*D tet ez ûf, als im ze muote was. dâr ob stuont der palas. ouch saz diu küneginne zen venstern dâr inne mit maneger werden vrouwen. die begunden dâ schouwen, waz dise knappen tâten. die heten sich berâten unt sluogen ûf ein gezelt. umb unvergolten minnen gelt wart es ein künec âne. des twang in Belakane. mit arbeit wart ûf geslagen, daz drîzec soumære muosen tragen, ein gezelt. daz zeigete rîcheit. ouch was der plân wol sô breit, daz sich die snüere stracten dran. Gahmuret, der werde man, die selben zît dort ûze enbeiz. dar nâch er sich mit vlîze vleiz, wie er höfschlîche kœme geriten. des enwart niht langer dô gebiten. sîne knappen an den stunden sîniu sper zesamne bunden, ieslîcher vünfiu an ein bant. daz sehste vuorter an der hant Mit einer baniere. sus kom gevarn der fiere. von der künegîn wart vernomen, daz ein gast dâ solte komen

*m tet ez ûf, als ime ze muote was. dâr obe stuont der palas. ouch saz diu küniginne zen venstern dâr inne mit maniger werden vrouwen. die begunden schouwen, waz dise knappen tâten. die heten sich berâten und sluogen ûf ein gezelt. umb unvergolten minnen gelt wart es ein künic âne. des twanc in Belakane. mit arbeit was ûf geslagen, daz soumære solten tragen, ein gezelt. daz zeigete rîcheit. ouch was der plân dâ wol sô breit, daz sich die snüere strahten dran. Gahmuret, der werde man, die selben zît dort ûze enbeiz. dar nâch er sich mit vlîze vleiz, wie er hövelîch kœme geriten. des enwart niht langer dô gebiten. sîne knappen an den stunden sîniu sper zesamen bunden, ieglîcher vünfiu an ein bant. daz sehste vuort er an der hant mit einer baniere. sus kam gevarn der fiere. vor der künigîn wart vernomen, daz ein gast dâ solte komen

*G tet ez ûf, als im ze muote was. dâr obe stuont der palas. dâ was diu küniginne zen vensteren dâr inne mit maniger juncvrouwen. die begunden alle schouwen, waz dise knappen tâten. die heten sich berâten. si sluogen ûf ein gezelt. umbe unvergolten minnen gelt Wart es ein künic âne. des twanc in Belacane. mit arbeit wart ûf geslagen, daz drîzic soumære muosen tragen, ein gezelt. daz zeigte rîcheit. dô was der anger wol sô breit, daz sich die snüere stracten dran. Gahmuret, der werde man, al die wîle dort ûze enbeiz. dar nâch er sich mit vlîze vleiz, wier stolzlîche kœme geriten. des wart dô langer niht gebiten. sîne knappen an den stunden sîniu sper zesamene bunden, iegelîcher vünfiu an ein bant. daz sehste vuorter in der hant mit einer baniere. sus kom gevaren der fiere. vor der künigîn wart vernomen, wie dâ ein rîter solte komen

*T tet ez ûf, als im zuo muote was. dâ oben stuont der palas. dâ saz diu küneginne zuo eim venster dâr inne mit maniger werden vrouwen. die gerne wolten schouwen, daz dise knappen tâten. si heten sich berâten und sluogen ûf ir gezelt. umb unvergolten minnen gelt wart es ein künec âne. des twanc in Belacane. mit arbeit wart ûf geslagen, daz drîzic soumær muosen tragen, ein gezelte. daz erzeigete rîcheit. dô was der plân wol breit, daz sich die snüere stracten dran. Gahmuret, der werde man, die selbe zît dort ûze enbeiz. dar nâch er sich mit vlîze vleiz, wie er höveschlîch kæme geriten. dô wart dâ langer niht gebiten. sîne knappen an den stunden sîniu sper zesamen bunden, ieclîcher vünfiu an ein bant. daz sehste vuorte der wîgant mit einer baniere. sus kam gevaren der fiere. Vor der küniginne wart vernomen, wie dâ ein ritter wære komen