*D vil schilde sach er schînen. die hellen pusînen mit krache vor im gâben dôz. von würfen unt mit slegen grôz zwêne tambûre gâben schal. der galm über al die stat erhal. der dôn iedoch gemischet wart mit floitieren an der vart. eine reisenote si bliesen. nû sulen wir niht verliesen, wie ir hêrre komen sî. dem riten videlære bî. Dô leite der degen wert ein bein vür sich ûfez pfert, zwêne stivâle über blôziu bein. sîn munt als ein rubîn schein von der rœte, als ob er brünne. der was dicke unt niht ze dünne. sîn lîp was allenthalben clâr. lieht reideloht was im sîn hâr, swâ man daz vor dem huote sach. der was ein tiwer houbetdach. grüene samît was der mandel sîn. ein zobel dâ vor gap swarzen schîn ob einem hemde, daz was blanc. von schouwen wart dâ grôz gedranc. Vil dicke al dâ gevrâget wart, wer wære der ritter âne bart, der vuorte alsölhe rîcheit. vil schiere wart daz mære breit.

*m vil schilte sach er schînen. die hellen busînen mit krachen vor ime gâben dôz. von würfen und mit slegen grôz zwêne tambûre gâben schal. der galm über alle die stat erhal. der dôn iedoch gemischet wart mit floitieren an der vart. eine reisenote si bliesen. nû sullen wir niht verliesen, wie ir hêrre komen sî. dem riten videlære bî. dô leite der degen wert ein bein vür sich ûf daz pfert, zwêne stivel über blôziu bein. sîn munt als ein rubîn schein von rœte, als ob er brünne. der was dicke, niht ze dünne. sîn lîp was allenthalben clâr. lieht reideloht was im daz hâr, wâ manz vor dem huote sach. der was ein tiure houbetdach. grüene samît was der mantel sîn. ein zobel dâ vor gap swarzen schîn ob einem hemde, daz was blanc. von schouwen wart dâ grôz gedranc. Vil dicke aldâ gevrâget wart, wer wære der ritter âne bart, der vuorte alsoliche rîcheit. vil schiere wart daz mære breit.

*G vil schilde sach er schînen. die hellen pusînen vor im mit krache gâben dôz. von slegen und mit würfen grôz zwêne tambûre gâben schal. der galm über al die stat erhal. der dôn iedoch gemischet wart mit floitierene ûf die vart. ein reisenote si bliesen. nû sulen wir niht verliesen, wie ir hêrre komen sî. dem riten videlære bî. dô leite der degen wert ein bein vür sich ûf daz pfert, zwêne stivâl über blôzez bein. sîn munt als ein rubîn schein vor rœte, als ober brünne. er was dicke, niht ze dünne. sîn lîp was allenthalben klâr, lieht reideloht sîn hâr, swâ manz vor dem huote sach. der was ein tiwere houbetdach. grüene samît was der mandel sîn. ein zobel dâ vor gap liehten schîn obe einem hemde, daz was blanc. dâ wart von schouwene grôz gedranc. vil dicke dô gevrâget wart, wer wære der junge âne bart, der vuorte solhe rîcheit. Schiere wart daz mære breit.

*T vil schilte sach er schînen. die hellen busînen vor im mit krache gâben dôz. von slegen und würfen grôz zwêne tambûre gâben schal, daz der galm über al die stat erhal. der dôn iedoch gemischet wart mit floitierne ûf der vart. eine reisenote si bliesen. nû soln wir niht verliesen, wie ir hêrre komen sî. dem riten videlære bî. dô leit der degen wert sîn bein vür sich ûf daz pfert, zwêne stivâl über blôz bein. sîn munt als ein rubîn schein von rœte, als ob er brünne. er was dicke und niht zuo dünne. sîn lîp was allenthalben clâr. lieht reideloht was im daz hâr, sô man ez vor dem huote sach. daz was ein tiure houbetdach. grüener samît was der mantel sîn. ein zobel dâ vor gap liehten schîn ob eime hemede, daz was blanc. von schouwen was dâ grôz gedranc. vil dicke dâ gevrâget wart, wer wære der ritter âne bart, der dâ vüeret sô grôze rîcheit. schiere wart daz mære breit.