*D "Swaz dort geschach - dû stêst nû hie. dû hœrest ouch vor dir sprechen ie, swer dem andern half, daz er genas, daz er sîn vîent dâ nâch was. ich tuon als die bî witzen sint. sich vüeget baz, ob weinet ein kint denn ein bartohter man. ich wil diz ors al eine hân." Mit sporn erz vaste von im reit. daz was doch Gawane leit. Der sprach zer vrouwen: "ez kom alsô: der künec Artus, der was dô in der stat ze Dianazdrun, mit im dâ manec Bertun. dem was ein vrouwe dar gesant durch botschaft in sîn lant. Ouch was der ungehiure ûz komen durch âventiure. er was gast unt si gestîn. dô geriet im sîn kranker sin, daz er mit der vrouwen ranc nâch sînem willen, ân ir danc. hin ze hove kom daz geschrei. der künec rief lûte: 'heiâ hei!' diz geschach vor einem walde; dar gâhten wir alle balde. ich vuor den andern verre vor unt begreif des schuldehaften spor. gevangen vuort ich wider dan vür den künec disen man.

*m "waz dort geschach - dû stâst nû hie. nû hôrtestû doch sprechen ie, wer dem andern half, daz er genas, daz er dâ nâch sîn vîent was. ich tuon als die bî witzen sint. sich vüeget baz, ob weinet ein kint dan ein bartohter man. ich wil diz ros alein hân." mit sporn er vaste von im reit. daz was doch Gawanen leit. Gawan sprach: "ez kam alsô: der künic Artus, der was dô in der stat zuo Dianazdrun, mit im dâ maniger Britun. dô wart ein vrouwe dar gesant durch botschaft in sîn lant. ouch was diser ungehiure ûz komen durch âventiure. er was gast und si gestîn. dô geriet im sîn kranker sin, daz er mit der vrouwen ranc nâch sînem willen, âne ir danc. hin zuo hove kam daz geschrei. der künic rief: 'heiâ hei!' diz geschach vor einem walde; dar gâheten wir al balde. ich vuor den andern verre vor und begreif des schuldehaften spor. gevangen vuorte ich wider dan vür den künic disen man.

*G "Swaz dort geschach - dû stêst nû hie. dû hôrtest ouch vor dir sprechen ie, swer dem andern half, daz er genas, daz er sîn vîent dar nâch was. ich tuon als die bî witzen sint. sich vüeget baz, ob weint ein kint danne ein bartohter man. ich wil ditze ors al eine hân." mit sporn erz vaste von im reit. daz was doch Gawanen leit. er sprach zer vrouwen: "ez kom alsô: der künic Artus, der was dô in der stat ze Dianazdrun, mit im dâ manic Britun. dem was ein vrouwe dar gesant durch botschaft in sîn lant. ouch was dirre ungehiure ûz komen durch âventiure. er was gast unde si gestîn. dô geriet im sîn kranker sin, daz er mit der vrouwen ranc nâch sînem willen, ân ir danc. hin ze hove kom daz geschrei. der künic rief lûte: 'heiâ hei!' daz geschach vor einem walde; dar gâhten wir alle balde. ich vuor den andern verre vor und begreif des schuldehaften spor. gevangen vuorte ich wider dan vür den künic disen man.

*T "Swaz dort geschach - dû stêst nû hie. dû hôrtes vor dir sprechen ie, swer dem andern half, daz er genas, daz er sîn vîent dâ nâch was. Ich tuon als die bî witzen sint. sich vüeget baz, ob weinet ein kint danne ein bartohter man. ich wil diz ors aleine hân." mit sporn erz vaste von im reit. daz was iedoch Gawane leit. Er sprach zer vrouwen: "ez kom sô, daz der künec Artus was dô in der stat ze Dyanarsun, bî im dâ manec Britun. dem was ein maget dar gesant durch botschaft in sîn lant. ouch was dirre ungehiure ûz komen durch âventiure. er was gast unde si gestîn. dô riet im sîn kranker sin, daz er mit der vrouwen ranc nâch sînem willen, gar ân ir danc. hin ze hove kom daz geschrei. der künec rief lûte: 'heiâ hei!' diz geschach vor einem walde; dar kêrte wir albalde. ich vuor den andern verre vor unde ergreif des schuldehaften spor. gevangen vuortich disen man vür den künec under dan.