*D Ir habt kumbers mêr denne ich gesehen. lât iwern trôst an mir geschehen, daz ich iwer hilfe schouwe." "ich tuon", sprach er, "vrouwe. disem rîter wold ich sterben wern; ich trûwet in harte wol ernern, het ich eine rœren. sehen und hœren möht ir in dicke noch gesunt, wan er ist niht ze verhe wunt; daz bluot ist sînes herzen last." er begreif der linden einen ast, er sleiz einen louft drabe als ein rôr - er was zer wunden niht ein tôr -, den schoup er zer tjost in den lîp. dô bat er sûgen daz wîp, unz daz bluot gein ir vlôz. des heldes kraft sich ûf entslôz, daz er wol redte und sprach. Dô er Gawanen ob im ersach, dô dankte er im sêre unt jach, er het des êre, daz er in schiede von unkraft, unt vrâgt in, ob er durch rîterschaft wære komen dar gein Logroys. "ich streich ouch verre von Punturtoys unt wolde hie âventiure bejagen. von herzen sol ich immer klagen, daz ich sô nâhen geriten bin. ir sultz ouch mîden, habt ir sin.

*m ir habt kumbers mêr dan ich gesehen. lât iuwern trôst an mir geschehen, daz ich iuwer helfe schouwe." "ich tuon", sprach er, "vrouwe. disen ritter wolt ich sterben wern; ich trûwet in harte wol ernern, het ich ein rœren. beidiu sehen und hœren meht irn dicke gesunt, wand er ist niht zuo verhe wunt; daz bluot ist sînes herzen last." er begreif der linden ast, er sleif ein loup, dar ab ein rôr - er was zuor wunden niht ein tôr -, den schoup er zer just in den lîp. dô bat er sûgen daz wîp, unz daz bluot wider gegen im vlôz. des heldes kraft sich ûf entslôz, daz er wol redet und sprach. dô er Gawanen ob im ersach, dô dankte er im sêre und jach, er het es êre, daz er in scheide von unkraft, und vrâgete in, ob er durch ritterschaft wær komen dâ gên Logrois. "ich streich ouch verre ûz Ponturtois und wolte âventiure hie bejagen. von herzen sol ichs iemer klagen, daz ich sô nâhe geriten bin. ir solt ez ouch mîden, habt ir sin.

*G Ir habet kumbers mê danne ich gesehen. lât iuwern trôst an mir geschehen, daz ich iuwer helfe schouwe." "ich tuon", sprach er, "vrouwe. disem rîter wolt ich sterben wern; ich trûwete in harte wol ernern, het ich eine rœren. sehen unde hœren möht ir in dicke noch gesunt, wan er ist niht ze verhe wunt; daz bluot ist sînes herzen last." er begreif der linden einen ast, er sleiz einen louft drabe als ein rôr - er was zer wunden niht ein tôr -, den schoup er zer tjost in den lîp. dô bat er sûgen daz wîp, unze daz bluot wider gein ir vlôz. des heldes kraft sich ûf entslôz, daz er wol reite unde sprach. dô er Gawanen ob im sach, dô genâdet er im sêre unde jach, er hetes êre, daz er in schiede von unkraft, unde vrâget in, ob er durch rîterschaft wære komen dar gein Logroys. "ich streich ouch verre von Ponturtoys unde wolde hie âventiure bejagen. von herzen muoz ichz immer klagen, daz ich sô nâhen geriten bin. ir sultz ouch mîden, habet ir sin.

*T Ir habt kumbers mê danne ich gesehen. lât iwern trôst an mir geschehen, daz ich iuwer helfe schouwe." "ich tuon", sprach er, "liebiu vrouwe. disen ritter wold ich sterben wern; ich trûwete in harte wol ernern, het ich eine rœren. sehen unde hœren möht ir in dicke noch gesunt, wan er ist niht ze verhe wunt; daz bluot ist sînes herzen last." er begreif der linden einen ast, er sleiz drabe einen louft als einen rôr - er was zer wunden niht ein tôr -, den schoup er zer tjost in den lîp. dô bat er sûgen daz wîp, unz daz daz bluot gein ir vlôz. des heldes kraft sich ûf entslôz, daz er wol rette unde sprach, dô er Gawanen ob im sach. des danket er im sêre unde jach, er het es êre, daz er in schiet von unkraft, unde vrâget in, ob er durch ritterschaft wære komen dar gein Logrois. "ich streich ouch verre von Puntertoys unde wolde hie âventiure bejagen. von herzen sol ichs iemer klagen, daz ich sô nâhen geriten bin. ir sultz ouch mîden, habet ir sin.