*D Der von Tribalibot Jupiter, sînen got, mit worten êrte manegen wîs. er gab ouch vil hôhen prîs sîner gotinne Juno, daz si daz weter vuogte sô, dâ mit er und al sîn her gein dem lande ûf dem mer lantveste nâmen, dâ si zein ander kâmen. Anderstunt si nider sâzen. die bêde des niht vergâzen, sine büten ein ander êre. der heiden sprach dô mêre: "Ich wil lâzen dir zwei rîchiu lant dienstlîchen immer dîner hant, diu mîn vater unt der dîne erwarp, dô der künec Isenhart erstarp, Zazamanc unt Azagouc. sîn manheit dâ niemen trouc, wan daz er lie verweiset mich. gein mînem vater der gerich ist mînhalp noch unverkorn. sîn wîp, von der ich wart geborn, durch minne ein sterben nâch im kôs, dô si minne an im verlôs. Ich sæhe doch gern den selben man; mir ist ze wizzene getân, daz nie bezzer rîter enwart; nâch im ist kostenlîch mîn vart."

*m der von Tribalibot Jupitern, sînen got, mit worten êrte manige wîs. er gap ouch vil hôhen prîs sîner gotîn Juno, daz si daz wetter vuogte sô, dâ mit er und sîn her gegen dem lande und ûf dem mer die lantveste nâmen, daz si zuo ein ander kâmen. anderstunt si nider sâzen. die beide niht vergâzen, si büten ein ander êre. der heiden sprach dô mêre: "ich wil lâzen dir zwei rîchiu lant dienstlîchen iemer dîner hant, diu mîn vater und der dîne erwarp, dô der künic Ysenhart erstarp, Zazamanc und Azagouc. sîn manheit dâ niemen trouc, wan daz er liez verweiset mich. gegen mînem vater der gerich ist mînhalp noch unverkorn. sîn wîp, von der ich wart geborn, durch minne ein sterben nâch im kôs, dô si minne an im verlôs. ich sihe doch gerne den selben man; mir ist zuo wizzen getân, daz nie bezzer ritter wart; nâch im ist kostlîch mîn vart."

*G Der von Tribalibot Juppitern, sînen got, mit worten êrte manigen wîs. er gap ouch vil hôhen brîs sîner gotinne Juno, daz si daz weter vuogte sô, dâ mit er unde al sîn her gein dem lande ûf daz mer lantveste nâmen, dâ si zuo ein ander kâmen. anderstunt si nider sâzen. si bêde niht vergâzen, sine büten ein ander êre. der heiden sprach dô mêre: "ich wil dir lâzen zwei rîchiu lant dienstlîche imer dîner hant, diu mîn vater unde der dîne erwarp, dô der künic Ysenhart erstarp, Zazamanc unde Azagouch. sîn manheit niemen trouc, wan daz er lie verweiset mich. gein mînem vater der gerich ist mînhalb noch unverkorn. sîn wîp, von der ich wart geborn, durch minne ein sterben nâch im kôs, dô si minne an im verlôs. ich sæhe doch gerne den selben man; mir ist ze wizzen getân, daz nie bezzer rîter wart; nâch im ist kostelîch mîn vart."

*T Der von Tribalibot Jupiter, sînen got, mit worten êrte manege wîs. er gap ouch vil hôhen prîs sîner gotinne Juno, daz si daz weter vuogete sô, dâ mit er und al sîn her gein dem lande von dem mer lantveste nâmen, daz si zuo ein ander kâmen. anderstunt si nider sâzen. die beide des niht vergâzen, si büten ein ander êre. der heiden sprach dô mêre: "ich wil dir lâzen zwei rîchiu lant dienstlîche imer dîner hant, diu mîn vater und der dîne erwarp, dô der künec Isenhart erstarp, Zazamanc und Azagouc. sîn manheit nieman trouc, wan daz er liez verweiset mich. gein mîme vater der gerich ist mînhalp noch unverkorn. sîn wîp, von der ich wart geborn, durch minne ein sterben nâch im kôs, dô si minne an im verlôs. ich sæhe doch gerne disen man; mir ist zuo wizzene getân, daz nie bezzer rîter wart; nâch im ist kostlîch mîn vart."