hâr, dâr ûf blüemîniu schapel. manec ungevelschet vrouwen vel man dâ bî rôten münden sach, ob Kyot die wârheit sprach. Ritter und vrouwen truogen gewant, niht gesniten in eime lant; wîbe gebende, nider, hôch, als ez nâch ir lantwîse zôch. dâ was ein wît gesamentiu diet, durch daz ir site sich underschiet: Swelch vrouwe was sunder amîs, diu getorste niht decheinen gewîs über tavelrunde komen. het si dienst ûf ir lôn genomen unt gap si lônes sicherheit, an tavelrunde rinc si reit. die andern muosenz lâzen; in ir herbergen si sâzen. Dô Artus messe hete vernomen, man sach Gramoflanzen komen unt den herzogen von Gowerzin unt Floranden, den gesellen sîn. die drî gerten sunder pfliht über tavelrunder.

*m Ez ist selten worden naht, wan ez der sunnen ist geslaht, si brâht ie den tac dâr nâch. al daz selbe ouch dâ geschach; er schein in süeze, lûter, clâr. dô streich manic ritter wol sîn hâr, dâr ûf ein blüemîniu schapel. manic ungevelschet vel man dâ bî rôtem munde sach, ob Kiot die wârheit sprach. ritter und vrowen truogen gewant, niht gesniten in einem lant; wîbe gebende, nider und hôch, als ez nâch ir lantwîse zôch. dâ was ein wît gesamet diet, durch daz ir sit si underschiet: welich vrowe dâ was sunder amîs, diu getorste niht dekein wîs über tavelrunde komen. het si dienst ûf ir lôn genomen und gap si lônes sicherheit, an tavelrunde rinc si reit. die andern muostenz lâzen; in ir herberge si sâzen. dô Artus messe het vernomen, man sach Gramolanzen komen, den herzogen von Gowertzin und Floranden, den gesellen sîn. die drî gerten besunder pfliht über tavelrunder.

*G ez ist selten worden naht, wan ez der sunne ist geslaht, sine bræhte ie den tac dâr nâch. al daz selbe ouch dâ geschach; er schein in süeze, lûter, clâr. dâ streich manic rîter wol sîn hâr, dâr ûf bluomen schapel. manic ungevelschet vrouwen vel man dâ bî rôtem munde sach, obe Kiot die wârheit sprach. rîter unde vrouwen truogen gewant, niht gesniten in einem lant; vrouwen gebende, nider, hôch, als ez nâch ir lantwîse zôch. ez was ein wît gesament diet, durch daz ir site sich underschiet: swelch vrouwe was sunder amîs, diu getorste niht deheine wîs über tavelrunder komen. het si dienst nâch ir lône genomen unde gap ir lônes sicherheit, an tavelrunder si reit. die andern muosenz lâzen; in ir herberge si sâzen. dô Artus messe het vernomen, man sach Gramoflanze komen unde den herzogen von Gowerzin unde Floranden, den gesellen sîn. die zwêne gerten sunder pfliht über tavelrunder.

*T Ez ist worden selten naht, wan ez der sunnen ist geslaht, si enbræhte ie den tac dâr nâch. al daz selbe al dâ geschach; er schein in süeze, lûter, clâr. dô streich manec rîter wol sîn hâr, dâr ûf ein bluomen schapel. manec ungevelschet vrouwen vel man dâ bî rôtem munde sach, ob Kyot die wârheit sprach. rîter und vrouwen truogen gewant, niht gesniten in eime lant; vrouwen gebende, nider, hôch, als ez nâch ir lantwîse zôch. daz was ein wîter gesamet diet, durch daz ir site sich underschiet: welchiu vrouwe was sunder amîs, diu getorste niht dekeine wîs über tavelrunder komen. hete si dienst ûf ir lôn genomen und gap si ir lônes sicherheit, an tavelrunder rinc si reit. die andern muosen ez lâzen; in ir herberge si sâzen. Dô Artus hete messe vernomen, man sach Gramoflanzen komen und den herzogen von Gauwerzin und Floranden, den gesellen sîn. die drîe riten sunder pflihte über tavelrunder.