*D Durch iwer güete, wer die sîn." dô erschrac daz juncvröuwelîn unt sprach: "hêrre, nû vrâgt es niht. ich bin, dius nimmer iu vergiht. ichn kan iu niht von in gesagen; ob ichz halt weiz, ich solz verdagen. lâtz iu von mir niht swære sîn und vrâget anderre mære. daz rât ich, welt ir volgen mir." Gawan sprach aber wider zir, Mit vrâge er gienc dem mære nâch umb al die vrouwen, die er dâ sach sitzende ûf dem palas. diu magt wol sô getriwe was, daz si von herzen weinde unt grôze klage erscheinde. Dennoch was ez harte vruo; innen des gie ir vater zuo. der liez ez âne zürnen gar, ob diu maget wol gevar ihtes dâ wære betwungen unt ob dâ was gerungen. dem gebârte si gelîche, diu magt zühte rîche, wande si dem bette nâhe saz. daz liez ir vater âne haz. Dô sprach er: "tohter, weinet niht. swaz in schimpfe alsus geschiht, ob daz von êrste bringet zorn, der ist schiere dâ nâch verkorn."

*m durch iuwer güete, wer die sîn." dô erschrac daz juncvröuwelîn. si sprach: "hêrre, nû vrâget es niht; ich bin, diu es niemer iu vergiht. ich kan iu niht von im gesagen; ob ich ez joch weiz, ich solte ez verdagen. lâtz iu von mir niht swære †† und vrâget ander mære. daz râte ich, wellet ir volgen mir." Gawan sprach aber wider zuo ir, mit vrâge er gienc dem mære nâch umb alle die vrouwen, die er dâ sach sitzen ûf dem palas. diu maget sô getriuwe was, daz si von herzen weinde und grôze klage erscheinde. dannoch was ez harte vruo; innen des gienc ir vater zuo. der liez ez âne zürnen gar, ob diu maget wol gevar ihtes dâ wær betwungen und ob dâ was gerungen. dem gebârte si glîch, diu maget zühte rîch, wan si dem bette nâhe saz. †dô† liez ir vater âne haz. er sprach: "tohter, nû weine niht. waz in schimpf alsus geschiht, ob daz von êrste bringet zorn, der ist schier dâ nâch verkorn."

*G Durch iuwer güete, wer die sîn." dô erschrac daz juncvröuwelîn. si sprach: "hêrre, nû vrâget es niht; ich bin, dius nimmer iu vergiht. ich enkan iu niht von in gesagen; ob ich ez halt weiz, ich sol ez verdagen. lât ez iu niht sîn swære unde vrâget anderre mære. daz rât ich, welt ir volgen mir." Gawan sprach aber wider zir, mit vrâge er gienc dem mære nâch umbe al die vrouwen, die er dâ sach sitzende ûf dem palas. diu maget wol sô getriuwe was, daz si von herzen weinde unde grôze klage erscheinde. dannoch was ez harte vruo; innen des gienc ir vater zuo. der liez ez âne zürnen gar, ob diu maget wol gevar ihtes dâ wære betwungen unde ob dâ was gerungen. dem gebârte si gelîche, diu maget zühte rîche, wande si dem bette nâhen saz. daz liez ir vater âne haz. dô sprach er: "tohter, weinet niht. swaz in schimpfe alsus geschiht, ob daz von êrste bringet zorn, der ist schiere dâ nâch verkorn."

*T durch iuwer güete, wer si sîn." Dô sprach daz juncvröuwelîn: "hêrre, nûne vrâget niht. ich bin, dius iu niemer vergiht. ich enkan iu niht von in gesagen; ob ichz halt weiz, ich solz verdagen. Lâtz iu niht sîn swære unde vrâget anderre mære. daz rât ich, welt ir volgen mir." Gawan sprach aber wider zir, mit vrâge gienc er dem mære nâch umbe al die vrouwen, die er dâ sach sitzen ûf dem palas. diu maget wol getriuwe was, daz si von herzen weinde unde grôze klage erscheinde. Dannoch was ez harte vruo; indes gienc ir vater zuo. der liez ez âne zürnen gar, ob diu maget wol gevar ihtes wære betwungen oder ob dâ wære gerungen. dem gebârte si glîche, diu maget zühte rîche, wande si dem bette nâhe saz. daz liez ir vater âne haz. Dô sprach er: "vrouwe, weinet niht. swaz in schimpfe sus geschiht, ob daz von êrst bringet zorn, der ist schiere dâ nâch verkorn."