*D Die steine wâren ouch verbolt. er hete selten ê gedolt sô swinde würfe ûf in gevlogen. Nû was zem schuzze ûf gezogen vünf hundert armbrust oder mêr. die heten al gelîchen kêr reht ûf daz bette, al dâ er lac. swer ie solher nœte pflac, der mag erkennen pfîle. daz werte kurze wîle, unze daz si wâren versnurret gar. swer wil gemaches nemen war, dern kum an solch bette niht: gemaches im dâ niemen giht. es möhte jugent werden grâ, des gemaches, alsô dâ Gawan an dem bette vant. dannoch sîn herze unt ouch sîn hant der zagheit lâgen eine. die pfîle unt ouch die steine heten in niht gar vermiten; zerquaschiert unt ouch versniten was er durch die ringe. dô het er gedinge, sînes kumbers wære ein ende. dannoch mit sîner hende muoser prîs erstrîten. An den selben zîten tet sich gein im ûf ein tür. ein starker gebûwer gienc dar vür;

*m die stein wâren ouch verbolt. er het selten ê gedolt sô swinde würf ûf in gevlogen. nû was zem †schriff† ûf gezogen vünf hundert armbrust oder mêr. die heten alle glîchen kêr reht ûf daz bette, aldâ er lac. wer solher nœte ie gepflac, der mac erkennen pfîle. daz werte kurzwîle, unz daz si wâren versnurret gar. wer wil gemaches nemen war, der kom an solich gebette niht: gemaches im dâ niemen giht. es möhte jugent werden grâ, des gemaches, aldâ Gawan an dem bette vant. dannoch sîn herz und sîn hant der zageheit lac alein. die pfîl und ouch die stein heten in niht gar vermiten; zerquaschieret und versniten was er durch die ringe. dô het er gedinge, †sîn kumber† wær ein ende. dannoch mit sîner hende muost er prîs erstrîten. an den selben zîten tet sich ûf gegen im ein tor. ein starker bûr gienc dar vor;

*G Die steine wâren ouch verbolt. er hete selten ê gedolt sô swinde würfe ûf in gevlogen. nû was zem schuzze ûf gezogen vünf hundert armbrust ode mêr. die heten al gelîchen kêr rehte ûf daz bette, al dâ er lac. swer ie solher nœte gepflac, der möht erkennen pfîle. daz werte kurze wîle, unze daz si wâren versnurret gar. swer wil gemaches nemen war, derne kome an solch bette niht: gemaches im dâ niemen giht. es möhte jugent werden grâ, des gemaches, alsô dâ Gawan an dem bette vant. dannoch sîn herze unde ouch sîn hant der zageheit lac al eine. die pfîle unde ouch die steine heten in niht gar vermiten; zerquatschiuret unde ouch versniten was er durch die ringe. dô hete er gedinge, sînes kumbers wære ein ende. dannoch von sîner hende muoser prîs erstrîten. an den selben zîten tet sich gein im ûf ein tür. ein grôzer gebûre gienc dar vür;

*T Die steine wâren ouch verbolt. er hete selten ê gedolt sô swinde würfe ûf in gevlogen. Nû was zem schuzze ûf gezogen vünf hundert armbrust oder mêr. die heten alle glîchen kêr rehte ûf daz bette, dâ er lac. swer ie sölher nôt gepflac, der mac erkennen pfîle. daz werte kurze wîle, unze daz si wâren versnurret gar. swer wil gemaches nemen war, der kom an solich bette niht: gemaches im dâ niemen giht. es möhte jugent werden grâ, des gemaches als dâ, als Gawan an dem bette vant. dannoch - sîn herze unde sîn hant - der zageheite lac er aleine. Die pfîle unde die steine heten in niht gar vermiten; zerquaschieret unde versniten was er durch die ringe. dô het er gedinge, sînes kumbers wære ein ende. dannoch mit sîner hende muoser prîs erstrîten. An den selben zîten tet sich gein im ûf ein tür. ein starker gebûr gie her vür;