*D Dô sprach diu magt mit sinnen: "hêrre, wen solt ich minnen? sît mir mîn êrster tac erschein, sô wart rîter nie dechein, ze dem ich ie gespræche wort, wan als ir hiute hât gehôrt." "Sô möhten iu doch mære komen, wâ ir mit manheit hât vernomen bejagten prîs mit rîterschaft unt wer mit herzenlîcher kraft nâch minnen dienst bieten kan", sus sprach mîn hêr Gawan. Des antwurte im diu clâre magt: "nâch minne ist dienst mich verdagt, wan der herzoginne von Logroys dient manec rîter kurtoys beidiu nâch minne unt umb ir solt. der hât maneger hie geholt tjustieren, dâ wirz sâhen. ir decheiner nie sô nâhen kom, als ir uns komen sît. den prîs ûf hœhet iwer strît." Er sprach zer meide wol gevar: "war krieget der herzoginne schar sus manec rîter ûzerkorn? wer hât ir hulde verlorn?" Si sprach: "daz hât der künec Gramoflanz, der der werdecheite kranz treit, als im diu volge giht. hêrre, des erkenne ich anders niht."

*m dô sprach diu maget mit sinnen: "hêrre, wen solte ich minnen? sît mir mîn êrster tac erschein, sô wart ritter nie dekein, zuo dem ich ie spræche wort, wan als ir hiute habt gehôrt." "sô möhten iu doch mær komen, wâ ir mit manheit het vernomen bejagten prîs mit ritterschaft und wer mit herzelîcher kraft nâch minne dienst bieten kan", sus sprach mîn hêr Gawan. des antwurt im diu clâre maget: "nâch minne ist dienst mich verdaget, wan der herzogîn von Logrois dienet manic ritter kurtois beidiu nâch minne und umb ir solt. der het maniger hie geholt justieren, dâ wirz sâhen. ir dekeiner nie sô nâhen kam, als ir uns komen sît. den prîs ûf hœhet iuwer strît." er sprach zer megde wol gevar: "war krieget der herzogîn schar sus manic ritter ûzerkorn? wer het ir hulde verlorn?" si sprach: "daz het Gramolanz, der der wirdecheite kranz treit, als im diu volge giht. hêrre, des erkenn ich anders niht."

*G Dô sprach diu maget mit sinnen: "hêrre, wen solde ich minnen? sît mir mîn êrster tac erschein, sône wart rîter nie dehein, zuo dem ich ie gespræche wort, wan als ir hiut habet gehôrt." "sô meht iu doch mære komen, wâ ir mit wârheit habet vernomen bejagen prîs mit rîterschaft unde wer mit herzenlîcher kraft nâch minne dienst bieten kan", sus sprach mîn hêr Gawan. des antwurte im diu clâre maget: "nâch minne ist dienst mich verdaget, wan der herzogîn von Logrois dient manic rîter kurtois beidiu nâch minne unde umbe ir solt. der hât maniger hie gedolt tjostieren, daz wir ez sâhen. ir deheiner nie sô nâhen kom, als ir uns komen sît. der prîs ûf hœhet iuwern strît." er sprach zer meide wol gevar: "war krieget der herzoginne schar sus manic rîter ûzerkorn? wer hât ir hulde verlorn?" si sprach: "daz hât Gramoflanz, der der werdecheit kranz treit, alsô diu volge giht. hêrre, des erkenne ich anders niht."

*T Dô sprach diu maget mit sinnen: "hêrre, wen solt ich minnen? sît mir mîn êrster tac erschein, sô enwart rîter nie dekein, zuo dem ich ie gespræche wort, wan als ir hiute hât gehôrt." "sô möhten iu doch mære komen, wâ ir mit wârheit hât vernomen bejageten prîs mit rîterschaft und wer mit herzeclîcher kraft nâch minne dienst bieten kan", sus sprach mîn hêr Gawan. des antwurte im diu clâre maget: "nâch minne ist dienst mich verdaget, wan der herzoginne von Logrois dienet manec rîter kurtois beidiu nâch minne und umb ir solt. der hât maneger hie gedolt jostieren, daz wir ez sâhen. ir dekeiner nie sô nâhen kam, als ir uns komen sît. der prîs ûf hœhet iuwern strît." er sprach zuo der megde wol gevar: "war krieget der herzoginne schar sus manec rîter ûzerkorn? wer hât ir hulde verlorn?" si sprach: "daz hât der künec Gramoflanz, der der wirdecheit kranz treit, als diu volge giht. hêrre, ich erkenne sîn anders niht."