*D der was nâch rîterschefte gevarn, dâ man niht schilde dorfte sparn. Dô hiez ouch er bereiten sich - sus wert diu âventiure mich - mit spern wol gemâlen, mit grüenen zindâlen. ieslîchez hete ein banier. drî hermîn enker dran sô fier, daz man ir jach vür rîcheit. si wâren lang unt breit unt reichten vaste unz ûf die hant, dô mans zuome sperîser bant dâ niderhalp eine spanne. der wart dem küenen manne hundert dâ bereitet unt wol hin nâch geleitet von sînes neven liuten. êren unt triuten kunden si im mit werdecheit. daz was ir hêrren niht ze leit. er streich - ine weiz wie lange - nâch, unz er geste herberge ersach ime lande ze Waleis. dâ was geslagen vür Kanvoleis manec poulûn ûf die plâne. ine sag ez iu niht nâch wâne, Gebiet er, sô ist ez wâr. sîn volc hiez er ûf halden gar. der hêrre sande vor hin în den kluogen meisterknappen sîn.

*m der was nâch ritterschaft gevarn, dâ man niht schilte dorfte sparn. dô hiez ouch er bereiten sich - sus diu âventiure wert mich - mit speren wol gemâlen, mit grüenen zindâlen. iegelîcher hete eine banier. drîe hermîn anker dran sô fier, daz man ir jach vür rîcheit. si wâren lanc und breit und reicheten vaste ûf die hant, dô man si zuom sperîsen bant dâ niderhalp ein spanne. der wart dem küenen manne hundert dâ bereitet und wol hin nâch geleitet von sînes neven liuten. êren und triuten kunden †† in mit wirdicheit. daz wart ir hêrren niht zuo leit. er streich - in weiz wie lange - nâch, unz er geste herberge ersach im lande zuo Waleis. dâ was geslagen vür Kanvoleis manic poulûn ûf die plâne. ine sage ez iu niht nâch wâne. gebietet ir, sô ist ez wâr. sîn volc hiez er ûf halden gar. der hêrre sante vor ime în den kluogen meisterknappen sîn.

*G der was durch rîterschaft gevaren, dâ man niht schilte dorfte sparen. dô hiez ouch er bereiten sich - sus wert diu âventiure mich - mit speren wol gemâlen von grüenen zendâlen. an ieslîchez ein banier, drî härmîn anker dran sô fier, daz man ir jach vür rîcheit. si wâren lanc und breit unde reichten vaste ûf die hant, dâ man si zuo dem îsen bant niderhalp ein spanne. der wart dem küenen manne wol hundert dâr bereitet unde wol hin nâch geleitet von sînes neven liuten. êren und getriuten, kunden sin mit werdecheit. daz was ir hêrren niht ze leit. er streich - ine weiz wie lange - nâch, unzer geste herberge ersach in dem lande ze Waleis. dâ was geslagen vor Kanvoleis manic pavelûn ûf den plân. ich ensagez iu niht vür wân. gebiet ir, sô ist ez wâr. sîn volc hiez er ûf halden gar unde sande vor im hin în den kluogen knappen meister sîn.

*T der was nâch ritterschaft gevarn, dâ man niht schilte dorfte sparn. Dô hiez er ouch bereiten sich - Sus wert diu âventiure mich - mit spern wol gemâlen von grüenen zindâlen. ieglîcher hete ein banier. drî härmîn enker dran sô fier, daz man ir jach vür rîcheit. die wâren lanc und breit und reicheten vaste unz ûf die hant, sô mans zuo sperîsene bant dâ nidene eine spanne. der wart dem küenen manne hundert wol bereit und wol hinden nâch geleit von sînes neven liuten. êren und triuten kunden si mit wirdecheit. daz was ir hêrren niht ze leit. er streich - ine weiz wie lange - nâch, unz er zuo der geste herberge sach in dem lande ze Waleis. dâ was geslagen vor Kanvoleis manec pavelûn ûf dem plâne. ich ensagez iu niht von wâne. gebietet ir, sô ist ez wâr. sîn volc hiez er ûf halten gar. der hêrre sante vor im hin în den kluogen knappen meister sîn.