*D Ime schilde beleip der vierde vuoz. mit bluote gab er solhen guz, daz Gawan mohte vaste stên. her unt dar begundez gên. Der lewe spranc dicke an den gast; durch die nasen manegen pfnast tet er mit bleckenden zenen. wolte man in solher spîse wenen, daz er guote liute geæze, ungern ich bî im sæze. Ez was ouch Gawane leit, der ûf den lîp dâ mit im streit. er hete in sô geletzet, mit bluote wart benetzet al diu kemenâte gar. mit zorne spranc der lewe dar unt wolt in zücken under sich. Gawan tet im einen stich durch die brust unz an die hant, dâ von des lewen zorn verswant, wander strûchte nider tôt. Gawan het die grôze nôt mit strîte überwunden. in den selben stunden dâhter: "waz ist mir nû guot? ich sitze ungern in ditze bluot. Ouch sol ich mich des wol bewarn - diz bette kan sô umbe varn -, daz ich dran sitze oder lige, ob ich rehter wîsheit pflige."

*m in dem schilt bleip der vierde vuoz. mit bluote gap er solichen guz, daz Gawan vaste mohte stân. her und dar begunde ez gân. der lewe spranc dicke an den gast; durch die nase manigen pfnast tet er mit bleckenden zenen. wolt man in solicher spîse wenen, daz er guote liute geæze, ungerne ich bî im sæze. ez was ouch Gawan leit, der ûf den lîp dâ mit im streit. er het in sô geletzet, mit bluote wart genetzet aldiu kemenâte gar. mit zorne spranc der lewe dar: er wolte in zücken under sich. Gawan tet im einen stich durch die brust unz an die hant, dâ von des lewen zorn verswant, wan er strûhte nider tôt. Gawan het die grôze nôt mit strîte überwunden. in den selben stunden dâht er: "waz ist mir nû guot? ich sitze ungerne in diz bluot. ouch sol ich mich des wol bewarn - diz bette kan sô umbe varn -, daz ich dâr sitz oder lige, ob ich rehter witze pflige."

*G Anme schilte beleip der vierde vuoz. mit bluot gab er solhen guz, daz Gawan begunde vaste stên. her unde dar begundez gên. der lewe spranc dicke an den gast; durch die nase manigen pfnast tet er mit bleckenden zenen. wolt man in solher spîse wenen, daz er guote liute geæze, ungerne ich bî im sæze. ez was ouch Gawane leit, der ûf den lîp dâ mit im streit. er het in sô geletzet, mit bluote wart benetzet al diu kemenâte gar. mit zorne spranc der lewe dar unde wold in zücken under sich. Gawan tet im einen stich durch die brust unze an die hant, dâ von des lewen zorn verswant, wan er strûchete nider tôt. Gawan het die grôzen nôt mit strîte überwunden. an den selben stunden dâht er: "waz ist mir nû guot? ich sitze ungerne in ditze bluot. ouch sol ich mich des wol bewarn - ditze bette kan sô umbe varn -, daz ich dran sitze oder lige, obe ich rehter sinne pflige."

*T inme schilte bleib der vierde vuoz. von bluote gap er sölhen guoz, daz Gawan mohte vaste stân. her unde dar begund er gân. Der lewe spranc dicke an den gast; durch die nasen manegen pfnast tet er mit bleckenden zenen. wolte man in sölher spîse wenen, daz er guote liute æze, ungerne ich bî im sæze. ez was ouch Gawane leit, der ûf den lîp mit im dâ streit. er het in sô geletzet, mit bluote wart benetzet al diu kemenâte gar. mit zorne spranc der lewe dar unde wolt in zücken under sich. Gawan gap im einen stich durch die brust unz an die hant, dâ von des lewen zorn verswant, wander strûhte nider tôt. Gawan hete grôze nôt mit strîte überwunden. an den selben stunden dâhter: "waz ist dir nû guot? ich sitze ungerne in diz bluot. ouch sol ich mich des wol bewarn - diz bette kan sus umbe varn -, daz ich dran sitze oder lige, ob ich rehter wîsheit pflige."