*D Dîn œheim gap dir ouch ein swert, dâ mit dû sünden bist gewert, sît daz dîn wol redender munt dâ leider niht tet vrâge kunt. die sünde lâ bî den andern stên! wir ouch tâlanc ruowen gên!" wênec wart in bette und kulter brâht; si giengen êt ligen ûf ein bâht. daz leger was ir hôhen art gelîche ninder dâ bewart. sus was er dâ vünfzehen tage. der wirt sîn pflac, als ich iu sage: krût unde würzelîn, daz muose ir bestiu spîse sîn. Parzival die swære truoc durch süeze mære, wand in der wirt von sünden schiet unt im doch rîterlîchen riet. Eines tages vrâgt in Parzival: "wer was ein man, lac vorme Grâl? der was al grâ bî liehtem vel." der wirt sprach: "daz was Titurel. der selbe ist dîner muoter an. dem wart alrêst des Grâles van bevolhen durch schermens rât. ein siechtuom, heizet pôgrât, treit er, die lem helfelôs. sîne varwe er iedoch nie verlôs, wander den Grâl sô dicke siht; dâ von er mac ersterben niht.

*m dîn œheim gap dir ouch ein swert, dâ mit dû sünden bist gewert, sît daz dîn wol geborner munt dâ leider niht tet vrâgen kunt. die sünde lâz bî den andern stên! wir sullen ouch dar umb tâlanc slâfen gên!" bette oder kultern wart in wênic brâht; si giengen eht ligen ûf ein bâht. daz leger was hôher art gelîch nindert dâ bewart. sus was er dâ vünfzehen tage. der wirt sîn pflac, als ich iu sage: krût und würzelîn, daz muose ir bestiu spîse sîn. Parcifal der swære truoc durch süeze mære, wan in der wirt von sünden schiet und im doch ritterlîchen riet. Eines tages sprach Parcifal: "wer was ein man, lac vor dem Grâl? der was al grâ bî liehtem vel." der wirt sprach: "daz was Titurel. der selbe ist dîner muoter ane. dem wart allerêrst des Grâles vane bevolhen durch schirmens rât. ein siechtage heizet pôgrât, die leme treit der helfelôs. sîn varwe er iedoch nie verlôs, wan er den Grâl sô dicke siht; dâ von mac er ersterben niht.

*G Dîn œheim gap dir ouch ein swert, dâ mit dû sünden bist gewert, sît daz dîn wol redender munt dâ leider niht tet vrâgen kunt. die sünde lâ bî den andern stên! wir suln ouch tâlanc ruowen gên!" wênic wart in bette unde kulter brâht; si giengen êt ligen in ein bâht. daz leger was ir hôhen art gelîche niender dâ bewart. sus was er dâ vünfzehen tage. der wirt sîn pflac, als ich iu sage: krût unde würzelîn, daz muose ir beste spîse sîn. Parzival die swære truoc durch süeziu mære, wan in der wirt von sünden schiet unde im doch rîterlîchen riet. eines tages vrâget in Parzival: "wer was ein man, der lac vorme Grâl? der was al grâ bî liehtem vel." der wirt sprach: "daz was Titurel. der selbe was dîner muoter ane. dem wart alrêrst des Grâles vane bevolhen durch schermes rât. ein siechtuom, heizet pôgrât, treit er, die lem helfelôs. sîne varwe er iedoch nie verlôs, wan er den Grâl sô dicke siht; dâ von mag er ersterben niht.

*T Dîn œheim gap dir ouch ein swert, dâ mit dû sünden bist gewert, sît daz dîn wol redender munt dâ leider niht tet vrâge kunt. die sünde lâ bî den andern stên! wir suln ouch tâlanc ruowen gên!" wênec wart in kultern unde bette brâht; si giengen eht ligen in ein bâht. daz leger was ir hôher art glîche niender dâ bewart. Sus was er dâ vünfzehen tage. der wirt sîn pflac, als ich iu sage: würze unde krütelîn muose ir bestiu spîse sîn. Parcifal die swære truoc durch liebiu mære, wand in der wirt von sünden schiet unde im doch rîterlîchen riet. Aber sprach dô Parcifal: "wer was ein man, der lac vorme Grâl?" Der wirt sprach: "daz ist Tyturel, der ist al grâ bî liehtem vel. der selbe ist dîner muoter ane. dem was alrêrst des Grâles vane bevolhen durch schirmes rât. ein siechtage, heizet pôgrât, treit er, die leme helfelôs. sîne varwe er doch nie verlôs, wander den Grâl sô dicke siht; dâ von mag er ersterben niht.