*D Der heiden jach vür werdiu dinc. sus reit an Gawans rinc Artus mit sînem wîbe unt mit manegem clârem lîbe, mit rîtern unt mit vrouwen. der heiden mohte schouwen, daz ouch dâ liute wâren, junc mit solhen jâren, daz si pflâgen varwe glanz. Dô was der künec Gramoflanz dennoch in Artuses pflege. dâ reit ouch ûf dem selben wege Itonje, sîn amîe, diu süeze valsches vrîe. Dô erbeizte der tavelrunde schar mit maneger vrouwen wol gevar. Ginover liez Itonje ir neven, den heiden, küssen ê. si selbe dô dar nâher gienc, Feirefizen si mit kusse enpfienc. Artus unt ouch Gramoflanz mit getriulîcher liebe ganz enpfiengen disen heiden. dâ wart im von in beiden mit dienste erboten êre, unt sîner mâge mêre im tâten guoten willen schîn. Feirefiz Anschevin was dô ze guoten vriwenden komen; daz het er schiere an in vernomen.

*m der heiden jach vür werdiu dinc. sus reit an Gawanes rinc Artus mit sînem wîbe und manigem clâren lîbe, mit rittern und vrowen. der heiden mohte schouwen, daz ouch dâ liute wâren, junc von solichen jâren, dô si pflâgen varwe ganz. dâ was der künic Gramolanz dannoch in Artuses pflege. dô reit ouch ûf dem selben wege Ithonie, sîn amîe, diu süeze valsches vrîe. dô erbeizte der tavelrunde schar mit maniger vrowen wol gevar. Ginover hiez Ithonie ir neven, den heiden, küssen ê. si selbe, diu dar nâher gienc, Ferefizen si mit kusse enpfienc. Artus und Gramolanz mit getriulîcher liebe ganz enpfiengen disen heiden. dô wart im von in beiden mit dienst erboten êre, und sîner mâge mêre im tâten guoten willen schîn. Ferefiz Anschevin was dô zuo guoten vriunden komen; daz het er schier an in vernomen.

*G Der heiden jach vür rîchiu dinc. sus reit an Gawans rinc Artus mit sînem wîbe, mit manigem clâren lîbe, mit rîtern unde mit vrouwen. der heiden mohte schouwen, daz ouch dâ liute wâren, junc mit solhen jâren, daz si pflâgen varwe glanz. dô was der künic Gramoflanz dannoch in Artuses pflege. dô reit ouch ûf dem selben wege Itonie, sîn amîe, diu süeze valsches vrîe. dô erbeizte der tavelrunder schar mit maniger vrouwen lieht gevar. Schinover liez Itonie ir neven, den heiden, küssen ê. si selbe dô dar nâher gienc, Feirafiz si mit kusse enpfienc. Artus unde Gramoflanz mit getriulîcher liebe ganz enpfiengen disen heiden. dô wart im von in beiden mit dienst erboten êre, unde sîner mâge mêre im tâten guoten willen schîn. Feirafiz Anschevin was dâ ze guoten vriunden komen; daz het er schiere an in vernomen.

*T der heiden jach vür werdiu dinc. sus reit an Gawanes rinc Artus mit sîme wîbe, mit manegem clâren lîbe, mit rîtern und mit vrouwen. der heiden mohte schouwen, daz ouch dâ liute wâren, junc mit solichen jâren, daz si pflâgen varwen glanz. dô was der künec Gramoflanz dannoch in Artuses pflege. dô reit doch ûf dem selben wege Itonie, sîniu amîe, diu süeze valsches vrîe. Dô erbeizte der tavelrunder schar mit maneger vrouwen lieht gevar. Gynover liez Itonie ir neven, den heiden, küssen ê. si selbe dô dar nâher gienc, Ferefisen si mit kusse enpfienc. Artus und Gramoflanz, mit triuwelîcher liebe ganz enpfiengen si den heiden. dô wart im von in beiden mit dienste erboten êre, und sîner mâge mêre im tâten guoten willen schîn. Ferefis Anschevin was dô zuo guoten vriunden komen; daz het er schiere an in vernomen.