*D Sus pflac ichs durch die werden ûf den drîn teilen der erden, ze Europa unt in Asia unt verre in Affrica. sô ich rîche tjoste wolde tuon, sô reit ich vür Gauriuon. ich hân ouch manege tjost getân vor dem berc ze Famorgan. ich tet vil rîcher tjoste schîn vor dem berc ze Agremontin. swer einhalp wil ir tjoste hân, dâ koment ûz viurige man; anderhalp si brinnent niht, swaz man dâ tjostiure siht, unt dô ich vür den Rohas durch âventiure gestrichen was, dâ kom ein werdiu windisch diet ûz durch tjoste geinbiet. ich vuor von Sibilje daz mer alumbe gein Zilje, durch Friul ûz vür Aglei. owê unde heiâ hei, daz ich dînen vater ie gesach, der mir ze sehen al dâ geschach, dô ich ze Sibilje zogte în! dô het der werde Anschevin vor mir geherberget ê. sîn vart tuot mir iemer wê, die er vuor ze Baldac; ze tjostieren er dâ tôt lac.

*m sus pflac ich durch die werden ûf den drîn teilen der erden, zuo Erupie und in Asia und †wer† hin in Affrica ritterschaft zuo tuon sunder vröude und âne suon. sô ich rîche juste wolte tuon, sô reit ich vür Gauriuon. ich hab ouch manige just getân vor dem berge Famorgan. ich tet vil rîcher juste schîn zuo dem berge zuo Agremontin. wer einhalp wil ir juste hân, dâ koment ûz viurige man; anderhalp si brinnent niht, waz man dâ justiere siht, und dô ich vür den Rohas durch âventiur gestrichen was, dô kam ein werdiu windesch diet ûz durch juste gegenbiet, und vuor von Sibilje daz mer al umbe gegen Zilje, durch Friol ûz vür Aglei. ouwê und heiâ hei, daz ich dînen vater ie gesach, der mir zuo sehen aldâ geschach, dô ich zuo Sibilje zogte în! dô het der werde Anschevin vor mir †geherget† ê. sîn vart tuot mir iemer wê, die er vuor zuo Baldac; zuo justieren er tôt dâ lac.

*G Sus pflac ich es durch die werden ûf den drîn teilen der erden, ze Aropie unde in Asia unt verre in Affrica. sô ich rîche tjoste wolte tuon, sô reit ich vür Gaurian. ich hân ouch manige tjoste getân vor dem berge ze Phimurgan. ich tet vil rîcher tjoste schîn vor dem berc ze Agremontin. swer einhalp wil ir tjoste hân, dâ koment ûz viurige man; anderhalp si brinnent niht, swaz man dâ tjostiure siht, unde ich vür den Roas durch âventiure gestrichen was, dô kom ein werdiu windesch diet ûz durch tjoste gegenbiet. ich vuor von Sibilje daz mer al umbe gein Zilje, durch Vriul ûz durch Aglei. owê unde heiâ hei, daz ich dînen vater ie gesach, der mir ze sehenne al dâ geschach, dâ ich ze Sibilje zogte în! dô het der werde Anschevin vor mir geherberget ê. sîn vart tuot mir immer wê, die er vuor ze Baldac; ze tjostieren er dâ tôt lac.

*T Sus pflac ichs durch die werden ûf den drîn teilen der erden, Ze Arabie unde in Asya unde verre in Affryca. sô ich rîche tjoste wolte tuon, sô reit ich vür die Covriuon. ich tet vil rîche tjoste schîn vor dem berge ze Agremontin. swer einhalp wil ir tjost hân, dâ koment ûz viurîne man; anderhalp si brinnent niht, swaz man tjostiure siht. Dô ich vür den Roas durch âventiure gestrichen was, dô kom ein wert windesch diet ûz durch tjoste gegenbiet. ich vuor von Sibylie daz mer umbe gegen Cecilie, durch Fryuz vür Aglei. ouwê unde heiâ hei, daz ich dînen vater ie gesach, der mir ze sehenne aldâ geschach, Dô ich ze Sibylie zogete în! dô hete der werde Anschevin vor mir geherberget ê. sîn vart tuot mir iemer wê, die er vuor ze Baldac; ze tjostierne er tôt gelac.