*D Der dâ wehset under sîme horne; wir bestrichen die wunden vorne und besouften den stein drinne gar. diu wunde was êt lüppec var; daz tet uns mit dem künege wê. wir gewunnen eine würzen, heizet trachontê - wir hœren von der würze sagen, swâ ein trache werde erslagen, si wahse von dem bluote; der würze ist sô ze muote, si hât al des luftes art -, ob uns des trachen umbevart dar zuo möht iht gevromen vür der sterne widerkomen unt vür des mânen wandeltac, dâr an der wunden smerze lac. der würze edel, hôch geslehte kom uns dâ vür niht rehte. unser venje vielen wir vür den Grâl. dâr an gesâhen wir zeinem mâl geschriben, dar solde ein rîter komen, würde des vrâge aldâ vernomen, sô solde der kumber ende hân. ez wære kint, magt ode man, daz in der vrâge warnet iht, sône solde diu vrâge helfen niht, wan daz der schade stüende als ê unt herzelîcher tæte wê. diu schrift sprach: 'habt ir daz vernomen? iwer warnen mac ze schaden komen.

*m der wehset under sînem horn, und bestrichen die wunden vorn und †besenftet† den stein dâr în gar. diu wunde was eht lüppic var; daz tet uns mit dem künige wê. wir gewunnen ein würz, heizet trachontê - von der hœren wir sagen, wâ ein trache würde erslagen, si wahse von dem bluote; der würz ist sô ze muote, si het alle des luftes art -, ob uns des trachen umbevart dar zuo möht iht gevromen vür der sterne widerkomen und vür des mânen wandeltac, dâr an der wunden smerze lac. Der würz edel, hôch gesleht kam uns dâ vür niht reht. unser venje vielen wir vür den Grâl. dâr an †gesehen† wir zuo einem mâl geschriben, dar solte ein ritter komen, würde des vrâgen dâ vernomen, sô solte der kumber ende hân. ez wær kint, maget oder man, daz in der vrâge warnet iht, sô solte diu vrâge helfen niht, wan daz der schade stüende als ê und herzelîcher tæte wê. diu geschrift sprach: 'hât ir daz vernomen? iuwer warnen mac ze schaden komen.

*G Der dâ wehset under sînem horne; wir bestrichen die wunden vorne unde besouften den stein drin gar. diu wunde was êt lüppic var; daz tet uns mit dem künige wê. wir gewunnen ein würz, diu heizet trachontê - wir hœren von der würze sagen, swâ ein trache werde erslagen, si wahse von dem bluote; der würze ist sô ze muote, si hât al des luftes art -, ob uns des trachen umbevart dar möhte iht gevromen vür der sterne widerkomen unde vür des mânen wandeltac, dâr an der wunden smerze lac. der würze edel, hôch geslehte kom uns dâ vür niht rehte. unser venje vielen wir vür den Grâl. dâr an gesâhe wir zeinem mâl geschriben, dar solde ein rîter komen, würde des vrâgen al dâ vernomen, sô solde der kumber ende hân. ez wære kint, maget oder man, daz in der vrâge warnet iht, sône solde diu vrâge helfen niht, wan daz der schade stüende als ê unde herzelîcher tæte wê. diu schrift sprach: 'habet ir daz vernomen? iuwer warnen mac ze schaden komen.

*T der dâ wehset under sînem horne, unde bestrichen die wunde vorne unde besouften den stein drinne gar. diu wunde was eht lüppic var; daz tet uns mit dem künege wê. wir gewunnen eine würz, heizet trachontê - wir hœren von der würze sagen, swâ ein trache werde erslagen, si wahse von dem bluote; der würze ist sô ze muote, si hât aldes luftes art -, ob uns des trachen umbevart dar zuo möhte gevromen vür der sterne widerkomen unde vür des mânen wandeltac, dâr an des küneges smerze lac. der würze edel, hôch geslehte kom uns dâ vür niht rehte. unser venje viele wir vür den Grâl. dô gesâhen wir zeinem mâl geschriben, dar solte ein rîter komen, würde des vrâge aldâ vernomen, sô solt der kumber ende hân. ez wære kint, maget oder man, daz in der vrâge warnet iht, sône solte diu vrâge helfen niht, wan daz der schade stüende als ê unde herzeclîcher tæte wê. Diu schrift sprach: 'habt ir daz vernomen? iuwer warnen mac ze schaden komen.