*D Wiez Gawane komen sî, der ie was missewende vrî, sît er von Schanpfanzun geschiet, ob sîn reise ûf strît geriet, des jehen, die ez dâ sâhen. er muoz nû strîte nâhen. Eines morgens kom mîn hêr Gawan geriten ûf einen grüenen plân. dâ sach er blicken einen schilt - dâ was ein tjoste durch gezilt - unt ein pfert, daz vrouwen gereite truoc; des zoum unt satel was tiur genuoc. ez was gebunden vaste zuome schilte an einem aste. dô dâhter: "wer mac sîn diz wîp, diu alsus werlîchen lîp hât, daz si schildes pfligt? ob si sich strîtes gein mir bewigt, wie sol ich mich ir wern? ze vuoze trûwe ich mich wol ernern. wil si die lenge ringen, si mac mich nider bringen; ich erwerbes haz ode gruoz, sol dâ ein tjost ergên ze vuoz. ob ez halt vrou Camille wære, diu mit rîterlîchem mære vor Laurente prîs erstreit, wære si gesunt, als si dort reit, ez würde iedoch versuochet an sie, ob si mir strîten büte al hie."

*m wie ez Gawan komen sî, der ie was missewende vrî, sît er von Schanfanzun schiet, ob sîn reise ûf strît geriet, daz jehen, die ez dâ sâhen. er muoz nû strîte nâhen. Eines morgens kam hêr Gawan geriten ûf einen grüenen plân. dâ sach er blicken einen schilt - dâ was ein juste durch gezilt - und ein pfert, daz vrouwen gereit truoc; des zoum und satel was tiur genuoc. ez was gebunden vast bî dem schilt zuo einem ast. dô gedâht er: "wer mac sîn diz wîp, diu alsus werlîchen lîp het, daz si schiltes pfliget? ob si sich strîtes gegen mir bewiget, wie sol ich mich ir dan erwern? zuo vuoze getriuwe ich mich wol nern. wil aber si dan ringen, si mac mich nider bringen; ich erwerbe sîn haz oder †guot†, sol dâ ein juste ergân zuo vuoz. ob ez halt vrouwe Camille wære, diu mit ritterlîchem mære vor Laurente prîs erstreit, wær si lebende, als si dort reit, ez würde iedoch versuochet an sie, ob si mir strîten büte hie."

*G Wiez Gawane komen sî, der ie was missewende vrî, sît er von Tschanfenzune schiet, op sîn reise ûf strît geriet, des jehen, diez dâ sâhen. er muoz nû strîte nâhen. eines morgens kom mîn hêr Gawan geriten ûf einen grüenen plân. dâ sach er blîchen einen schilt - dâ was tjoste durch gezilt - unde ein pfert, daz vrouwen gereit truoc; daz was der zoum unde satel tiur genuoc. ez was gebunden vaste zuome schilte an einem aste. dô dâht er: "wer mac sîn daz wîp, diu alsus werlîchen lîp hât, daz si schildes pfliget? op si sich strîtes gein mir bewiget, wie sol ich mich danne ir wern? ze vuoze trûwe ich mich wol ernern. wil si die lenge ringen, si mac mich nider bringen; ich erwerbes haz ode gruoz, sol dâ ein tjost ergên ze vuoz. ob ez halt vrouwe Kamille wære, diu mit rîterlîchem mære vor Lorente prîs erstreit, wære si gesunt, als si dort reit, ez würde iedoch versuochet an sie, op si mir strîten büte al hie."

*T Wiez Gawane komen sî, der ie was missewende vrî, sît er von Tschampfenzun geschiet, ob sîn reise ûf strît geriet, des jehen, diez dâ sâhen. ez muoz nû strîte nâhen. Eines morgens kom hêr Gawan geriten ûf einen plân. dâ sach er blicken einen schilt - dâ was ein tjost durch gezilt - unde ein pfert, daz vrouwen gereite truoc; des satel unde zoum was tiure genuoc. ez was gebunden vaste zem schilte an einem aste. Dô dâhter: "wer mac sîn diz wîp, diu alsus werlîchen lîp hât, sô daz si schiltes pfliget? ob si sich strîtes gegen mir bewiget, wie sol ich mich ir danne erwern? ze vuoz triuwe ich mich wol ernern. wil si die lenge ringen, si mac mich nider bringen; ich erwerbes haz oder gruoz, sol hie ergân ein tjost ze vuoz. ob ez halt vrou Camylle wære, diu mit redelîchem mære vor Laurente prîs erstreit, wære si gesunt, als si dort reit, ez würde iedoch versuocht an sie, ob si mir strîten büt al hie."