*D Mit vorhten luogete oben în; des wart vil bleich ir liehter schîn. diu junge sô verzagete, daz ez diu alte klagete, Arnive, diu wîse. dar umbe ich si noch prîse, daz si den rîter nerte unt im dô sterben werte. Si gie ouch dar durch schouwen. dô wart von der vrouwen zem venster ob în gesehen, daz si neweders mohte jehen: ir künfteclîcher vreuden tage oder immer herzenlîcher klage. si vorhte, der rîter wære tôt; des lêrten si gedanke nôt, wander sus ûf dem lewen lac unt anders deheines bettes pflac. Si sprach: "mir ist von herzen leit, ob dîn getriwiu manheit dîn werdez leben hât verlorn. hâstû den tôt alhie erkorn durch uns vil ellenden diet, sît dir dîn triwe daz geriet, mich erbarmet immer dîn tugent, dû habest alter oder jugent." Hin zalden vrouwen si dô sprach, wand si den helt sus ligen sach: "ir vrouwen, die des toufes pflegen, rüefet alle an got umbe sînen segen."

*m mit vorhten luoget oben în; des wart vil bleich ir schîn. diu süeze sô verzagete, daz ez diu alte klagete, Arnive, diu wîse. dar umb ich si noch prîse, daz si den ritter nerte und ime dô sterben werte. si gienc ouch dâ durch schouwen. dô wart von der vrouwen zem venster oben în gesehen, daz si ietweders moht jehen: ir künftlîcher vröuden tage oder iemer herzelîcher klage. si vorht, der ritter wær tôt; des lêrte si dankes nôt, wan er sus ûf dem lewen lac und anders keines bettes pflac. si sprach: "mir ist von herzen leit, ob dîn getriuwiu manheit †sîn† werdez leben het verlorn. hâstû den tôt alhie erkorn durch vil ellenden diet, sît dîn triuwe daz geriet, mich erbarmet iemer mê dîn tugent, dû habest alter oder jugent." zuo allen den vrouwen si dô sprach, wan si den helt dâ ligen sach: "ir vrouwen, die des pflegen, rüefet alle got an umb sînen segen."

*G Mit vorhten luogete oben în; des wart vil bleich ir schîn. diu junge sô verzagete, daz ez diu alte klagete, Arnive, diu wîse. dar umbe ich si noch brîse, daz si den rîter nerte unde im dô sterben werte. si gienc ouch dar durch schouwen. dô wart von der vrouwen zem venster oben în gesehen, daz si neweders mohte jehen: ir künfticlîchen vröuden tage ode immer herzenlîcher klage. si vorhte, der rîter wære tôt; des lêrten si gedanke nôt, wand er sus ûf dem lewen lac unde anders deheines bettes pflac. si sprach: "mir ist von herzen leit, op dîn getriuwiu manheit dîn werdez leben hât verlorn. hâstû den tôt al hie erkorn durch uns vil ellendiu diet, sît dir dîn triuwe daz geriet, mich erbarmet immer mê dîn tugent, dû habest alter ode jugent." hin ze allen den vrouwen si sprach, wan si den helt sus ligen sach: "ir vrouwen, die des toufes pflegen, rüefet alle an den gotes segen."

*T mit vorhten luogete ob în; des wart vil bleich ir liehter schîn. diu junge sô verzagte, daz ez diu alte klagte, Arnyve, diu wîse. dar umb ich si noch prîse, daz si den ritter nerte und im dô sterben werte. si gienc ouch dar durch schouwen. dô wart von der vrouwen zuom venster oben în gesehen, daz sdeweders mohte jehen: ir künfticlîchen vreuden tage oder immer herzelîche klage. diu vorhte, der ritter wære tôt; des lêrte si gedanken nôt, wan er sus ûf dem lewen lac und anders keines bettes pflac. si sprach: "mir ist von herzen leit, ob dîn getriuwiu manheit dîn werdez leben hât verlorn. hâstû den tôt alhie erkorn durch uns vil ellendiu diet, sît dir dîn triuwe daz geriet, mich erbarmet immer mê dîn tugent, dû habest alter oder jugent." hinz al den vrouwen si sprach, wan si den helt sus ligen sach: "ir vrouwen, die des toufes pflegen, rüeft al an got umb sînen segen."