*D der anker kom doch vor an in. dô stach in hinderz ors dort hin der werde künec von Zazamanc unt viengen. dâ was grôz gedranc, hôhe vurche sleht getennet, mit swerten vil gekemmet. Dâ wart verswendet der walt unt manec ritter ab gevalt. si wunden sich, sus hœre ich sagen, hindenort, dâ hielden zagen. der strît was wol sô nâhen, daz gar die vrouwen sâhen, wer dâ bî prîse solde sîn. der minnen gernde Riwalin, von des sper snîte ein niwe leis. daz was der künec von Lohneis. sîne hurte gâben kraches schal. Morholt in einen rîter stal. ûzem satel er in vür sich huop. daz was ein ungevüeger uop. der hiez Killirjacac. von dem hete der künec Lac dâ vor enpfangen solhen solt, den er vallende an der erden holt. er het ez dâ vil guot getân. dô luste disen starken man, daz er in twünge sunder swert. alsus vieng er den degen wert. hinderz ors stach Kayletes hant den herzogen von Brabant.

*m der anker kam doch vor an in. dô stach in hinderz ros dort hin der werde künic von Zazamanc und vienc in. dâ was grôz gedranc, Hôhe vurche sleht getennet, mit swerten vil †gekennet†. dâ wart verswendet der walt und manic ritter abe gevalt. si wunden sich, sus hôrt ich sagen, hin an den ort, dâ hielten zagen. der strît was wol sô nâhen, daz gar die vrouwen sâhen, wer dâ bî prîse solte sîn. der minnen gernde Rivalin, von des spern snîte ein niuwe leis. daz was der künic von Lohneis. sîne hurte gâben kraches schal. Morolt in einen ritter stal. ûzem satel er in vür sich huop. daz was ein ungevüeger uop. daz was der werde Kiliriacac. von dem hete der künic Lac dâ vor enpfangen solichen solt, den der vallende an der erden holt. er hete ez dâ vil guot getân. dô luste disen starken man, daz er in twünge sunder swert. alsus viengen si den degen wert. hinder daz ros stach Kailetes hant den herzogen von Brabant.

*G der anker kom doch vor an in. dô stach in hinderz ors dort hin der werde künic von Zazamanc unde vieng in. dâ wart grôz gedranc, hôhe vurche sleht getennet, mit swerten vil geklemmet. dâ wart verswendet der walt unde manic rîter abe gevalt. si wunden sich, sus hôrt ich sagen, hin an den ort, dort hielten zagen. der strît was wol sô nâhen, daz gar die vrouwen sâhen, wer dâ mit prîse solte sîn. der minne gernde Riwalin, von des speren snîte ein niwiu leis. daz was der künic von Lohneis. sîne hurte gâben kraches schal. Morolt in einen rîter stal. ûz dem satel er in huop. daz was ein ungevüeger uop. der hiez Kiliriakac. von dem het der künic Lac Dâ vor enpfangen solhen solt, den er vallende an der erde holt, und hetz ouch dâ vil guot getân. dô luste disen starken man, daz er in twünge sunder swert. alsus vienc er den degen wert. hinderz ors stach Kailetes hant den herzogen von Brabant.

*T der enker kam doch vor an in. dô stach in hinderz ors dort hin der werde künec von Zazamanc und vienc in. dâ wart grôz gedranc, hôhe vurch sleht getemmet, mit swerten vil gekemmet. dâ wart verswendet der walt und manec ritter abe gevalt. si wunden sich, sus hôrt ich sagen. hinden an dem orte hielten zagen. Der strît was wol sô nâhen, daz gar die vrouwen sâhen, wer dâ mit prîse solte sîn. der minne gernde Riwalin, von des spern snît ein niuwe leis. daz was der künec von Loheneis. sîne hurte gâben krachenden schal. Morolt in einen ritter stal. ûz dem satele huob er in vür sich und vuort in hin. der hiez Kylliriakac. von dem hete der künec Lac dâ vor entvangen solhen solt, sam der vallen an der erden holt, und hetez ouch dâ vor vil wol getân. dô luste disen starken man, daz er in twünge sunder swert. alsus vienc er den degen wert. hinderz ors stach Kayletes hant den herzogen von Brabant.