*D Ich wil iwer bote sîn. gebt mir her daz vingerlîn unt lât mich iwern dienst sagen unt iwern kumber niht verdagen." Der künec des dankte sêre. Gawan vrâgte in mêre: "sît iu versmæhet gein mir strît, nû sagt mir, hêrre, wer ir sît." "ir ensultz niht vür laster doln", Sprach der künec. "mîn name ist iu verholn? mîn vater, der hiez Irot. den ersluoc der künec Lot. ich binz, der künec Gramoflanz. mîn hôhez herze ie was sô ganz, daz ich ze keinen zîten nimmer wil gestrîten, swaz mir tæte ein man, wan einer, heizet Gawan, von dem ich prîs hân vernomen, daz ich gerne gein im wolte komen ûf strît durch mîne riwe. sîn vater, der brach triwe: ime gruoze er mînen vater sluoc. ich hân ze sprechen dâr genuoc. Nû ist Lot erstorben und hât Gawan erworben solhen prîs vor ûz besunder, daz ob der tavelrunder im prîses niemen gelîchen mac. ich geleb noch gein im strîtes tac."

*m ich wil iuwer bote sîn. gebt mir her daz vingerlîn und lât mich iuwern dienst sagen und iuweren kumber niht vertragen." der künic des dankte sêre. Gawan vrâgete in mêre: "sît iu versmâhet gegen mir strît, nû sagt mir, hêrre, wer ir sît." "ir solt ez niht vür laster doln", sprach der künic. "mîn nam ist verholn? mîn vater, der hiez Irot. den ersluoc der künic Lot. ich binz, der künic Gramolanz. mîn hôhez herz ie was sô ganz, daz ich zuo keinen zîten niemer wil strîten, waz mir halt tæte ein man, wan einer, heizet Gawan, von dem ich prîs hân vernomen, daz ich gern gegen im noch wolt komen ûf strît durch mîn riuwe. sîn vater brach sîn triuwe: in dem gruoz er mînen vater sluoc. ich hân zuo rechen dâr genuoc. nû ist Lot erstorben und het Gawan erworben solichen prîs vor ûz besunder, daz ob der tavelrunder im prîses niemen glîchen mac. ich gelebe noch gegen ime strîtes tac."

*G ich wil iuwer bote sîn. gebet mir her ditze vingerlîn unde lât mich iuwern dienst sagen unde iuwern kumber niht verdagen." der künic des danket sêre. Gawan in vrâgte mêre: "sît iu versmâhet gein mir strît, sô saget mir, hêrre, wer ir sît. irn sult ez niht vür laster doln." dô sprach der künic: "mîn nam ist unverholn. mîn vater hiez Gyrot. den sluoc der künic Lot. ich binz, der künic Gramoflanz. mîn hôhez herze was ie sô ganz, daz ich ze deheinen zîten nimmer wil strîten, swaz mir tæte ein man, wan einer, heizet Gawan, von dem ich prîs hân vernomen, daz ich gein im wolde komen ûf kampf durch mîn riuwe. sîn vater brach sîn triuwe: in einem gruoze mînen vater er sluoc. ich hân ze sprechen dâr genuoc. nû ist Lot erstorben unde hât Gawan erworben solhen prîs vor ûz besunder, daz obe der tavelrunder im brîses niemen gelîchen mac. ich gelebe noch gein ime strîtes tac."

*T ich wil iuwer bote sîn. gebet mir her daz vingerlîn und lât mich iuwern dienst sagen und iuwern kumber niht vertragen." der künec des dankete sêre. Gawan in vrâgete mêre: "sît iu versmâhet gein mir strît, sô saget mir, hêrre, wer ir sît." "ir solt ez niht vür laster doln", sprach der künec. "mîn name ist unverstoln. mîn vater, der hiez Irot. den sluoc der künec Lot. ich bin ez, der künec Gramoflanz. mîn hôhez herze was ie sô ganz, daz ich zuo dekeinen zîten niemer wil gestrîten, waz mir tæte ein man, wan einer, heizet Gawan, von dem ich prîs hân vernomen, daz ich gerne gein im wolte komen ûf strît durch mîne riuwe. sîn vater, der brach triuwe: ime gruoze er mînen vater sluoc. ich hân zuo sprechene dâr genuoc. nû ist Lot erstorben und hât Gawan erworben solichen prîs vor ûz besunder, daz ob der tavelrunder im prîses nieman glîchen mac. ich gelebe noch gein im strîtes tac."