*D Nû dâhte aber Parzival an sîn wîp, die lieht gemâl, unt an ir kiuschen süeze. ob er kein ander grüeze, daz er dienst nâch minnen biete unt sich unstæte niete? solch minne wirt von im gespart. grôz triwe het im sô bewart sîn manlîch herze unt ouch den lîp, daz vür wâr nie ander wîp wart gewaldec sîner minne niwan diu küneginne Condwiramurs, diu geflôrierte bêâflûrs. Er dâhte: "sît ich minnen kan, wie hât diu minne an mir getân? nû bin ich doch ûz minne erborn: wie hân ich minne alsus verlorn? Sol ich mit den ougen vreude sehen unt muoz mîn herze jâmers jehen, diu werc stênt ungelîche. hôhes muotes rîche wirt niemen solher pflihte. gelücke mich berihte, waz mirz wægeste drumbe sî." im lac sîn harnasch nâhe bî.

*m nû dâht aber Parcifal an sîn wîp, die lieht gemâl, und an ir kiuschen süeze. ob er kein ander grüeze, der er dienste nâch minnen biete und sich unstæte niete? solich minne wirt von ime gespart. grôz triuwe het in sô bewart, sîn manlîch herze und ouch den lîp, daz vür wâr nie ander wîp wart gewaltic sîner minne niht wan diu küniginne, diu reine Condwieramurs, diu geflôrierte bêâflûrs. er dâhte: "sît ich minnen kan, wie hât minne an mir getân? nû bin ich doch ûz minne erborn: wie hân ich minne alsus verlorn? sol ich nâch dem Grâl ringen, sô muoz mich iemer twingen ir kiuschlîcher umbevanc, von der ich schiet, daz ist sô lanc. sol ich mit den ougen vröude sehen und muoz mîn herze jâmers jehen, diu werc stânt ungelîche. hôhes muotes rîche wirt niemen solicher pflihte. glücke mich berihte, waz mir daz wægest dâr umbe sî." sîn harnasch lac im nâhe bî.

*G Nû dâhte aber Parzival an sîn wîp, die lieht gemâl, unde an ir kiusche süeze. ob er deheine ander grüeze, daz er dienst nâch minne biete unde sich unstæte niete? solch minne wirt von im gespart. grôz triwe het in sô bewart, sîn manlîch herze unde sînen lîp, vür wâr, ezne wart ander wîp gewaltic sîner minne niwan diu küniginne Condwiramurs, diu geflôrierte bêâflûrs. dô dâhter: "sît ich minnen kan, wie hât diu minne an mir getân? nû bin ich doch ûz minne erkorn: wie hân ich minne sus verlorn? muoz ich nâch dem Grâle ringen, doch sol mich imer twingen ir minniclîcher umbevanc, von der ich schiet, des ist ze lanc. sol ich mit den ougen vröude sehen unde muoz mirz herze jâmers jehen, diu werc stênt ungelîche. hôhes muotes rîche wirt niemen sölher pflihte. gelücke mich berihte, waz mirz wægest drumbe sî." im lac sîn harnasch nâhen bî.

*T Nû dâhte aber Parcifal an sîn wîp, die lieht gemâl, und an ir kiusche süeze. ob er dekein ander grüeze, daz er dienst nâch minne biete und sich unstæte niete? soliche minne wart von im gespart. grôziu triuwe hete sô bewart sîn manlîch herze und sînen lîp, ez enwart vür wâr nie ander wîp gewaltic sîner minne niht wan diu küneginne Kundewiramurs, diu geflôrierte bêâflûrs. dô dâht er: "sît ich minnen kan, wie hât diu minne an mir getân? nû bin ich doch ûz minne geborn: wie hân ich sus minne verlorn? muoz ich nâch dem Grâle ringen, doch muoz mich iemer twingen ir kiuschlîcher umbevanc, von der ich schiet, daz ist zuo lanc. sol ich mit den ougen vreude sehen und muoz mîn herze mir jâmers jehen, diu werc stênt ungelîche. hôhes muotes rîche wirt nieman solicher pflihte. gelücke mich berihte, waz mir aller wægeste dâr umb sî." im lac sîn harnasch nâhe bî.