*D der wolde, als in sîn hêrre bat, herberge nemen in der stat. dô was im snellîchen gâch. man zôch im soumære nâch. sîn ouge ninder hûs dâ sach, schilde wæren sîn ander dach unt die wende gar behangen mit spern al umbevangen. Diu künegîn von Waleis gesprochen hete ze Kanvoleis einen turnei alsô gezilt, des manegen zagen noch bevilt, swâ er dem gelîche werben siht, von sîner hant es niht geschiht. si was ein maget unt niht ein wîp unt bôt zwei lant unt ir lîp, swer dâ den prîs bezalte. diz mære manegen valte hinderz ors ûf den sâmen. die solch gevelle nâmen, ir schanze wart gein vlust gesaget. des pflâgen helde unverzaget. si tâten rîters ellen schîn. mit hurteclîcher rabbîn wart dâ manec ors ersprenget unt swerte vil erklenget. Ein schifbrücke ûf einem plân gieng über einen wazzers trân, mit einem tor beslozzen. ein knappe unverdrozzen

*m der wolte, als in sîn hêrre bat, herberge nemen an der stat. dô was ime snelleclîchen gâch. man zôch ime soumære nâch. sîn ouge niender hûs dâ sach, schilte enwæren sîn ander dach und die wende gar behangen mit spern alumbevangen. Diu künigîn von Waleis gesprochen hete zuo Kanvoleis einen turnei alsô gezilt, des manigen zagen noch bevilt, wâ er dem glîche werben siht, von sîner hant es niht geschiht. si was ein maget, niht ein wîp und bôt zwei lant und ir lîp, wer dâ den prîs bezalte. diz mære manigen valte hinderz ros ûf den sâmen. die solichiu gevelle nâmen, ir schanze wart gegen †vluht† gesaget. des pflâgen helde unverzaget. si tâten ritters ellen schîn. mit herteclîcher rabîn wart dâ manic ros ersprenget und swerte vil erklenget. Ein schifbrücke ûf einen plân gienc über eines wazzers trân, mit einem tor beslozzen. der knappe unverdrozzen

*G der solt, als in sîn hêrre bat, herberge nemen in der stat. dô was im snellîchen gâch. man zôch im soumære nâch. sîn ouge ninder hûs dâ sach, schilde wæren sîn ander dach unde die wende alsam behangen mit speren umbevangen. diu künigîn von Waleis gesprochen hete vor Kanvoleiz einen turnei alsô gezilt, Des manigen zagen noch bevilt, swâ er dem gelîche werben siht, von sîner hant es niht geschiht. si was ein maget, niht ein wîp. si bôt zwei lant und ir lîp, der dâ den brîs bezalte. diz mære manigen valte hinderz ors ûf den sâmen. die solch gevelle nâmen, der schanze wart ze vlust gesaget. des pflâgen helde unverzaget. si tâten rîters ellen schîn. mit hurticlîcher rabîn wart dâ manic ors ersprenget und swert vil erklenget. ein schifbrücke an einen plân gienc über einen wazzers trân, mit einem tor beslozzen. der knappe unverdrozzen

*T er solt tuon, als in sîn hêrre bat, herberge nemen in der stat. dô was im snellîchen gâch. man zôch im soumære nâch. sîn ouge ninder hûs dâ sach, schilte, die wæren sîn ander dach und die wende alsam behangen mit spern gar umbevangen. Diu künegîn von Waleis gesprochen hete vor Kanvoleis einen turnei alsô gezilt, des manigen zagen noch bevilt, wenner die glîch werben siht, von sîner hant ez niht geschiht. si was ein maget, niht ein wîp. diu bôt zwei lant und ir lîp, wer dâ den prîs bezalte. diz mære manigen valte hinderz ors ûf den sâmen. die solichiu gevelle nâmen, der schanze wart zuo verluste gesaget. des pflâgen helde unverzaget. si tâten rîters ellen schîn. mit hurteclîcher rabîn wart dô manec ors ersprenget und swerte vil erklenget. Ein schifbrücke an eime plân gienc über eines wazzers trân, mit eime tor beslozzen. der knappe unverdrozzen