*D ich vüere sô kreftigez her, Troyære lantwer unt jene, die si besâzen, müesen rûmen mir die strâzen. ob si beidenthalp noch lebten und strîtes gein mir strebten, si möhten siges niht erholn, si müesen schumpfentiure doln von mir unt von den mînen. ich hân in manegen pînen bejagt mit rîterlîcher tât, daz mîn nû genâde hât diu küneginne Secundille. swes diu gert, daz ist mîn wille. Si hât gesetzet mir mîn leben: si hiez mich milteclîche geben unt guote rîter an mich nemen; des solte mich durch si gezemen. Daz ist alsô ergangen: mit schilde bevangen ist zingesinde mir benant manec rîter wert erkant. Dâ engein ir minne ist mîn lôn. ich trage ein ecidemôn ûf dem schilde, als si mir gebôt. swâ ich sider kom in nôt, zehant sô ich an si dâhte, ir minne helfe brâhte. diu was mir bezzer trôstes wer denne mîn got Jupiter."

*m ich vüer sô kreftigez her, daz Troiere lantwer und jene, die si besâzen, müesten rûmen mir die strâzen. ob si beidenthalp noch lebeten und strîtes gegen mir strebeten, si möhten strîtes niht erholn, si müesten schumpfentiure doln von mir und den mînen. ich hân in manigen pînen bejaget mit ritterlîcher tât, daz mîn nû gnâde hât diu künigîn Secundille. waz diu gert, daz ist mîn wille. si het gesetzet mir mîn leben: si hiez mich milteclîchen geben und guote ritter an mich nemen; des solte mich durch si gezemen. daz ist alsô ergangen: mit schilte bevangen ist zingesinde mir benant manic rîter wert erkant. dâ gegen ir minne ist mîn lôn. ich trage ein ecidemôn ûf dem schilt, als si mir gebôt. wâ ich sider kam in nôt, zuohant sô ich an si gedâht, ir minne helfe brâht. diu was mir bezzer trôstes wer dan mîn got, hêr Jupiter."

*G Ich vüere sô kreftigez her, daz Troiære lantwer unde jene, die si besâzen, müesen rûmen mir die strâzen. op si bêdenthalp noch lebten unde strîtes gein mir strebten, sine möhten siges niht erholen, si müesen schumpfentiure dolen von mir unde von den mînen. ich hân in manigen pînen bejaget mit rîterlîcher tât, daz mîn nû gnâde hât diu künigîn Secundille. swes diu gert, daz ist mîn wille. si hât gesetzet mir mîn leben: si hiez mich milteclîchen geben unde guote rîter ane mich nemen; des solde mich durch si gezemen. daz ist alsô ergangen: mit schilte bevangen ist ze ingesinde mir benant manic rîter wert erkant. dâ engêne ir minne ist mîn lôn. ich trage ein ecidemôn ûf dem schilte, als si mir gebôt. swâ ich sider kom in nôt, zehant sô ich an si gedâhte, ir minne mir helfe brâhte. diu was mir bezzer strîtes wer danne mîn got Juppiter."

*T ich vüere sô kreftigez her, Trojære lantwere und jene, die si besâzen, müesen rûmen mir die strâzen. ob si beidenthalp noch lebeten und strîtes gein mir strebeten, si enmöhten siges niht erholn, si müesen schumpfentiure doln von mir und von den mînen. ich hân in manegen pînen bejaget mit rîterlîcher tât, daz mîn nû genâde hât diu künegîn Secundille. wes diu gert, daz ist mîn wille. si hât gesetzet mir mîn leben: si hiez mich miltlîche geben und guote rîter an mich nemen; des solte mich durch si gezemen. daz ist alsô ergangen: mit slehte bevangen ist daz ingesinde mir benant, manec rîter wert erkant. dâ gein ir minne ist mîn lôn. ich trage ein ecidemôn ûf dem schilte, als si gebôt. wâ ich sît kam in nôt, zehant sô ich an si gedâhte, ir minne mir helfe brâhte. diu was mir bezzer strîtes wer danne mîn got Jupiter."