*D Gawan sprach: "hie ist niht geschehen, wan des wir vor iu wellen jehen. ich vrâgte dise magt ein teil; daz dûhte si mîn unheil und bat michz, daz ichz lieze. Ob iuch des niht verdrieze, sô lât mîn dienst umb iuch bejagen, wirt, daz ir mirz ruochet sagen umbe die vrouwen ob uns hie. ich envriesch in al den landen nie, dâ man möhte schouwen sô manege clâre vrouwen mit sô liehtem gebende." Der wirt want sîne hende; dô sprach er: "hêrre, vrâgets niht durch got. hêrre, dâ ist nôt ob aller nôt." "Sô muoz ich doch ir kumber klagen", sprach Gawan. "wirt, ir sult mir sagen: war umbe ist iu mîn vrâgen leit?" "Hêrre, durch iwer manheit - kunnet ir vrâgen niht verbern, sô welt ir lîhte vürbaz gern. daz lêret iuch herzen swære unt machet uns vreuden lære, mich unt elliu mîniu kint, die iu ze dienste erborn sint." Gawan sprach: "ir sult mirz sagen. welt aber ir michz gar verdagen, daz iwer mære mich vergêt, ich vreische iedoch wol, wie ez dâ stêt."

*m Gawan sprach: "hie ist niht beschehen, wan daz wir vor iu wellen jehen. ich vrâgte dise maget ein teil; daz dûhte si ein unheil und bat mich, daz ich ez lieze. ob iuch des niht verdrieze, sô lât mîn dienst umb iuch bejagen, hêr wirt, daz ir mirz ruochet sagen umb die vrouwen ob uns hie. ich ervriesch in allen landen nie, dô man möhte schouwen sô manige clâre juncvrouwen mit solichem gebende." der wirt want sîn hende; er sprach: "vrâgt niht durch got. hêrre, dâ ist nôt ob aller nôt." "sô muoz ich doch ir kumber klagen", sprach Gawan. "wirt, ir solt mir sagen: war umb ist iu mîn vrâgen leit?" "hêrre, durch iuwer manheit - †dô† kunnet ir vrâgen niht enbern, sô wellet ir lîht vürbaz gern. daz lêret iuch herzen swære und machet uns vröuden lære, mich und alliu mîniu kint, die iu zuo dienst erborn sint." Gawan sprach: "ir solt mirz sagen. welt aber ir mirz gar verdagen, daz iuwer mære mich vergât, ich vreisch doch wol, wie ez dâ stât."

*G Gawan sprach: "hie ist niht geschehen, wan des wir vor iu wellen jehen. ich vrâgete dise maget ein teil; daz dûhte si mîn unheil unde bat mich, daz ichz lieze. ob iuch des niht verdrieze, sô lât mîn dienst umbe iuch bejagen, wirt, daz ir mirz ruochet sagen umbe die vrouwen, die obe uns hie. ich engevriesch in allen landen nie, dâ man möhte schouwen sô manige clâre vrouwen mit sô liehtem gebende." der wirt want sîne hende; dô sprach er: "hêrre, vrâget es niht durch got. dâ ist nôt al über nôt." "sô muoz ich doch ir kumber klagen", sprach Gawan. "wirt, ir sult mir sagen: war umbe ist iu mîn vrâgen leit?" "hêrre, durch iuwer manheit - kunnet ir vrâgen niht verberen, sô welt ir lîhte vürbaz geren. daz lêret iuch herzen swære unde machet uns vröuden lære, mich unde elliu mîniu kint, diu iu ze dienste erboren sint." Gawan sprach: "ir sult mirz sagen. welt aber ir mich ez gar verdagen, daz iuwer mære mich vergêt, ich vreische iedoch wol, wie ez dâ stêt."

*T Gawan sprach: "hie nist niht geschehen, wan des wir wellen vor iu verjehen. ich vrâgete dise maget ein teil; daz dûhte si mîn unheil unde bat mich, daz ichz lieze. ob iuch des niht verdrieze, sô lât mîn dienst umbe iuch bejagen, daz ir mir geruochet sagen umbe dise vrouwen hie. ichn veriesch in allen landen nie, dô man möhte schouwen sô manege schœne vrouwen mit sô liehtem gebende." Der wirt want sîne hende; er sprach: "hêrre, vrâget niht durch got. diz ist ein nôt vor aller nôt." "Sô muoz ich doch ir kumber klagen", sprach Gawan. "hêr wirt, ir sult mir sagen: war umbe ist iu mîn vrâgen leit?" "Hêrre, durch iuwer manheit - kunnet ir vrâgens niht enbern, sô welt ir lîhte vürbaz gern. daz lêret iuch herzen swære unde machet uns vröuden lære, mich unde alliu mîniu kint, die iu ze dienste geborn sint." Gawan sprach: "ir sult mir sagen. welt aber ir michs gar verdagen, daz iuwer mære mich vergêt, ich vreische doch wol, wiez dâ stêt."