*D Nû was ez ouch ime her sô komen, Artus hete al dâ genomen vride von der herzogîn. der was ergetzens gewin komen nâch Cidegaste, den si ê klagete sô vaste. ir zorn was nâch verdecket: si hete gewecket von Gawane etslîch umbevanc; dâ von ir zorn was sô kranc. Artus der Bertenoys nam die clâren vrouwen kurtoys, beide meide und wîp, die truogen vlæteclîchen lîp. er hete der werden hundert in ein gezelt gesundert. Niht lieber möht ir sîn geschehen, wan daz si den künec solde sehen, Itonjen, diu ouch dâ saz; stæter vreude si niht vergaz, doch kôs man an ir ougen schîn, daz si diu minne lêrte pîn. dâ saz manec rîter lieht gemâl, doch truoc der werde Parzival den prîs vor ander clârheit. Gramoflanz an die snüere reit. dô vuorte der künec unervorht, in Gampfassasche geworht, einen pfelle mit golde vesten; der begunde verre glesten.

*m Nû was ouch in dem her komen, daz Artus het genomen vride von der herzogîn. der was ergetzens gewin komen nâch Zidegaste, den si klagte ê sô vaste. ir zorn was nâch verdecket, wan si hete erwecket von Gawan etlîchen umbevanc; dâ von ir zorn was worden kranc. Artus der Britunois nam die clâren vrowen †artois†, beide megde und wîp, die truogen vlæteclîchen lîp. er het der werden hundert in ein gezelt gesundert. niht lieber möhte sîn geschehen, dan daz si den künic solten sehen. Ithonie, diu ouch dâ saz, stæter vröude si niht vergaz, doch kôs man an ir ougen schîn, daz si minne lêrte pîn. dâ saz manic ritter lieht gemâl, doch truoc der werde Parcifal den prîs vor ander clârheit. Gramolanz an die snüere reit. dô vuorte der künic unervorht, in Ganfassasche geworht, einen pfelle mit golde vesten; der begunde vaste glesten.

*G nû was ez ouch in dem her sô komen, Artus hete dâ genomen einen vride von der herzogîn. der was ergetzens gewin komen nâch Zidegaste, den si ê klagte vaste. ir zorn was nâch verdecket, wan si het erwecket von Gawane manic umbevanc; dâ von ir zürnen was sô kranc. Artus der Britaneis nam die vrouwen kurteis, beide maget unde wîp, die truogen vlætigen lîp. er het der werden hundert under ein gezelt gesundert. niht lieber möhte ir sîn geschehen, daz si den künic solde sehen, Itonie, diu ouch dâ saz unde stæter vröude niht vergaz. dô kôs man an ir ougen schîn, daz si diu minne lêrte pîn. dâ saz manic rîter lieht gemâl. dô truoc der werde Parzival den brîs vor ander clârheit. Gramoflanz an die snüere reit. dô vuorte der degen unervorht, in Tschofflanze geworht, einen pfelle von golde vesten; der begunde verre glesten.

*T Nû was ez ouch in dem here sô komen, Artus hete dâ genomen einen vriden von der herzogîn. der was ergetzens gewin komen nâch Cydegaste, den si klagete sô vaste. ir zorn was nâch verdecket, wan si hete erwecket von Gawane etlîchen umbevanc; dâ von ir zürnen was sô kranc. Artus der Brituneis nam die clâren vrouwen kurteis, beide maget und wîp, die truogen vlætigen lîp. er hete der werden hundert under ein gezelt gesundert. niht lieber möht ir sîn geschehen, daz si den künec solte sehen, Itonie, diu ouch dâ saz und stæter vreuden niht vergaz. dô kôs man an ir ougen schîn, daz si diu minne lêrte pîn. dâ saz manec rîter lieht gemâl, doch truoc der werde Parcifal den prîs vor ander clârheit. Gramoflanz an die snüere reit. dô vuorte der künec unervorht, in Kanfassaie geworht, einen pfelle mit golde vesten; der begunde verre glesten.