*D Dô er die mîne überstreit, nâch dem helde ich selbe reit. ich bôt im lant unt mînen lîp. er sprach, er hete ein schœner wîp unt diu im lieber wære. diu rede was mir swære. Ich vrâgete, wer diu möhte sîn. 'von Pelrapeire diu künegîn, sus ist genant diu lieht gemâl. sô heize ich selbe Parzival. ich wil iwer minne niht, der Grâl mir anders kumbers giht', sus sprach der helt mit zorne. hin reit der ûzerkorne. hân ich dâr an missetân, welt ir mich daz wizzen lân, ob ich durch mîne herzenôt dem werdem rîter minne bôt, sô krenket sich mîn minne." Gawan zer herzoginne sprach: "vrouwe, ich erkenne in alsô wert, an dem ir minne hât gegert, het er iuch ze minne erkorn, iwer prîs wære an im niht verlorn." Gawan, der kurtoys, unt diu herzoginne von Logroys vaste an ein ander sâhen. dô riten si sô nâhen, daz man si von der burg ersach, dâ im diu âventiure geschach.

*m dô er die mîne überstreit, nâch dem helde ich selbe reit. ich bôt im lant und mînen lîp. er sprach, er het ein schœnez wîp und diu im lieber wære. diu rede was mir swære. ich vrâgte, wer diu möhte sîn. 'von Pelraperie diu künigîn, sus ist genant diu lieht gemâl. sô heize ich selbe Parcifal und wil iuwer minne niht. der Grâl mir anders kumbers giht', sprach der helt mit zorne. hin reit der ûzerkorne. hab ich dâr an missetân, wolt ir mich daz wizzen lân, ob ich durch mîn herzenôt dem werden ritter minne bôt, sô krenket sich mîn minne." Gawan zuor herzoginne sprach: "vrowe, ich erkenne in alsô wert, an den ir minne habt begert, het er iuch zuo minne erkorn, iuwer prîs wær an im unverlorn." Gawan, der kurtois, und Urgeluse de Logrois vast an ein ander sâhen, dô si geriten alsô nâhen, daz man si von der burc ersach, dân diu âventiur geschach.

*G dô er die mîn überstreit, nâch dem helde ich selbe reit. ich bôt im lant unde mînen lîp. er sprach: 'ich hân ein schœner wîp', unde diu ime lieber wære. diu rede wart mir swære. ich vrâget, wer diu möhte sîn. 'von Pelrapeire diu künegîn, sus ist genant diu lieht gemâl. sô heiz ich selbe Parzival. ichne wil iuwer minne niht, der Grâl mir anders kumbers giht', Sus sprach der helt mit zorne. hin reit der ûzerkorne. hân ich dâr an missetân, welt ir mich daz wizzen lân, ob ich durch mînes herzen nôt dem werden rîter minne bôt, krenket sich dar an mîn minne." Gawan zer herzoginne sprach: "ich erkenne in als wert, an dem ir minne habet gegert, het er iuch ze minnen erkorn, iuwer prîs wære an im niht verlorn." Gawan, der kurtoys, unde diu herzoginne von Logroys vaste an ein ander sâhen. dô riten si sô nâhen, daz man si von der bürge sach, dâ im diu âventiure geschach.

*T Dô er die mîne überstreit, nâch dem helde ich selbe reit. ich bôt im lant und mînen lîp. er sprach: 'ich hân ein schœner wîp', und diu im lieber wære. diu rede wart mir swære und vrâgete, wer diu möhte sîn. 'von Peilrapere diu künegîn, sus ist genant diu lieht gemâl. sô heiz ich selbe Parcifal. ich enwil iuwer minne niht, der Grâl mir anders kumbers giht', sus sprach der helt mit zorne. hin reit der ûzerkorne. hân ich dâr an missetân, wolt ir mich daz wizzen lân, ob ich durch mînes herzen nôt dem werden rîter minne bôt, krenket sich dar an mîne minne." Gawan zuo der herzoginne sprach: "ich erkenne in als wert, an dem ir minne hât gegert, heter iuch zuo minne erkorn, iuwer prîs wære an im niht verlorn." Gawan, der kurtois, und diu herzoginne von Logrois vaste an ein ander sâhen. dô riten si sô nâhen, daz man si von der bürge sach, dâ im diu âventiure geschach.