*D gæbe si ze drîzec jâren, ob man ir wolte vâren. Mitten drûf ein anger - daz Lechvelt ist langer -, vil türne ob den zinnen stuont. uns tuot diu âventiure kunt, dô Gawan den palas sach, dem was alumbe sîn dach reht als pfæwîn gevider gar, lieht gemâl unt sô gevar, weder regen noch der snê entet des daches blicke wê. Innen er was gezieret unt wol gefeitieret, der venster sûle wol ergraben, dâr ûf gewelbe hôhe erhaben. dâr inne bette ein wunder lac her unt dâr besunder; kultern maneger slahte lâgen drûf von rîcher ahte. Dâ wâren die vrouwen gesezzen. diene heten niht vergezzen, sine wæren dan gegangen. von in wart niht enpfangen ir vreuden kunft, ir sælden tac, der gar an Gawane lac. müesen si in doch hân gesehen, waz möhte in liebers sîn geschehen? ir neheiniu daz tuon solte, swie er in dienen wolte.

*m gæbe si zuo drîzic jâren, ob man ir wolte vâren. enmitten dâr ûf lâgen anger; daz Lechvelt ist langer. vil türne ob den zinnen stuont. uns tuot diu âventiur kunt, dô Gawan den palas sach, dem was alumb sîn dach reht als pfâwen gevider gar, lieht gemâl und sô gevar, weder regen noch der snê tet des daches blicke wê. innen er was gezieret und wol gefeitieret, der venster sûl wol ergraben, dâr ûf gewelbe hôch erhaben. dâr in bette ein wunder lac her und dâr besunder; kulter maniger slahte lâgen dâr ûf von rîcher ahte, dâ die vrouwen wâren gesezzen. die heten niht vergezzen, si wæren dan gegangen. von in wart niht enpfangen ir vröuden kunft, ir sælden tac, der gar an Gawanen lac. müesten si in doch hân gesehen, waz möhte in lieber sîn beschehen? ir dekeiniu daz tuon solte, wie er in dienen wolte.

*G Gæben si ze drîzec jâren, op man ir wolde vâren. enmitten drûffe ein anger - daz Lechvelt ist langer -, vil türne obe den zinnen stuont. uns tuot diu âventiure kunt, dô Gawan den palas sach, dem was alumbe sîn dach rehte als pfâwen gevider gar, lieht gemâl unde sô gevar, weder regen noch der snê entet des daches blicke wê. innen er was gezieret unde wol gefeitieret, der venster sûle wol ergraben, dâr ûf gewelbe hôch erhaben. dâr inne bette ein wunder lac her unde dâr besunder; kulter maniger slahte lâgen drûfe von rîcher ahte. dâ wâren die vrouwen gesezzen. diene heten niht vergezzen, sine wæren dane gegangen. von in wart niht enpfangen ir vröuden kumft, ir sælden tac, der gar an Gawane lac. müesen si in doch hân gesehen, waz möhte in liebers sîn geschehen? ir deheiniu daz tuon solde, swie er in dienen wolde.

*T gæbe si ze drîzic jâren, ob man ir solte vâren. mitten drûffe ein anger - daz Lechvelt ist langer -, vil zinnen ob den türnen stuont. uns tuot diu âventiure kunt, Gawan den palas besach, dem was sîn estriches dach als pfæwîn gevider gar, Lieht gemâl unde lieht gevar, weder regen noch der snê tet des daches blicke wê. innen ez was gezieret unde wol gefeitieret, der venster sûlen wâren wol ergraben, dâr ûf gewelbe hôhe erhaben. dâr inne bette ein wunder lac her unde dâr besunder; kulter maneger slahte lâgen drûffe von rîcher ahte. dâ wâren die vrouwen gesezzen. die enheten niht vergezzen, si enwæren dan gegangen. von in wart niht enpfangen ir vröuden kunft, ir sælden tac, der gar an Gawane lac. müesens in doch hân gesehen, waz möht in liebers sîn geschehen? ir deheiniu daz tuon solte, swie er in doch dienen wolte.