*D Ûf sîner unverzagten reise. der selbe kurteise was ein heidenischer man, der toufes kunde nie gewan. Parzival reit balde gein eime grôzem walde ûf einer liehten waste gein eime rîchen gaste. ez ist wunder, ob ich armer man die rîcheit iu gesagen kan, die der heiden vür zimierde truoc. sage ich des mêre denne genuoc, dennoch mac ichs iu mêr wol sagen, wil ich sîner rîcheit niht gedagen. Swaz diende Artuses hant ze Bertane unt in Engellant, daz vergülte niht die steine, die mit edelem arde reine lâgen ûf des heldes wâpenroc. der was tiure ân al getroc; rubîne, calcidône wâren dâ ze swachem lône. der wâpenroc gap blanken schîn. in dem berge zAgremuntin die würme salamander in worhten zein ander in dem heizen viure. die wâren steine tiure lâgen drûf tunkel und lieht; ir art mac ich benennen niht.

*m ûf sîner unverzagten reise. der selbe kurteise was ein heidenischer man, der toufes kunde nie gewan. Parcifal reit balde gegen einem grôzen walde ûf einer liehten waste gegen einem rîchen gaste. ez ist wunder, ob ich armer man die rîcheit iu gesagen kan, die der heiden vür zimierde truoc. sage ich des mêre dan genuoc, dannoch mac ichs iu mêr wol gesagen, ich wil sîner rîcheit niht gedagen. waz diende Artuses hant zuo Britanie und in Engelant, daz vergülten niht die steine, die mit edelm arde reine lâgen ûf des wâpenroc. der was tiur âne alliu getroc; rubîne oder calcedône wâren dâ ze swachem lône. der wâpenroc gap blanken schîn. in dem berge zuo Agremontin die tierlîn salamander in worhten zuo ein ander in dem heizen viur. die edelen stein tiur lâgen dâr ûf tunkel und lieht; ir art mac ich benennen niht.

*G Ûf sîner unverzageten reise. der selbe kurteise was ein heidenisch man, der toufe er kunde nie gewan. Parzival reit balde gein einem grôzen walde ûf einer liehten waste gein einem rîchen gaste. ez ist wunder, obe ich arman dise rîcheit gesagen kan, die der heiden vür zimiere truoc. sage ich des mê danne genuoc, dannoch mac ich iu mê wol sagen, wil ich sîner rîcheit niht verdagen. swaz dient Artuses hant, Britanie unde Engellant, die vergülten niht die steine, die mit edelm arde reine lâgen ûf des heiden wâpenroc. die wâren tiure ân al getroc; rubîne, calcidône wâren dâ ze swachem lône. der wâpenroc gab liehten schîn. in dem berge ze Agremontin die würme salamander in worhten zein ander in dem heizen viure. die wâren steine tiure lâgen drûfe tunkel unde lieht; ir art mac ich genennen niht.

*T Ûf sîner unverzageten reise. der selbe kurteise was ein heidenscher man, der toufes kunde ê nie gewan. Parcifal reit balde gein eime grôzen walde ûf einer liehten waste gein eime rîchen gaste. ez ist wunder, ob ich armer man dise rîcheit gesagen kan, die der heiden vür zimierde truoc. sage ich iu des mêr dan genuoc, dannoch mag ich es mêr wol sagen, wil ich sîner rîcheit niht gedagen. waz dienete Artuses hant zuo Britanie und in Engellant, daz vergülten niht die steine, die mit edelme arde reine lâgen ûf des heldes wâpenroc. die wâren tiure âne alliu getroc; rubîne, calcidône wâren dâ zuo swacheme lône. der wâpenroc gap blanken schîn. in dem berge zuo Agremontin die würme salamander in worhten zuo ein ander in dem heizen viure. daz wâren steine tiure lâgen dâr ûfe dunkel und lieht; ir art mac ich genennen niht.