*D Dô si daz ors begiengen, niwe klage si an geviengen. Parzival zem wirte sîn sprach: "hêrre unt lieber œheim mîn, getörst ichz iu vor scham gesagen, mîn ungelücke ich solde klagen. daz verkieset durch iwer selbes zuht; mîn triwe hât doch gein iu vluht. ich hân sô sêre missetân, welt ir michs engelten lân, sô scheide ich von dem trôste unt bin der unerlôste immer mêre von riwe. ir sult mit râtes triwe klagen mîn tumpheit. der ûf Munsalvæsche reit unt der den rehten kumber sach unt der deheine vrâge sprach, Daz bin ich unsælec barn; sus hân ich, hêrre, missevarn." der wirt sprach: "neve, waz sagestû nû? wir sulen bêde samt zuo herzenlîcher klage grîfen unt die vreude lâzen slîfen, sît dîn kunst sich sælden sus verzêch. dô dir got vünf sinne lêch, die hânt ir rât dir vor bespart. wie was dîn triwe von in bewart an den selben stunden bî Anfortases wunden?

*m Dô si daz ros begiengen, niuwe klage si an viengen. Parcifal zuom wirte sîn sprach: "hêrre und lieber œheim mîn, getörst ichz iu vor schame sagen, mîn unglück solte ich klagen. daz verkieset durch iuwer selbes zuht; mîn triuwe het doch gegen iu vluht. ich hân sô sêre missetân, welt ir michs engelten lân, sô scheide ich von dem trôste und bin der unerlôste iemer mê von riuwe. ir solt mit râtes triuwe klagen mîne tumpheit. der ûf Muntsalvasche dô reit und der den rehten kumber sach und doch kein vrâge sprach, daz bin ich unsælic barn; sus hân ich, hêrre, missevarn." Der wirt sprach: "hêrre, waz sagestû? wir sullen beidenthalben zuo herzelîcher klage grîfen und die vröude lâzen slîfen, sît dîn kunst sich selten sus verzêch. dô dir got vünf sinne lêch, die hânt ir rât dir vor verspart. wie was dîn triuwe von im bewart an den selben stunden bî Anfortases wunden?

*G Dô si daz ors begiengen, niuwe klage si an geviengen. Parzival ze dem wirte sîn sprach: "lieber hêrre unde œheim mîn, getörste ichz iu vor schame sagen, mîn ungelücke ich solde klagen. daz verkieset durch iuwer selbes zuht; mîn triuwe hât doch gein iu vluht. ich hân sô sêre missetân, welt ir mich es engelten lân, sô scheide ich von dem trôste unde bin der unerlôste immer mêr von riuwe. ir sult mit râtes triuwe klagen mîn tumpheit. der ûf Muntsalvatsche reit unt der den rehten kumber sach unt der deheine vrâge sprach, daz bin ich unsælic barn; sus hân ich, hêrre, missevarn." der wirt sprach: "neve, waz sagestû nû? wir suln bêde sament zuo herzenlîcher klage grîfen unt die vröude lâzen slîfen, sît dîn kunst dich sælden sô verzêch. dô dir got vünf sinne lêch, die hânt ir rât dir vor verspart. wie was dîn triuwe von in bewart an den selben stunden bî Anfortases wunden?

*T Dô si daz ors begiengen, niuwe klage si dô geviengen. Parcifal zem wirte sîn sprach: "hêrre unde lieber neve mîn, getörstichz iu vor schame gesagen, mîn unglücke ich iu solte klagen. daz verkieset durch iuwer selbes zuht; mîn triuwe hât doch gegen iu vluht. ich hân sô sêre missetân, welt ir michs engelten lân, sô scheidich von dem trôste unde bin der unerlôste iemer mêr von riuwe. ir sult mit râtes triuwe klagen mîne tumpheit. der ûf Munsalvasche reit unde der den rehten kumber sach unde der deheine vrâge sprach, daz bin ich unsælic barn; sus hân ich, hêrre, missevarn." Der wirt sprach: "waz sages dû? wir suln beide samt nû herzeclîche klage grîfen unde vröude lâzen slîfen, daz dîn kunst sich des verzêch, daz dir got vünf sinne lêch, die hânt dir rât vor bespart. wie was dîn triuwe vor im bewart an den selben stunden bî Anfortasses wunden?