*D Der was vreissam getân. von visches hiute truoc er an ein surkôt unt ein bônît unt des selben zwô hosen wît. Einen kolben er in der hende truoc, des kiule grœzer denne ein kruoc was. er gienc gein Gawane her. daz enwas doch ninder sîn ger, wande in sînes kumens dâ verdrôz. Gawan dâhte: "dirre ist blôz; sîn wer ist gein mir harte laz." er rihte sich ûf unde saz, als ob in swære ninder lit. Jener trat hinder einen trit, als ob er wolde entwîchen, und sprach doch zornlîchen: "ir endurfet mich entsitzen niht; ich vüege aber wol, daz iu geschiht, dâ von ir den lîp ze pfande gebt. von des tiuvels kreften ir noch lebt; sol iuch der hie hân ernert, ir sît doch sterbens unerwert. des bringe ich iuch wol innen, als ich nû scheide hinnen." Der vilân trat wider în. Gawan mit dem swerte sîn vome schilde sluoc die zeine. die pfîle algemeine wâren hin durch gedrungen, daz si in den ringen klungen.

*m der was vreislîch getân. von vische hiuten truoc er an ein surkôt und ein bônît und des selben zwô hosen wît. einen kolben er in der hende truoc, des kiule grœzer dan ein kruoc. er gienc gegen Gawane her. daz was ninder sîn beger, wan in sînes komens dâ verdrôz. Gawan gedâhte: "dirre ist blôz; sîn wer ist gegen mir harte laz." er richte sich ûf und saz, als ob im nindert wære †leit†. jener trat hinder einen trit, als ob er wolt entwîchen, und sprach doch zorneclîchen: "ir durft mich entsitzen niht; ich vüege aber wol, daz iu geschiht, dâ von ir den lîp ze pfande gebt. von des tiuvels kreften ir noch lebt; sol iuch der hie hân ernert, ir sît doch sterbens unerwert: †den† bringe ich iuch wol innen, als ich nû scheide hinnen." der vilân trat wider în. Gawan mit dem swerte sîn von dem schilt sluoc die †zuo ein†, wan die pfîl algemein wâren hin durch gedrungen, daz si in den ringen klungen.

*G Er was vreislîch getân. von vischen hiute truoc er an ein surkôt unde ein bônît unde des selben zwuo hosen wît. einen kolben er in der hende truoc, des kiule grœzer danne ein kruoc. er gienc gein Gawan her. daz was doch ninder sîn ger, wande in sînes komens dar verdrôz. Gawan dâhte: "dirre ist blôz; sîn wer ist gein mir harte laz." er rihte sich ûf unde saz, als ob in swære ninder lit. jener trat hinder einen trit, als ob er wolde entwîchen, unde sprach doch zornlîchen: "irn durfet mich entsitzen niht; ich vüege aber wol, daz iu geschiht, dâ von ir den lîp ze pfande gebet. von tiuvels kreften ir noch lebet; sol iuch der hie hân ernert, ir sît doch sterbens unerwert. des bringe ich iuch wol innen, als ich nû scheide hinnen." der vilân trat wider în. Gawan mit dem swerte sîn vome schilte sluoc die zeine. die pfîle algemeine wâren hin durch gedrungen, daz si in den ringen klungen.

*T der was vreislîch getân. von vische hiuten truoc er an. einen kolben er in der hende truoc, Des kolbe was grœzer danne ein kruoc. er gie gein Gawane her. daz enwas dannoch niender sîn ger, wand in sînes komens dâ verdrôz. Gawan dâhte: "dirre ist blôz; sîn wer ist gein mir harte laz." er rihte sich ûf unde saz, als ob im swære niender lit. Jener trat hinder sich einen trit, als ob er wolte entwîchen, unde sprach doch zornlîchen: "irn durfet mîn entsitzen niht; ich gevüege aber wol, daz geschiht, dâ von ir den lîp ze pfande gebet. von des tiuvels krefte ir noch lebet; sol iuch der hie hân ernert, ir sît doch sterbens unerwert. des bring ich iuch wol innen, als ich nû scheide hinnen." Der vilân trat wider în. Gawan mit dem swerte sîn von dem schilte sluoc die zeine. die pfîle algemeine wâren hin durch gedrungen, daz sin den ringen klungen.