*D Si tâten ir poynder rehte; ûz der tjoste geslehte wâren si bêde samt erborn. wênec gewunnen, vil verlorn hât, swer behaldet dâ den prîs; der klagtz doch immer, ist er wîs. Gein ein ander stuont ir triwe, der enweder alt noch niwe dürkel scharten nie enpfienc. nû hœret, wie diu tjoste ergienc: hurteclîche unt doch alsô, si mohtens bêde sîn unvrô. Erkantiu sippe unt hôch geselleschaft was dâ mit herzenlîcher kraft durch scharpfen strît zein ander komen. von swem der prîs dâ wirt genomen, des vreude ist drumbe sorgen pfant. die tjoste brâhte iewederiu hant, daz die mâge unt die gesellen ein ander muosen vellen mit orse mitalle nider. alsus wurben si dô sider: Ez wart aldâ verzwicket, mit swerten verbicket. schildes schirben unt daz grüene gras ein glîchiu temperîe was, sît si begunden strîten. si muosen scheidens bîten al ze lange; si begundens vruo. dâne greif êt niemen scheidens zuo.

*m si tâten ir ponder rehte; ûz der juste geslehte wâren si beide erborn. wênic gewunnen, vil verlorn het, wer behaltet dâ den prîs; der klagte ez doch iemer, wirt er wîs. gegen ein ander stuont ir triuwe, der enweder alt und niuwe dürkel scharten nie enpfienc. nû hœret, wie diu juste ergienc: hurteclîch und doch alsô, si mohtens beide sîn unvrô. erkantiu sippe und hôhiu geselleschaft was dâ mit hazzelîcher kraft durch scharpfen strît zuo ein ander komen. von wem der prîs dâ wirt vernomen, des vröude dâr umb ist sorgen pfant. die juste brâht ietweders hant, daz die mâge und die gesellen ein ander muosten vellen mit rosse †und alle† nider. alsus wurben si dô sider: ez wart aldâ verzwicket, mit swerten verbicket. schiltes schirben und daz grüene gras ein glîchiu temperunge was, sît si begunden strîten. si muosten scheidens bîten al zuo lange; si begundens vruo. dô greif eht niemen scheidens zuo,

*G Si tâten ir poynder rehte; ûz der tjost geslehte wâren si bêde sament geborn. wênic gewunnen unde vil verlorn hât, swer behalt dâ den brîs; der klaget doch immer, ist er wîs. gein ein ander stuont ir triwe, der newederiu alt noch niwe dürkel scharten nie enpfie. nû hœret, wie diu tjost ergie: hurticlîch unde doch alsô, si mohtens bêde sîn unvrô. erkantiu sippe unde hôch geselleschaft was dâ mit hazlîcher kraft durch scharpfe tjost zein ander komen. von swederm der brîs dâ wirt genomen, des vröude ist umbe sorgen pfant. die tjost brâhte ietweders hant, daz die mâge unde die gesellen ein ander muosen vellen mit ors mitalle nider. alsus wurben si dô sider: ez wart al dâ verzwicket, mit swerten verblicket. schiltes schirben unde daz grüene gras ein glîchiu temperîe was, sît si begunden strîten. si muosen scheidens bîten al ze lange; si begundens vruo. dône greif êt niemen scheidens zuo.

*T si tâten ir poynder rehte; ûz der jost geslehte wâren si beide samet geborn. wênic gewunnen und vil verlorn hât, wer behaltet dâ den prîs; der klaget doch immer, ist er wîs. gein ein ander stuont ir triuwe, der dewederiu alt noch niuwe dürkel scharte nie entvienc. nû hœret, wie diu jost ergienc: herteclîche und doch alsô, si mohtens beide sîn unvrô. erkantiu sippe und hôch geselleschaft was dâ mit hazlîcher kraft durch scharpfen strît zuo ein ander komen. von swederm dâ wirt der prîs genomen, des vreude ist umb sorge pfant. die jost brâhte ietweders hant, daz die mâge und die gesellen ein ander muosen vellen mit orsen betalle nider. alsus wurben si dô sider: ez wart al dâ verzwicket, mit swerten verbicket. schildes schirben und daz grüene gras ein glîchiu temperîe was, sît si begunden strîten. si muosen scheidens bîten al zuo lange; si begundens vruo. dân greif eht nieman scheidens zuo.