*D Ich bin noch ledec vor solhem pîn. welt ab ir unt diu vrouwe mîn mir smæhe rede bieten, ir müezet iuch eine nieten, daz ir wol meget vür zürnen hân. swie vreissam ir sît getân, ich enbære doch sanfte iwerre drô." Gawan in bîme hâre dô begreif unt swang in underz pfert. der knappe wîs und wert vorhtlîch wider sach. sîn igelmæzec hâr sich rach; daz versneit Gawane sô die hant, diu wart von bluote alrôt erkant. Des lachte diu vrouwe; si sprach: "vil gerne ich schouwe iuch zwêne sus mit zornes site." si kêrten dan, daz pfert lief mite. Si kômen, dâ si vunden ligen den rîter wunden. mit triwen Gawans hant die würze ûf die wunden bant. der wunde sprach: "wie ergie ez dir, sît daz dû schiede hie von mir? dû hâst eine vrouwen brâht, diu dînes schaden hât gedâht. von ir schulden ist mir sô wê; in Una Stroyt Vie half si mir scherpfer tjoste ûfs lîbes und guotes koste.

*m ich bin noch ledic mit solher pîn. welt aber ir und diu vrouwe mîn mir smæhe rede bieten, ir müezet iuch eine nieten, daz ir wol muget vür zorn hân. wie vreislîch ir sît getân, ich enbære doch sanfte iuwer drô." Gawan in bî dem hâr dô begreif und swanc in under daz pfert. der knappe wîse und wert vorhtlîchen wider sach. sîn igelmæzic hâr sich rach; daz versneit sô Gawanes hant, daz si wart rôt von bluote erkant. des lachete diu vrouwe; si sprach: "vil gerne ich schouwe iuch zwêne sus mit zornes site." si kêrten - daz pfert lief mite - und kômen, dâ si vunden ligen den ritter wunden. mit triuwen Gawanes hant die würz ûf die wunde bant. der wunde sprach: "wie ergienc ez dir, sît daz dû schiede von mir? dû hâst ein vrouwen brâht, diu dînes schaden gedâht. von ir schulde ist mir sô wê; in Avestroit Mavoie half si mir scharfer joste ûf lîbes und guotes koste.

*G Ich bin noch ledic vor solhem pîn. welt aber ir unde diu vrouwe mîn mir smæhe rede bieten, ir müezet iuch eine nieten, daz ir wol müget vür zorn hân. swie vreislîche ir sît getân, ichne enbær doch samfte iuwer drô." Gawan in bî dem hâre dô begreif unde swanc in underz pfert. der knappe wîse unde wert vorhtlîche wider sach. sîn igelmæzic hâr sich rach; daz versneit Gawan alsô die hant, diu wart von bluote al rôt erkant. des lachete diu vrouwe; si sprach: "vil gerne ich schouwe iuch zwêne sus mit zornes site." si kêrten dan, daz pfert lief mite. si kômen, dâ si vunden ligen den rîter wunden. mit triuwen Gawans hant die würz ûf die wunden bant. der wunde sprach: "wie ergienc ez dir, sît daz dû schiede hie von mir? dû hâst ein vrouwen brâht, diu dînes schaden hât gedâht. von ir schulden ist mir sô wê; in Avestroit Mavoie half si mir scharfer tjoste ûf lîbes unde ûf guotes koste.

*T "Ich bin noch ledic vor solhem pîn. welt aber ir unde diu vrouwe mîn mir smæhe rede bieten, ir müezet iuch eine nieten, daz ir wol muget vür zürnen hân. swie engeslîche ir sît getân, ich enbære doch sanfte iuwerre drô." Gawan in bî dem hâre dô nam unde swanc in underz pfert. Der knappe wîse unde wert vorhtlîche wider sach. sîn igelmæzic hût sich rach; daz versneit Gawane dô die hant, daz si wart von bluote alrôt bekant. Des lachete dô diu vrouwe; si sprach: "vil gerne ich schouwe iuch zwêne sus mit zornes site." Si kêrten dan - daz pfert lief mite - unde kômen, dâ si vunden ligen den rîter wunden. Mit triuwen Gawanes hant die würz ûf die wunden bant. Der wunde sprach: "wie ergiengez dir, sît daz dû schiede hie von mir? dû hâst eine vrouwen brâht, diu dîner schanden hât gedâht. von der schult ist mir sô wê; In Avestroyt Mavoie half si mir scharpfer tjoste gegen mînes verhes koste.