*D Reht umbe den mitten morgen offenlîche unt unverborgen ûf den hof der knappe reit. die höfschen prüeveten sîniu kleit wol nâch knappeclîchen siten. ze bêden sîten was versniten daz ors mit sporn sêre. nâch der küneginne lêre er balde von dem orse spranc. umb in huop sich grôz gedranc. kappe, swert unt sporn untz ors, würden diu verlorn, dâ kêrt er sich wênec an. der knappe huop sich balde dan, dâ die werden rîter stuonden, die vrâgen in begunden von âventiure mære. Si jehent, daz reht dâ wære, ze hove az weder wîp noch man, ê der hof sîn reht gewan, Âventiure sô werdeclîch, diu âventiure wære gelîch. Der knappe sprach: "ine sag iu niht. mîn unmuoze mir des giht. daz sult ir mir durch zuht vertragen unt ruochet mir vome künege sagen; den het ich gern gesprochen ê. mir tuot mîn unmuoze wê. ir vreischet wol, waz ich mære sage. got lêre iuch helfe unt kumbers klage."

*m reht umb den mitten morgen offenlîch und unverborgen ûf den hof er balde reit. die höveschen prüeveten sîniu kleit wol nâch knappelîchen siten. zuo beiden sîten was versniten daz ros mit sporn sêre. nâch der künigîn lêre er balde von dem rosse spranc. umb in huop sich grôz gedranc. kappe, swert und sporn und daz ros, würden diu verlorn, dâ kêrte er sich vil wênic an. der knappe huop sich balde dan, dâ die werden ritter stuonden und vrâgen in begunden von âventiure mære. si jâhen, daz reht dâ wære, daz zuo hove †ezze† wîp und man, ê daz der hof sîn reht gewan, âventiure sô werdeclîch, diu âventiure wære gelîch. der knappe sprach: "ich sage iu niht. mîn unmuoze mir des giht. daz sullet ir mir durch zuht vertragen und ruochet mir von dem künige sagen; den het ich gerne gesprochen ê. mir tuot mîn unmuoze wê. ir vreischet wol, waz ich mære sage. got lêre iuch helf und kumbers klage."

*G Rehte umbe den mitten morgen offenlîche unde unverborgen der knappe ûf den hof reit. die höfschen prüeveten sîniu kleit wol nâch knappelîchen siten. ze bêden sîten was versniten daz ors mit sporen sêre. nâch der künegîn lêre balde er von dem orse spranc. umbe in wart dâ grôz gedranc. sîn swert, kappe unde sporn unde daz ors, werdent diu verlorn, dâ kêrte er sich wênic an. der knappe huop sich balde dan, dâ die werden rîter stuonden, die vrâgen in begunden von âventiure mære. die jâhen, daz reht dâ wære, ze hove weder wîp noch man enbize, unz der hof sîn reht gewan, âventiure sô werdeclîch, diu âventiure wære gelîch. der knappe sprach: "ich ensage iu niht. mîn unmuoze mir des giht. daz sult ir mir durch zuht vertragen unde ruochet mir von dem künige sagen; den wolde ich gerne sprechen ê. mir tuot mîn unmuoze wê. ir vreischet schiere, waz ich sage. got lêre iuch helfe unde kumbers klage."

*T rehte umb den mitten morgen offenlîch und unverborgen der knabe ûf den hof reit. die hövischen prüeveten sîniu kleit wol nâch knabelîchen siten. zuo bêden sîten was versniten daz ros mit sporne sêre. nâch der künigîn lêre bald er von dem rosse spranc. umb in wart dâ grôz gedranc. sîn swert, kappe und sporn und daz ros, werdent diu verlorn, dâ kêrt er sich wênic an. der knabe huop sich balde dan, dâ die werden ritter stuonden, die vrâgen in begunden von âventiure mære. si jehent, daz reht dâ wære, dâ zuo hove enezze wîp noch man, ê der hof sîn reht gewan, âventiure sô werdeclîch, diu âventiure wære glîch. der knabe sprach: "ich sag iu niht. mîn unmuoze mir des giht. daz solt ir mir durch zuht vertragen und geruochet mir von dem künige sagen; den wolt ich gerne besprechen ê. mir tuot mîn unmuoze wê. ir vreischet schier, waz ich sage. got lêr iuch helfe und kumbers klage."