*D Dô sprach des werden Lotes sun: "welt ir daz ze liebe tuon iwer vriundinne, ob ez diu ist, daz ir sus valschlîchen list von ir vater kunnet sagen unt dar zuo gern het erslagen ir bruoder, sô ist si ein übel magt, daz si den site an iu niht klagt. Künde si tohter unde swester sîn, sô wære si ir beider vögetîn, daz ir verbæret disen haz. wie stüende iwerem sweher daz, het er triwe zerbrochen? habt ir des niht gerochen, daz ir in tôt gein valsche sagt? sîn sun ist des unverzagt - in sol des niht verdriezen, mag er niht geniezen sîner swester wol gevar -, ze pfande er gît sich selben dar. Hêrre, ich heize Gawan. swaz iu mîn vater hât getân, daz rechet an mir - er ist tôt. ich sol vür sîn lasters nôt, hân ich werdeclîchez leben, ûf kampf vür in ze gîsel geben." Dô sprach der künec: "sît ir daz, dar ich trage unverkornen haz, sô tuot mir iwer werdecheit beidiu liebe und leit.

*m Dô sprach der werde Lotes sun: "wolt ir daz zuo liebe tuon iuwer vriundîn, ob ez diu ist, daz ir sus valschlîchen list von ir vater kunnet sagen und dar zuo gern heten erslagen, ir bruoder, sô ist si ein übel maget, daz si die site an iu niht klaget. künde si tohter oder swester sîn, sô wær si beider vögetîn, daz ir verbæret disen haz. wie stüende iuwerm sweher daz, het er die triuwe zerbrochen? habet ir daz niht gerochen, daz ir in tôt gegen valsch saget? sîn sun des gar ist unverzaget - in sol des niht verdriezen, mac er niht geniezen sîner swester wol gevar -, zuo pfande gît er sich selber dar. hêrre, ich heize Gawan. waz iu mîn vater hât getân, daz rechet an mir - er ist tôt. ich sol vür sîn lasters nôt, hân ich werdeclîchez leben, ûf kampf vür in zuo gîsel geben." Dô sprach der künic: "sît ir daz, dar ich trage unverkornen haz, sô tuot mir iuwer werdicheit beidiu liep und leit.

*G Dô sprach des künic Lotes sun: "welt ir getriuwelîchen tuon iuwer vriundin, ob diu daz ist, daz ir sus valschlîchen list von ir vater kunnet sagen unde dar zuo gerne het erslagen ir bruoder? sist ein übel maget, daz si den site an iu niht klaget. künde si tohter unde swester sîn, si wære ir bruoder vögetîn, daz ir verbæret disen haz. wie stüende iuwerm sweher daz, hete er sîne triuwe zerbrochen? habet ir des niht gerochen, daz ir in tôt gein valsche saget? sîn sun ist des gar unverzaget - in sol des niht verdriezen, mag er des niht geniezen sîner swester wol gevar -, ze pfande er gît sîn leben dar. hêrre, ich heize Gawan. swaz iu mîn vater hât getân, daz rechet an mir - er ist tôt. ich sol vür sînes lasters nôt, hân ich werdeclîchez leben, ûf kampf vür in ze gîsel geben." Dô sprach der künic: "sît ir daz, dar ich trage unverkornen haz, sô tuot mir iuwer werdecheit beidiu liep unde leit.

*T Dô sprach des küneges Lotes sun: "wolt ir daz zuo liebe tuon iuwer vriundîn, ob ez diu ist, daz ir sus valschlîchen list von ir vater kunnet sagen und dar zuo gerne hetet erslagen ir bruoder, sô ist si ein übel maget, daz si den sit an iu niht klaget. künde si swester und tohter sîn, si wære ir beider vögetîn, daz ir verbæret disen haz. wie stüende iuwerme sweher daz, het er triuwe zerbrochen? hât ir des niht gerochen, daz ir in tôt gein valsche saget? sîn sun ist des unverzaget - in sol des niht verdriezen, mac er niht geniezen sîner swester wol gevar -, zuo pfande er gît sîn leben dar. hêrre, ich heize Gawan. waz iu mîn vater hât getân, daz rechet an mir - er ist tôt. ich sol vür sînes lasters nôt, hân ich wirdeclîchez leben, ûf kampf vür in zuo gîsel geben." Dô sprach der künec: "sît ir daz, dar ich trage unverkornen haz, sô tuot mir iuwer wirdecheit beidiu liep und leit.