*D Gawan daz klagete sêre. diu vrouwe es lachete mêre, denn inder schimpfes in gezam. sît man im daz ors genam, ir süezer munt hin zim dô sprach: "vür einen rîter ich iuch sach. dar nâch in kurzen stunden wurdet ir arzet vür die wunden. nû müezet ir ein garzûn wesen. sol iemen sîner kunst genesen, sô trœstet iuch iwerre sinne. gert ir noch mîner minne?" "jâ, vrouwe", sprach hêr Gawan, "möhte ich iwer minne hân, diu wære mir lieber danne iht. ez enwont ûf erde nihtes niht under krône unt alle, die krône tragent unt die vreudehaften prîs bejagent, der gein iu teilte ir gewin, sô ræt mir mînes herzen sin, daz ichz in lâzen solte. iwer minne ich haben wolte. mag ich der niht erwerben, sô muoz ein sûwerez sterben sich schiere an mir erzeigen. ir wüestet iwer eigen. ob ich vrîheit ie gewan, ir sult mich doch vür eigen hân; daz dunket mich iwer ledec reht. nû nennet mich rîter oder kneht,

*m Gawan klagte sêre, diu vrouwe lachete mêre. ir süezer munt hin zuo †ir† sprach: "vür einen ritter ich iuch sach. dar nâch in kurzen stunden wurdet ir arzet vür die wunden. nû müezet ir ein garzûn wesen. sol iemen sîner kunst genesen, sô trœstet iuch iuwer sinne. gert ir noch mîner minne?" "jâ, vrouwe", sprach hêr Gawan, "möht ich noch iuwer minne hân, diu wær mir lieber dan iht. ez wonte ûf erden nihtes niht under krône und alle, die krône tragent und die vröudehaften prîs bejagent, der gegen iu teilte ir gewin, sô râtet mir mînes herzen sin, daz ich in lâzen solte. iuwer minne ich haben wolte. mac ich der niht erwerben, sô muoz ich schier sterben. daz muoz sich balde erzeigen. ir wüestet iuwer eigen. ob ich vrîheit ie gewan, ir solt mich doch vür eigen hân; daz dunket mich iuwer ledic reht. nû nennet mich ritter oder kneht,

*G Gawan daz klagete sêre. diu vrouwe es lachete mêre, danne iender schimpfes in gezam. sît daz man im daz ors genam, ir süezer munt hin zim dô sprach: "vür einen rîter ich iuch sach. dar nâch in kurzen stunden wurdet ir arzet vür die wunden. nû müezet ir ein garzûn wesen. sol iemen sîner kunst genesen, sô trœstet iuch iuwer sinne. gert ir noch mîner minne?" "jâ, vrouwe", sprach hêr Gawan, "möhte ich iuwer minne hân, diu wære mir lieber danne iht. ez wont ûf erden nihtes niht under krône unde alle, die krône tragent unde die vröudehaften brîs bejagent, der gein iu teilte ir gewin, sô rætet mir mînes herzen sin, daz ichz in lâzen solde. iuwer minne ich haben wolde. mag ich der niht erwerben, sô muoz ein sûrez sterben sich schiere an mir erzeigen. ir wüestet iuwer eigen. obe ich vrîheit ie gewan, ir sult mich doch vür eigen hân; daz dunket mich iuwer ledic reht. nû nennet mich rîter oder kneht,

*T Gawan daz klagete sêre. diu vrouwe es lachete mêre, dan iender schimpfes im gezam. sît daz man im daz ors dâ nam, Ir süezer munt hin zim dô sprach: "vür einen rîter ich iuch ê sach. dâ nâch in kurzen stunden wurdet ir arzât vür die wunden. nû müezet ir ein garzûn wesen. sol iemen sîner kunst genesen, sô trœstet iuch iuwerre sinne. gert ir noch mîner minne?" "Jâ, vrouwe", sprach hêr Gawan, "möhtich iuwer minne hân, diu wære mir lieber danne iht. ez enwont ûf der erden nihtes niht under krône unde alle, die krône tragent unde die vreudehaften prîs bejagent, der gegen iu teilte ir gewin, sô râtet mir mînes herzen sin, daz ichz in lâzen solte unde iuwer minne haben wolte. mag ich der niht erwerben, sô muoz ein sûrez sterben sich schiere an mir erzeigen. ir wüestet iuwer eigen. ob ich vrîheit ie gewan, ir sult mich doch vür eigen hân; daz dunket mich iuwer ledic reht. nû nennet mich rîter oder kneht,