*D Daz was ê von im dîn sage; ez ist immer mînes herzen klage. mîn bruoder ist guotes rîche; verholne rîterlîche er mich dicke von im sande. sô ich von Munsalvæsche wande, sîn insigel nam ich dâ unt vuortez ze Karchobra, dâ sich sewet der Plimizœl, in dem bistuom ze Barbigœl. der burcgrâve mich dâ beriet ûffez insigel, ê ich von im schiet, knappen unt anderre koste gein der wilden tjoste unt ûf ander rîterlîche vart; des wart vil wênec von im gespart. ich muose al eine komen dar: an der widerreise liez ich gar bî im, swaz ich gesindes pflac. ich reit, dâ Munsalvæsche lac. nû hœre, lieber neve mîn: dô mich der werde vater dîn ze Sibilje alrêste sach, balde er mîn ze bruoder jach Herzeloyden, sînem wîbe; doch wart von sîme lîbe mîn antlütze nie mêr gesehen. man muose ouch mir vür wâr dâ jehen, daz nie schœner mannes bilde wart; dannoch was ich âne bart.

*m daz was ê von im dîn sage und ist iemer mînes herzen klage. mîn bruoder ist guotes rîch; verholn ritterlîch er mich dicke von im sante. sô ich von Muntsalvasche wante, sîn ingesigel nam ich dâ und vuorte ez zuo Carkobra, dâ sich sewet der Plimizol, in dem bistuom zuo Barbigol. der burcgrâve mich dâ beriet ûf daz ingesigel, als ich von im schiet, knappen und ander koste gegen der wilden joste und ûf ritterlîche vart; des wart vil wênic von im gespart. ich muos alein komen dar: an der widerreise liez ich gar bî im, waz ich gesindes pflac, und reit, dâ Muntsalvasche lac. nû hœre, lieber neve mîn: dô mich der werde vater dîn zuo Sibilje allerêrst sach, balde er mîn zuo bruoder jach Herczeloiden, sînem wîbe; doch wart von sînem lîbe mîn antlitze nie mê gesehen. man muos ouch mir vür wâr jehen, daz nie mannes bilde schœner wart; dannoch was ich âne bart.

*G Ez was ê von im dîn sage; ez ist immer mînes herzen klage. mîn bruoder ist guotes rîche; verholne rîterlîche er mich dicke von im sande. sô ich von Muntsalvatsche wande, sîn insigel nam ich dâ unde vuort ez ze Charochbra, dâ sich sewet der Blimzol, in dem bistuom ze Barbigol. der burcgrâve mich dâ beriet ûfez insigel, ê ich von im schiet, knappen unde ander koste gein der wilden tjoste unde ûf rîterlîche vart; des wart vil wênic von im gespart. ich muos al ein komen dar: ûf der widerreise liez ich gar bî im, swaz ich gesindes pflac. ich reit, dâ Muntsalvatsche lac. nû hœre, lieber neve mîn: dô mich der werde vater dîn ze Sibiljen alrêrst gesach, balde er mîn ze bruoder jach Herzeloiden, sînem wîbe; doch wart von sînem lîbe mîn antlütze nie mê gesehen. man muose ouch mir vür wâr dâ jehen, daz nie schœner mannes bilde wart; dannoch was ich âne bart.

*T daz was ê von im dîn sage; ez ist iemer mînes herzen klage. Mîn bruoder ist guotes rîche; verholne rîterlîche er mich dicke von im sante. sô ich von Munsalvasche wante, ich nam sîn ingesigel aldâ unde vuor gegen Kachopra, dâ sich sewet der Plymizol, in dem bischtuome ze Barbigol. der burcgrâve mich dâ beriet ûf sîn insigel, ê ich dannen schiet, knappen unde ander koste gegen der wilden tjoste unde ûf ander manege vart; des wart dâ wênic von im gespart. ich muose aleine komen dar: an der widerreise liez ich gar bî im, swaz ich gesindes pflac, unde reit, swâ Munsalvasche lac. Nû hœret, lieber neve mîn: dô mich der werde Anschevin ze Sybilie alrêst gesach, balder mîn ze bruoder jach von Herzeloyden, sînem wîbe; ouch wart von sînem lîbe mîn antlitze nie mê gesehen. man muose ouch vür wâr des jehen, daz nie schœner mannes bilde wart; dannoch was ich âne bart.