*D Ob von dem werden Gawan werlîche ein tjost dâ wirt getân, sône gevorht ich sîner êre an prîse nie sô sêre. ich solt ouch sandern angest hân. daz wil ich ûz den sorgen lân: der was in strîte eines mannes her. ûz heidenschaft verre über mer was brâht diu zimierde sîn. noch rœter denn ein rubîn was sîn kursît unt sîn orses kleit. der helt nâch âventiuren reit; sîn schilt was gar durchstochen. er het ouch gebrochen von dem boume, des Gramoflanz huote, einen sô liehten kranz, daz Gawan daz rîs erkande. dô vorht er die schande, ob sîn der künec dâ het erbiten. wære der durch strît gein im geriten, sô müese ouch strîten dâ geschehen, und solt ez nimmer vrouwe ersehen. Von Munsalvæsche wâren sie, beidiu ors, diu alsus hie liezen nâher strîchen ûf den poinder hurteclîchen; mit sporn si wurden des ermant. al grüene klê, niht stoubic sant stuont touwec, dâ diu tjost geschach. mich müet ir bêder ungemach.

*m ob von dem werden Gawan werlîch ein juste wart getân, sô gevorht ich sîner êre an strîte nie sô sêre. ich solt ouch des andern angest hân. daz wil ich ûz den sorgen lân: der was in strîte eines mannes her. ûz heidenscher verre über mer was brâht diu zimierde sîn. noch rœter danne rubîn was sîn kursît und sînes rosses kleit. der helt nâch âventiure reit; sîn schilt was gar durchstochen. er hete ouch gebrochen von dem boum, des Gramolanz †hete†, einen werden kranz, daz Gawan daz rîs erkande. dô vorht er die schande, ob sîn der künic dâ het erbiten. wær der durch strît gegen im geriten, sô müeste ouch strîten beschehen, und solte ez nimmer vrowe sehen. von Muntsalvasche wâren sie, beidiu ros, diu alsus hie liezen nâher strîchen ûf den ponder herteclîchen; mit sporn si wurden des ermant. al grüener klê, niht stoubic sant stuont touwic, dâ diu just beschach. mich müejet ir beider ungemach.

*G Obe von dem werden Gawan werlîchiu tjost dâ wart getân, sône gevorhte ich sîner êre an strîte nie sô sêre. ich solde ouch des andern angest hân. daz wil ich ûz den sorgen lân: er was in strîte eines mannes her. ûz heidenschefte verre über mer wart brâht diu zimier sîn. noch rœter danne ein rubîn was sîn kursît unde sînes orses kleit. der helt nâch âventiuren reit; sîn schilt was gar durchstochen. er het ouch gebrochen von dem boume, des Gramoflanz huote, einen als liehten kranz, daz Gawan daz rîs erkande. dô vorht er die schande, op sîn der künic dâ hiet erbiten. wære der durch strît gein im geriten, sô müese strît dâ geschehen, solde ez nimmer vrouwe ersehen. von Muntsalvatsche wâren sie, beidiu ors, diu alsô hie nâher liezen strîchen ûf den poynder hurticlîchen; mit sporen si wurden des ermant. grüene klê, niht stoubec sant stuont touwec, dâ diu tjost geschach. mich müet ir bêder ungemach.

*T Aber von dem werden Gawan werlîch jost dâ wart getân; sô vorht ich sîner êre an strîte nie sô sêre. ich solte ouch des andern angest hân. daz wil ich ûz den sorgen lân: er was in strîte eines mannes her. ûz heidenschaft verre über mer wart brâht diu gezierde sîn. noch rœter dan ein rubîn was sîn kursît und des orses kleit. der helt nâch âventiure reit; sîn schilt was gar durchstochen. er hete ouch gebrochen von dem boume, des Gramoflanz huote, einen alsô liehten kranz, daz Gawan daz rîs erkande. dô vorht er die schande, ob sîn der künec dâ hete erbiten. wære der durch strît gein im geriten, sô müese strîten dâ geschehen, soltez niemer vrouwe gesehen. von Munsalvasche wâren sie, beidiu ors, diu alsô hie nâher liezen strîchen ûf den poynder herteclîchen; mit sporn si wurden des ermant. grüene klê, niht stoubic sant stuont touwic, dâ diu jost geschach. mich müet ir beider ungemach.