*D Wellestû behalten dînen lîp, sô lâ diz trügehafte wîp rîten und kêre von ir. nû prüeve selbe ir rât an mir. doch möhte ich harte wol genesen, ob ich bî ruowe solte wesen. des hilf mir, getriwer man." Dô sprach mîn hêr Gawan: "nim aller mîner helfe wal." "hie nâhen stêt ein spitâl", Alsô sprach der rîter wunt. "kœme ich dar in kurzer stunt, dâ möht ich ruowen lange zît. mîner vriwendinne runzît hab wir noch stênde al starkez hie. nû heb si drûf, mich hinder sie." Dô bant der wol geborne gast der vrouwen pfert von dem ast; er woltz ziehen nâher ir. der wunde sprach: "hin dan von mir! wie ist iuch tretens mich sô gâch?" er zôch ez ir verre; diu vrouwe gienc nâch, sanfte unt doch niht drâte, al nâch ir mannes râte. Gawan ûf daz pfert si swanc. innen des der wunde rîter spranc ûf Gawans kastelân. ich wæne, daz was missetân. er unt sîn vrouwe riten hin; daz was ein sündehaft gewin.

*m wellest dû behalten dînen lîp, sô lâz daz trügenhafte wîp rîten und kêre von ir. nû brüefe selbe ir rât an mir. doch möht ich harte wol genesen, ob ich bî triuwe solte wesen. des hilf dû mir, getriuwer man." dô sprach mîn hêrre Gawan: "nim aller mîner helfe wal." "hie nâhen stât ein spitâl", alsô sprach der ritter wunt. "kœme ich dar in kurzer stunt, dâ möht ich ruowen lange zît. mîner vriundîn runzît hân wir noch stên al starkez hie. nû hebe si dar ûf; nû hinder sie!" dô bant der wol geborne gast der vrouwen pfert von dem ast und wolt ez ziehen nâher ir. der wunde sprach: "hin dan von mir! wie ist iuch tretens mich sô gâch?" er zôch ez verre; diu vrouwe gie nâch, vil sanft und niht zuo drât, al nâch ir mannes rât. Gawan ûf daz pfert si swanc. innen des der wunde ritter spranc ûf Gawanes kastelân. ich wæne, daz wær missetân. er und diu vrouwe riten hin; daz was ein sündehaft gewin.

*G Wellestû behalten dînen lîp, sô lâ ditze trügehafte wîp rîten unde kêre von ir. nû prüeve selbe ir rât an mir. doch möht ich harte wol genesen, obe ich bî ruowe solde wesen. des hilf mir, vil getriuwer man." dô sprach mîn hêrre Gawan: "nim aller mîner helfe wal." "hie nâhen stêt ein spitâl", alsô sprach der rîter wunt. "kœme ich dar in kurzer stunt, dâ möht ich ruowen lange zît. mîner vriundinne runzît habe wir noch stênde al starkez hie. nû hebe si drûf, mich hinder sie." dô bant der wolgeborn gast der vrouwen pfert von dem ast; er wold ez ziehen nâher ir. der wunde sprach: "hin dan von mir! wie ist iuch tretens mich sô gâch?" er zôhez ir verre; diu vrouwe gienc nâch, sanfte, doch niht drâte, al nâch ir mannes râte. Gawan ûf daz pfert si swanc. innen des der wunde rîter spranc ûf Gawans kastelân. ich wæne, daz was missetân. er unde diu vrouwe riten hin; daz was ein schadehaft gewin.

*T wellestû behalten dînen lîp, sô lâ diz trügehafte wîp rîten unde kêre von ir. nû prüeve selbe ir rât an mir. doch möhtich harte wol genesen, ob ich bî ruowe solte wesen. dar hilf mir, getriuwer man." Dô sprach mîn hêr Gawan: "nim aller mîner helfe wal." "hie nâhe stât ein spitâl", alsô sprach der rîter wunt. "kœme ich dar in kurzer stunt, dâ möhtich ruowen lange zît. mîner vrouwen runzît habe wir stênde alstarkez hie. nû hebe si drûf, mich hinder sie." Dô bant der wol geborne gast der vrouwen pfert von dem ast; er woltez ziehen nâher ir. Der wunde sprach: "hin dan von mir! wie ist iuch tretens mich sô gâch?" er zôhez verre; diu vrouwe gie nâch, sanfte unde doch niht drâte, al nâch ir mannes râte. Gawan ûf daz pfert si swanc. in des der wunde rîter spranc ûf Gawanes kastelân. ich wæne, daz was missetân. er unde sîn wîp, die riten hin; daz was ein sündehaft gewin.