*D Der heiden was von herzen vrô, daz sînes bruoder prîs alsô stuont, daz sîn hant erstreit sô manege hôhe werdecheit. des dankter im sêre; er hetes selbe ouch êre. Innen des hiez tragen Gawan, als ez unwizzende wære getân, des heidens zimierde in den rinc. si prüevetenz dâ vür hôhiu dinc. rîter und vrouwen begunden alle schouwen den wâpenroc, den schilt, daz kursît. der helm was zenge noch ze wît. Si prîsten al gemeine die tiwern edeln steine, die dran verwieret lâgen. niemen darf mich vrâgen von ir arde, wie si wæren, die lîhten unt die swæren. Iuch hete baz bescheiden des Eraclius oder Ercules unt der Krieche Alexander unt dennoch ein ander unt der wîse Pictagoras, der ein astronomierre was unt sô wîs âne strît, niemen sît Adames zît möhte im glîchen sin getragen; der kunde wol von steinen sagen.

*m Der heiden was von herzen vrô, daz sînes bruoder prîs alsô stuont, daz sîn hant erstreit sô manige hôhe wirdicheit. des dankte er im sêre; er het es selbe ouch êre. innen des hiez tragen Gawan, als ez unwizzende wær getân, des heidens zimierde in den rinc. daz brüeften si dâ vür hôhiu dinc. ritter und vrowen begunden alle schouwen den wâpenroc, den schilt, daz kursît. der helm was zuo enge noch zuo wît. si prîsten alle gemeine die edeln tiuren steine, die dâran verwieret lâgen. niemen darf mich vrâgen von ir arde, wie si wæren, die liehten und die swæren. iuch het baz bescheiden des Eraclius oder Hercules und der Krieche Alexander und dannoch ein ander, der wîse Pictagoras, der ein astronomierre was und ouch sô wîse âne strît, daz nieman sît Adames zît möhte im glîchen sin getragen; der kunde wol von steinen sagen.

*G der heiden was von herzen vrô, daz sînes bruoder dinc alsô stuont, daz sîn hant erstreit sô manige hôhe werdecheit. des danket er im sêre; er hets selbe ouch êre. innen des hiez tragen Gawan, als ez unwizzende wære getân, des heidens zimierde in den rinc. si prüeveten si dâ vür grôziu dinc. rîter unde vrouwen begunden alle schouwen den wâpenroc, den helm, den schilt, daz kursît. der helm was zenge noch ze wît. si brîsten algemeine die tiuren edeln steine, die dran verwiert lâgen. niemen darf mich vrâgen von ir art, wie si wæren, die liehten unde die swæren. iuch het baz bescheiden des Eraculis oder Ercules unde der Krieche Alexander unde dannoch ein ander, der wîse Pitagoras, der ein astronomierre was unde sus sô wîse âne strît, niemen sît Adames zît mohte im gelîchen sin getragen; er kunde baz von sternen sagen.

*T Der heiden was von herzen vrô, daz sînes bruoder dinc alsô stuont, daz sîn hant erstreit sô manege hôhe wirdecheit. des danket er im sêre; er het es selber ouch êre. indes hiez tragen Gawan, als ez unwizzende wære getân, des heidens zimierde in den rinc. si prüeveten ez vür grôziu dinc. rîter und vrouwen begunden alle schouwen den wâpenroc, den schilt, daz kursît. der helm was zuo enge noch zuo wît. si prîsten alle gemeine die tiuren edelen steine, die dran verwieret lâgen. nieman darf mich vrâgen von ir arde, wie si wæren, die lîhten und die swæren. iuch hete baz bescheiden des Eraclius oder Ercules und der Krieche Alexander und dannoch ein ander, der wîse Pictagoras, der ein astronomierre was und sus sô wîse âne strît, nieman sît Adames zît moht im gelîchen sin tragen; der kunde baz von steinen sagen.