*D Si gâben fîanze, daz si ze Joflanze mit rîtern und mit vrouwen her kœmen durch ir zweier wer. alsô was benant daz teidinc: si zwêne al eine ûf einen rinc. Sus schiet mîn hêr Gawan dannen von dem werden man. mit vreude er leischierte, der kranz in zimierte. er wolte daz ors niht ûf enthaben, mit sporn treib erz an den graben. Gringuljete nam bezîte sînen sprunc sô wîte, daz Gawan vallen gar vermeit. Zuo zim diu herzoginne reit, al dâ der helt erbeizet was von dem orse ûf ein gras unt er dem orse gurte. ze sîner antwurte erbeizte snellîche diu herzoginne rîche. gein sînen vüezen si sich bôt. dô sprach si: "hêrre, solher nôt, als ich hân an iuch gegert, der wart nie mîn wirde wert. vür wâr mir iwer arbeit vüeget solhiu herzeleit, diu enpfâhen sol getriwez wîp umb ir lieben vriwendes lîp."

*m si gâben fîanze, daz si †† Joflanze mit ritter und vrouwen her kœmen durch ir zweier wer. aldâ was benant daz tegedinc: si zwên alein in einen rinc. Sus schiet mîn hêr Gawan danne von dem werden man. mit vröuden er leischierte, der kranz in zimierte. er wolt daz ros niht ûf enthaben, mit sporn treip erz an den graben. Gringulet nam bî zîte einen sprunc alsô wîte, daz Gawan vallen gar vermeit. zuo im diu herzoginne reit, aldâ der helt erbeizet was von dem ros ûf daz gras und er dem rosse gurte. zuo sîner antwurte erbeizte snelleclîche diu herzogîn rîche. gegen sînen vüezen si sich bôt. si sprach: "hêrre, solher nôt, als ich hab an iuch begert, der wart nie mîn wirde wert. vür wâr mir iuwer arbeit vüeget solich herzeleit, die enpfâhen sol getriuwez wîp umb ir lieben vriundes lîp."

*G Si gâben fîanze, daz si ze Tschofflanze mit rîtern und mit vrouwen her kœmen durch ir zweier wer. sus was benant daz teidinc: si bêde al ein ûf einen rinc. sus schiet mîn hêr Gawan dannen von dem werden man. mit vröuden er leisierte, der kranz in condwierte. ern mohtz ors niht ûf enthaben, mit sporn erz treip an den graben. Gringuliet nam bezît sînen sprunc wol alse wît, daz Gawan vallen gar vermeit. zuo ime diu herzoginne reit, al dâ der helt erbeizet was von dem rosse ûf daz gras. unze er daz gegurte, zuo sîner antwurte erbeizte snellîche diu herzoginne rîche. gein sînem vuoze si sich bôt. dô sprach si: "hêrre, solcher nôt, als ich hân an iuch gekert, der wart mîn wirde nie wert. vür wâr mir iuwer arbeit vüeget solich herzeleit, die enpfâhen sol getriuwez wîp umbe ir lieben vriundes lîp."

*T si gâben fîanze, daz si zuo Tschoflanze mit rîtern und mit vrouwen her kœmen durch ir zweier ger. sus wart benant ein tegedinc - si beide aleine in einen rinc - und schiet mîn hêr Gawan dannen von dem werden man. mit vreuden er leisierte, der kranz in zimierte. er enwolte daz ors niht ûf erhaben, mit sporn er ez treip unz an den graben. Krynguliet nam bezît sînen sprunc wol sô wît, daz Gawan vallen gar vermeit. zuo im diu herzoginne reit, al dâ der helt erbeizet was von dem orse ûf daz gras. unz er dem orse gegurte, zuo sîner antwurte erbeizte snellîche diu herzoginne rîche. zuo sînen vüezen si sich bôt. dô sprach si: "hêrre, solicher nôt, als ich hân ane iuch gegert, dern wart nie mîn wirde wert. vür wâr mir iuwer arbeit vüeget solich herzeleit, die enpfâhen sol getriuwez wîp umb ir lieben vriundes lîp."