*D Nû diz was êt alsus komen: Gawans rinc was genomen durch Artuses her, al dâ der lac. waz man schouwens dâ gepflac! ê diz volc durch si gerite, Gawan durch hovelîchen site unt ouch durch werdeclîchiu dinc hiez an Artuses rinc die êrsten vrouwen halden. sîn marschalc muose walden, daz einiu nâhe zuo der reit. der andern deheiniu dô vermeit, sine habten sus al umbe, hie diu wîse unt dort diu tumbe, bî ieslîcher ein ritter, der ir pflac unt der sich dienstes dâr bewac. Artuses rinc, den wîten, man sach an allen sîten mit vrouwen umbevangen. dô wart alrêst enpfangen Gawan, der sælden rîche, ich wæne des, minneclîche. Arnive, ir tohter unt ir kint mit Gawane erbeizet sint, von Logroys diu herzogîn unt der herzoge von Gowerzin unt der Turkote Florant. gein disen liuten wert erkant Artus ûz dem gezelte gienc, der si dâ vriuntlîche enpfienc;

*m Nû diz was alsô komen: Gawans rinc was genomen durch Artuses her, aldâ der lac. waz man schouwens dâ gepflac! ê diz volc durch si gerite, Gawan durch hovelîchen site und ouch werdiclîchez dinc hiez an Artuses rinc die êrsten vrowen halten. sîn marschalc muoste walten, daz einiu nâhe zuo der reit. der andern dekeiniu daz vermeit, sine habeten sus alumbe, hie diu wîse, dort diu tumbe, bî ieglîcher ein ritter, der ir pflac und der sich dienstes dâr bewac. Artuses rinc, den wîten, sach man an allen sîten mit vrowen umbevangen. dâ wart allerêrst enpfangen Gawan, der sælden rîche, ich wæne des, minneclîche. Arnive, ir tohter und ir kint mit Gawan erbeizet sint und von Logrois diu herzogîn und der herzoge von Gowertzin und der Turkoite Florant. gegen disen liuten wert erkant Artus ûz dem pavelûne gienc, der si dâ vriuntlîch enpfienc;

*G Nû ditze alsô was komen: Gawans rinc wart genomen durch Artuses her, al dâ er lac. waz man schouwens dâ gepflac! ê diz volc durch si gerite, Gawan durch hovelîche site unde ouch durch werdeclîchiu dinc hiez bî Artuses rinc die êrsten vrouwen halden. sîn marschalc muose walden, daz einiu nâhen zer andern reit. der andern deheiniu vermeit, sine hielde sus alumbe, hie diu wîse, dort diu tumbe, bî ieslîcher ein rîter, der ir pflac, der sich dienstes dâr bewac. Artuses rinc, den wîten, man sach in allen sîten mit vrouwen umbevangen. dâ wart alrêrst enpfangen Gawan, der sælden rîche, ich wæne des, minniclîche. Arnive, ir tohter unde ir kint mit Gawane erbeizt sint unde von Logroys diu herzogîn unde der herzoge von Gowerzin unde der Turkoite Florant. gein disen liuten wert erkant Artus ûz dem pavelûn gienc, der si dâ vrœlîche enpfienc;

*T nû diz alsô was komen: Gawans rinc was genomen durch Artuses her, al dâ er lac. waz man schouwens dâ pflac! ê diz volc durch si gerite, Gawan durch höveschlîchen site und ouch durch werdeclîchiu dinc hiez bî Artuses rinc die êrsten vrouwen halden. sîn marschalc muoste walden, daz einiu nâher zuo der andern reit. der anderen keiniu dô vermeit, sine hielten sus alumben, hie die wîsen, dort die tumben, bî ieslîcher ein ritter, der ir pflac, der sich dienstes dâr bewac. Artuses rinc, den wîten, man sach an einer sîten mit vrouwen umbevangen. dô wart alrêst enpfangen Gawan, der sælde rîche, ich wæn des, minneclîche. Arnyve, ir tohter und ir kint mit Gawane erbeizet sint und von Logrois diu herzogîn und der herzoge von Gowerzin und der Turkoyte Florant. gên disen liuten wert erkant Artus ûz dem pavelûn gienc, der si dâ vrœlîch enpfienc;